Ditɛronɔmi 34 - EBƆRƐ BE KAWƆL

Mosis be luwu be asheŋ

¹ Ade kikɛ be kaman nɛ Mosis shi Mowab be kasawule so n dii n yɔ kebeegboŋ nɛ baa tre Pisga nɛ k wɔ kade nɛ baa tre Jɛriko na be epeŋilarkpa be kaba so na be awɔlto nɛ Enyɛnpe Ebɔrɛ na ŋini mo kananɛ Giliad be yiri be kasawule dese n ya fo Dan be yiri be kasawule kikɛ ashi kelargato be esoso be kaba so.

² Kumo be kaman nɛ e naŋ ŋini Mosis Naftali be yiri be kasawule nɛ Efreim nɛ Manase be eyiriana be nsawule nɛ Juda be yiri be kasawule n ya fo Teku nɛ baa tre Mɛditerenia na ashi epeŋitɔrkpa be kaba so.

³ Enyɛnpe Ebɔrɛ na daŋ naŋ ŋini mo kasawule nɛ k dese ketaŋɛ nɛ baa tre Abii be Ndibi be Kadegboŋ, nɛ k mata Jɛriko n dese n ya fo kade nɛ baa tre Zowa na ashi kelargato be kaseto be kaba so na.

⁴ Ade be kaman nɛ Enyɛnpe Ebɔrɛ na kaŋɛ Mosis le: “Kasawule nɛ n nase kumo be kɔnɔ n sa Eebraham nɛ Aizek nɛ Jeekɔb fanɛ meeŋ ta n sa bumo be kaman to ebi na nna na. N shin nɛ fo wu kumo, ama fo alɛ maaŋ yɔ ndoŋ.”

⁵ Ndoŋ nna nɛ Enyɛnpe Ebɔrɛ na be kayɛrbi, Mosis, wu ashi Mowab be kasawule so ndoŋ fanɛ kananɛ Enyɛnpe Ebɔrɛ kaŋɛ na.

⁶ Nɛ Enyɛnpe Ebɔrɛ na puli Mosis m mata kade nɛ baa tre Bɛf Piyɔɔ na, ashi Mowabebi be kasawule so. Ama hale nɛ mbre, esa kikɛ maŋ nyi kakpa nɛ Mosis be nchaŋ dese.

⁷ Mosis daŋ ji nfɛ kalfa nɛ adunyɔ nna nseŋ wu, ama e daŋ kraa kɔ eleŋ nna fanɛ kabrantiɛ, nɛ mbe anishi malɛ daŋ kraa wu nɛnɛ.

⁸ Nchɛ adesa nɛ Israɛl be basa daŋ shu Mosis be keeli bumo be daŋkare be ekpa so ashi Mowab be kasawule so.

⁹ Pɔɛŋ nɛ Mosis wu na, e daŋ lara Nun pibinyɛn, Joshuwa nna nɛ e sɔ mo ere Mosis so a juŋkpar basa na. Mosis daŋ ta mbe enɔana n deŋi Joshuwa so nna ŋ kule Ebɔrɛ n sa mo, nɛ Enyɛnpe Ebɔrɛ na sa mo kanyiasheŋ ga. Israɛl be basa na malɛ daŋ wora Joshuwa kasonu nna nseŋ daa bɛ mbraana nɛ Enyɛnpe Ebɔrɛ na bɔla Mosis so n ta n sa bumo na so.

¹⁰ Anebi kikɛ maŋ naŋ lar Israɛl be efuli so a du fanɛ Mosis. Mo nɛ Enyɛnpe Ebɔrɛ na daa malga, baa wu abar nna.

¹¹ Anebi kikɛ maŋ naŋ tiŋ n wora emamachisheŋ nɛ asheŋ nɛ a bee mɔ kɔnɔ n fo amo nɛ Enyɛnpe Ebɔrɛ na shuŋi Mosis nɛ e ya wora ashi Ijipt be ewura nɛ mbe benimuana nɛ efuli na kikɛ be basa be anishito so.

¹² Anebi kikɛ malɛ maŋ naŋ wora asheŋgboŋ nɛ a bee keta kufu n fo amo nɛ Mosis wora ashi Israɛlebi na be anishito so.