Ditɛronɔmi 32 - EBƆRƐ BE KAWƆL

¹ “Esoso nɛ kasawule so be asɔ, men nu ma mmalga ere; men nu kusɔ nɛ mee kaŋɛ ere nɛnɛ!

² Ma keŋini beeŋ ba fanɛ bɔrɛchu nɛ kasawule e pɔ fanɛ bunyaŋ ka tɔr. Ma mmalga beeŋ tɔr to fanɛ bɔrɛ ka bee ba asɔduuso popɔrbi so ŋko fanɛ bɔrɛ ka bee furi afitiri wurbi so.

³ Meeŋ fur Enyɛnpe Ebɔrɛ na be ketre, nɛ mbe basa e malga mbe keshi be asheŋ.

⁴ Enyɛnpe Ebɔrɛ na e la menyi be ekumpo lempo, nɛ mbe kusɔ kama niŋi nseŋ bɔla ekpa. Men be Ebɔrɛ na la eshenteŋjipo nɛ esa beeŋ tiŋ n yirda nna; mo e naa wora kusɔ nɛ k daga nsaa maa kpɛa to na.

⁵ Ama menyi ere maa ji kashenteŋ; menyi nɛ men la alubi nɛ efɛ be efuli so ebi ere; a maŋ daga fanɛ men baa la mbe basa gba.

⁶ Menyi bewulpo nɛ basa nɛ b maŋ kɔ nfɛra ere, le a daga fanɛ men wora Enyɛnpe Ebɔrɛ na a? Enyɛnpe Ebɔrɛ na e la men tuto, mo e to menyi, nseŋ shin nɛ men ki efuli koŋwuleso be basa.

⁷ Men laŋɛ menyi be nfɛra n yɔ dra na be nchɛ so; men bishi basa nɛ b kurge menyi na kusɔ nɛ k daŋ wora, nseŋ naŋ bishi basa kpar nɛ b kaŋɛ menyi adrasheŋ.

⁸ Enyɛnpetale Ebɔrɛ na e naa sa efuli kama so ebi nsawule; mo e naa ŋini basa kakpa nɛ baaŋ chena.

⁹ E lara Jeekɔb be kenana bre nna n sa mbe kumu.

¹⁰ E wu bumo nɛ baa nite keshishɛrsawule so nna, kakpa nɛ k dese fuloŋ nɛ afu bee muu shishɛr a yɔ a ba na. Ndoŋ nna nɛ e kuŋ bumo ŋ keni bumo so nɛnɛ, fanɛ kananɛ e bee kuŋ mo gbagba be kumu na.

¹¹ Kananɛ kajɔnɔkoso bee ŋini kumo be bibi kefergi a parga kumo gbagba be aba to a suse bibi na to na, aloŋ nɛ Enyɛnpe Ebɔrɛ na daŋ suse Israɛlebi to nɛ b sa maŋ tɔr.

¹² Enyɛnpe Ebɔrɛ na nawule e juŋkpar mbe basa, nɛ kegbir pɔtɛ kikɛ maŋ chɛ mo to.

¹³ Kumo be kaman nɛ e shin nɛ b ji kuwura abeesawule so, nseŋ naŋ shin nɛ b ji asɔ nɛ b dɔ n nya bumo be adɔ to. B daŋ nya emushoŋ ashi abee so n ji; bumo be ɔlifs be ndibi purge nɛnɛ kejasawule so.

¹⁴ Bumo be ana nɛ mboe sa bumo kenyipochu damta ga; Bashan be kasawule so nɛ bumo be mbolpɔ nɛ mboe nɛ ana daa ji. Bumo alɛ daŋ naa kɔ ayu lela nɛ yabra belbelso ga.

¹⁵ Enyɛnpe Ebɔrɛ na be basa daŋ dii dama, ama bumo alɛ daŋ diewu nna n wɔtɔ Ebɔrɛ ŋ kini mo. B daŋ ji nna n daŋ n daŋ n wora egbɛ nɛnɛ n ti so nseŋ shile Ebɔrɛ nɛ e to bumo na. B daŋ kini bumo be emɔlgapo lempo na nna.

¹⁶ Bumo be kagbirshuŋ daŋ shin nɛ Enyɛnpe Ebɔrɛ na be kukɔrkɔ koso nna; nɛ bumo be asheŋ lubi shin nɛ mbe kagbene kaa.

