Ditɛronɔmi 33 - EBƆRƐ BE KAWƆL

Mosis ka nɛfa Israɛl be eyiriana na be asheŋ

¹ Mosis daa la anebi nna, amoso pɔɛŋ nɛ e wu na le nɛ e daŋ nɛfa Israɛl be eyiriana na ŋ kaŋɛ:

² “Enyɛnpe Ebɔrɛ na daŋ shi Sainai be kebeegboŋ na so nna n nyaŋɛ fanɛ epeŋi n yuu Edɔm be kasawule so nɛ mbe kemaŋkura buu mbe basa so ashi Paran be kebeegboŋ na so. Emalaika ŋgboŋ kudu e daa wɔ mo kutɔ, nɛ edɛ daa suse wuloŋ wuloŋ mbe enɔjiso to.

³ Enyɛnpe Ebɔrɛ na bee sha mbe basa nna, nsaa kuŋ bekama nɛ b la mo peya. Amoso anyeeŋ gbir m bunyaŋ mo nseŋ wora kusɔ nɛ e kaŋɛ kenishipere so na kasonu.

⁴ Anyeeŋ wora mbra nɛ Mosis ta n sa anyi na kasonu. Anyi be kapetɛgboŋ nɛ anyee sha ga nna na.

⁵ Enyɛnpe Ebɔrɛ na ki mbe basa Israɛlebi be ewura, jemanɛ nɛ bumo be eyiriana na nɛ bejuŋkparpoana na gama abar so.”

⁶ Le nɛ Mosis kaŋɛ a laŋɛ Ruben be yiri na be kaplɛa so: “Ruben be yiri to be basa ka maŋ shi ga ere gba, b maaŋ wu m mur kikɛ.”

⁷ Le nɛ Mosis kaŋɛ a laŋɛ Juda be yiri be kaplɛa so: “Enyɛnpe Ebɔrɛ, nu Juda be yiri to ebi be kushu, nseŋ bɛta bumo nɛ eyiriana na kikɛ m ba abar so. Enyɛnpe Ebɔrɛ, kɔ n sa bumo, chɛ bumo to ŋ kɔ bumo doŋana.”

⁸ A laŋɛ Livai be yiri be kaplɛa so, le nɛ Mosis kaŋɛ: “Fo Enyɛnpe Ebɔrɛ na e naa shin nɛ Livaiebi nɛ b la fo nyɛrbi a ji kashenteŋ na bee bɔla Urim nɛ Tumim so a pin fo aparsheŋ. Fo e daŋ wora bumo ŋ keni ashi Massa, nseŋ mige bumo to m pin fanɛ b la beshenteŋjipoana nna ashi Mɛriba be nchu na ase.

⁹ Fo nɛ baa nu a sa a chɔ bumo kurgepoana nɛ bumo niopibiana nɛ bumo be mbia. Kusɔ nɛ fo kaŋɛ kenishipere so na nɛ baa wora kasonu, nsaa ji kashenteŋ a sa fo kɔnɔkoŋwule be ŋkre na.

¹⁰ Bumo e naaŋ ŋini fo basa fo mbra nɛ b bɛ amo so. Bumo alɛ e naaŋ baa lara esarga fo bɔrɛsure so.

¹¹ Amoso Enyɛnpe Ebɔrɛ, chɛ bumo to nɛ b nya eleŋ. Shin nɛ b baa wora fo aparsheŋ. Fo e naŋ mur bumo doŋana kikɛ nsaa maŋ naŋ shin nɛ b koso kikɛ.”

¹² Le nɛ Mosis kaŋɛ a laŋɛ Bɛnjamin be yiri be kaplɛa so: “Yiri nɛ Enyɛnpe Ebɔrɛ na bee sha nsaa kuŋ nde; kapa nɛ kanyɛ kikɛ nɛ e bee kuŋ bumo. Mo alɛ nɛ bumo e wɔtɔ.”

¹³ Le nɛ Mosis kaŋɛ a laŋɛ Efreim nɛ Manase be eyiriana na be kaplɛa so: “Enyɛnpe Ebɔrɛ na e nɛfa bumo be nsawule n sa bumo bɔrɛchu lela, n shin nɛ kasawule na e baa kɔ kayul.

¹⁴ Ebɔrɛ e nɛfa kasawule na nɛ k baa wora asɔrso nɛ epeŋi beeŋ ŋmɛa so nɛ a bel m pere nɛnɛ. E shin nɛ asɔrso na e baa wora nɛnɛ jemanɛ nɛ k daga.

¹⁵ Ebɔrɛ e shin nɛ b baa dɔ nsaa teŋi nɛnɛ ashi bumo be abee nɛ a wɔtɔ dra dra kikɛ na ase.

¹⁶ Ebɔrɛ e shin nɛ bumo be kasawule e baa kɔ asɔ lela. Enyɛnpe Ebɔrɛ na e ta mbe alelasheŋ n nɛfa bumo. Ŋkpal manɛ so, mo e la Enyɛnpe Ebɔrɛ nɛ e bɔla kupuŋ chɔɔso to m malga na. Ebɔrɛ e shin nɛ enɛfa ere e baa wɔ Efreim nɛ Manase be eyiriana so. Ŋkpal manɛ so, b la Josɛf nɛ e la mo niopibiana to be ejuŋkparpo na be mbia nna.

¹⁷ Gbolu be eleŋ nɛ Josɛf daa kɔ, nseŋ daŋ kɔ gbolu fɛlso malɛ be alambɛ. Mbe alambɛ na e la Manase be benapo ŋgboŋ to ŋgboŋ to nɛ Efreim be benapo ŋgboŋ to kudu. Benapo lempo na nɛ e beeŋ ta m pɔɔ efuliana na so hale n ya fo durnya be ekar.”

¹⁸ A laŋɛ Zebulun nɛ Issaka be eyiriana be kaplɛa so, le nɛ Mosis daŋ kaŋɛ: “Ebɔrɛ e shin nɛ Zebulun be teku so be eyawujipo e dii dama; e shin nɛ Issaka be kedama e wora keshi n ti so ashi epe.

¹⁹ Baa tre befɔ nna a ba bumo be abee so m baa kaa lara esarga nɛ a daga ashi amo so. Teku so nɛ baa bɔla a nya bumo be kedama; baa bɔla teku ase be eshishɛr so gba a dii dama.”

²⁰ Le nɛ Mosis daŋ kaŋɛ a laŋɛ Gad be yiri be kaplɛa so: “Kemaŋkura e baa la Ebɔrɛ nɛ e kpalga bumo be kasawule to na peya. Gad bre wɔtɔ nna fanɛ buluŋ a jo, nɛ e kpa keba ŋko n fɔlge kumu be kawɔl.

²¹ Bumo ere ta kasawule na be alela akpa nna n sa bumo be amu; ejuŋkparpo be kachige nɛ b ta n sa bumo. B daŋ wora Enyɛnpe Ebɔrɛ na be mbraana kasonu jemanɛ nɛ Israɛl be bejuŋkparpoana daŋ gama abar so na.”

²² A laŋɛ Dan be yiri be kaplɛa so, le nɛ Mosis daŋ kaŋɛ: “Dan du fanɛ buluŋ fɔlbi nna; E shi Bashan be kasawule so nna n tɛ n lar.”

²³ A laŋɛ Naftali be yiri be kaplɛa so le nɛ Mosis daŋ kaŋɛ: “Enyɛnpe Ebɔrɛ na be kuwɔrwu so, nɛ e nɛfa Naftali ga. Bumo be kasawule yili Galili be kepa na nna n ya fo kelargato be kaseto nna.”

²⁴ A laŋɛ Asha be yiri be kaplɛa so, le nɛ Mosis daŋ kaŋɛ: “Asha nya nɛfa a chɔ eyiriana nɛ a ka na. Ebɔrɛ e shin nɛ mo niopibiana bee sha mo ga, nseŋ shin nɛ mbe kasawule so kɔ ɔlifs be ndibi damta.

²⁵ Ebɔrɛ e shin nɛ bumo be mbunagboŋ e baa la abɛlso a kuŋ bumo be ndeana jemanɛ kikɛ.

²⁶ Israɛl be basa, Ebɔrɛ kikɛ maŋ naa wɔtɔ fanɛ menyi be Ebɔrɛ na. Mo e naa lara mbe kemaŋkura a ŋini kuwɔlpa so, nsaa bɔla bɔrɛwɔlpa to a ba menyi be kechɛto to na.

²⁷ Ebɔrɛ nɛ e wɔtɔ mbaanaayɔ na e la menyi be ekumpo. Mo e kɔ menyi mbe enɔana to na. Mo koŋwule na e naa ju men doŋana ashi menyi so na. Mo e naa malga nɛ menyee mur men doŋana na.

²⁸ Amoso kayurwushi to nɛ Jeekɔb be kaman to ebi kikɛ wɔ. B maa ŋana shɛŋ ashi kasawule nɛ k kɔ ayu nɛ yabra ga na so; kakpa nɛ bunyaŋ gba bee wushi kasawule na.

²⁹ Israɛlebi, men be ŋgbene fuli pasaa! Ekama maŋ wɔtɔ e du fanɛ menyi. Enyɛnpe Ebɔrɛ na mɔlga menyi be efuli nna. Mo gbagba e naa kuŋ menyi nsaa kɔ a sa menyi. Mo koŋwule na e naa chɛ menyi to a shin nɛ menyee kɔ a pɔɔ so. Men doŋana beeŋ ba gbir ŋ kule fanɛ men wu bumo kuwɔr, nɛ men chichi bumo so m mata kasawule.”