¹⁷ B daŋ lara esarga nna n sa agbirana nɛ a maŋ la Ebɔrɛ, agbir popɔr nɛ bumo nananyɛnana daa maŋ nyi, agbirana nɛ Israɛl daa maŋ naŋ wora kasonu ŋ ku so.

¹⁸ B daŋ teŋ bumo be Ebɔrɛ, bumo be Emɔlgapo lempo nɛ e sa bumo ŋkpa na so nna.

¹⁹ Enyɛnpe Ebɔrɛ na ka wu loŋ nɛ e nya agbo nseŋ kini mbe mbia n lɛ.

²⁰ Kumo be kaman nɛ e kaŋɛ le: ‘M maaŋ naŋ chɛ bumo to kikɛ, nseŋ keni kusɔ nɛ k beeŋ wora ŋgbene kpakpasowuraana nɛ b maa ji kashenteŋ ere.

²¹ B daŋ bunyaŋ agbirana nɛ a maŋ kɔ tɔnɔ n shin nɛ ma kukɔrkɔ koso nɛ n nya agbo. Amoso meeŋ shin nɛ men be kukɔrkɔ nɛ agbo e koso, ŋkpal kusɔ nɛ meeŋ wora efuli nɛ k maa wu kuwɔr nsaa maa kɔ tɔnɔ be basa so.

²² Kumo be kaman nɛ ma agbo e suse fanɛ edɛ n chɔɔ kusɔ kama durnya to, n ta menyi be adɔ n ti so. Edɛ na beeŋ chɔɔ hale bubuni to ashi kasawule to nseŋ naŋ chɔɔ abeeana gba m mur.

²³ Ade kikɛ be kaman nɛ n shin nɛ aleblawu nɛ a maŋ kɔ ekar e ba menyi so fanɛ atanyembi na.

²⁴ Meeŋ shin nɛ akoŋgboŋ nɛ alɔ mɔso e mɔ menyi. Ma alɛ beeŋ shin nɛ kupuŋ to be asɔbɔya lubi e pɛ menyi, nɛ awɔ nɛ e kɔ kebɔr lubi malɛ gba e duŋ menyi.

²⁵ Kena beeŋ ku menyi be agbembi so m bar menyi luwu, nɛ kufugboŋ e ba menyi so ashi men be elaŋana to. Mbifɔlbi beeŋ wu. Mbiwurbi nɛ basa nɛ b bel kikɛ maaŋ lar.

²⁶ Meeŋ mur bumo kikɛ kuraa, nɛ esa maaŋ naŋ nyiŋi bumo gba.

²⁷ Ama m maaŋ tiŋ n shin nɛ men doŋana e puchi fanɛ b tiŋ m pɔɔ ma basa so, saŋɛ nɛ k la fanɛ ŋ gbagba e pɔɔ bumo so.’

²⁸ Israɛl be efuli so be basa maŋ kɔ nfɛra nna, b maŋ kɔ kanyiasheŋ kikɛ.

²⁹ B maaŋ tiŋ m pin kusɔ nɛ k ba nɛ b kɔ n tɔr, bumo alɛ maaŋ tiŋ m pin kananɛ asheŋ na beeŋ loge to gba.

³⁰ Manɛ so nɛ esa koŋwule tiŋ m pɔɔ basa kagboŋ so, nɛ basa anyɔ malɛ tiŋ m pɔɔ basa ŋgboŋ kudu so? Enyɛnpe bumo be Ebɔrɛ na e kini bumo n lɛ. Bumo be Ebɔrɛ lempo na e ta bumo n sa bumo doŋana.

³¹ Bumo doŋana na baa nyi fanɛ bumo be agbirana maŋ kɔ eleŋ; agbirana na be eleŋ maŋ fo Israɛl be Ebɔrɛ peya so.

³² Bumo doŋana nɛ b lubi fanɛ Sodɔm nɛ Gomɔra ebi na, du fanɛ afeelebi nɛ a bee sɔr asɔrso kekra nɛ kɔrtɔ wɔ amo to nna,

³³ ŋko yabra nɛ awɔ be kɔrtɔ wɔ amo to na nna.

³⁴ Enyɛnpe Ebɔrɛ na nyiŋi kusɔ nɛ bumo doŋana wora nsaa jo saŋɛ nɛ k daga fanɛ e gberge bumo kusoe.

³⁵ Enyɛnpe Ebɔrɛ na beeŋ sɔ bumo be kɔnɔ so ŋ gberge bumo doŋana na kusoe. Jemanɛ na kaŋ fo baaŋ fɛrge n tɔr; bumo be kemur be kachɛ taga to nna na.

³⁶ Enyɛnpe Ebɔrɛ na beeŋ kɔ n sɔ mbe basa, jemanɛ nɛ e beeŋ wu fanɛ bumo be eleŋ loge na. E beeŋ wu bumo nɛ baa shuŋ mo na kuwɔr, jemanɛ nɛ e beeŋ wu fanɛ b maaŋ tiŋ n wora shɛŋ n sa bumo be amu na.

³⁷ Kumo be kaman nɛ Enyɛnpe Ebɔrɛ na e bishi mbe basa le: ‘Nnɛ nɛ agbirgboŋ nɛ men yirda na wɔ?

³⁸ Men daŋ ta menyi be esarga be nfɔ nɛ eyabra nna n sa amo. Naniere men shin nɛ agbirana na a ba chɛ menyi to, nseŋ shile m ba kɔ n sɔ menyi n yige.

³⁹ N nawule kpeŋ e la Ebɔrɛ. Ebɔrɛ kikɛ maŋ naa wɔtɔ n ti ma so. Ma e naa shin nɛ luwu bee ba, ma koŋwule na e naa sa ŋkpa. Ma e naa bar doro, ma alɛ e naa chɛ edoro. Esa maaŋ tiŋ ŋ kuŋ kusɔ kama nɛ mee wora akpa.

⁴⁰ Ma e la Ebɔrɛ nɛ e bee sa ŋkpa; ma e maŋ ma enɔ so m bɔ ntaŋ

⁴¹ fanɛ meeŋ yee ma tokobi nɛ k baa nyɛkpɛ nseŋ shin nɛ kashenteŋji e dii efuli. Meeŋ ka n doŋana kukɔ nseŋ gberge bumo nɛ b kishi ma kusoe.

⁴² Bumo be ŋklaŋ beeŋ baa chise ma atanyembi so, nɛ ma tokobi e mɔ bekama nɛ b maa shuli a sa ma na. M maaŋ shin nɛ ekama nɛ e bee kɔ ma e ta mbe kumu n ji; bumo nɛ b nya doro nɛ bumo nɛ b wɔ kabuti to kikɛ beeŋ wu.’

⁴³ Efuli pɔtɛana be basa, a daga fanɛ men tu Enyɛnpe Ebɔrɛ na be basa n ji eyur, ŋkpal manɛ so, e bee gberge bekama nɛ b mɔ mbe basa kusoe nna. Mo e naa bishi mo doŋana kuwule nsaa ta mbe basa be alubi a paŋ bumo na.”

⁴⁴ Mosis nɛ Nun pibinyɛn, Joshuwa daŋ kute kashɛ ere be mmalga to nna; saŋɛ na so, Israɛl be basa beeŋ nu kumo.

⁴⁵ Mosis ka kute kashɛ na be mmalga nɛ e la Ebɔrɛ be keŋini na to n sa basa na n loge

⁴⁶ nɛ e kaŋɛ le: “Men baa nyiŋi nsaa wora asheŋ nɛ ŋ kaŋɛ menyi kenishipere so kabre ere kasonu nɛnɛ. Men baa kute amo to a sa men be mbia, saŋɛ na so, bumo alɛ gba beeŋ wora kusɔ kama nɛ k wɔ Ebɔrɛ be mbra be kawɔl na to kasonu kashenteŋto.

⁴⁷ Ebɔrɛ be mbraana na maŋ la mmalga fuloŋ nna. Amo e naaŋ sa menyi ŋkpa tenteŋ. Amoso, men baa wora amo kasonu nseŋ nya ŋkpa tenteŋ ashi kasawule nɛ k dese Jɔɔdan be lɔr na be kaba ndoŋ nɛ menyee yɔ nɛ men ya kɔ n sɔ n chena so na so.”

⁴⁸ Loŋ be kachɛ na gbagba nɛ Enyɛnpe Ebɔrɛ na naŋ kaŋɛ Mosis le:

⁴⁹ “Yɔ abee nɛ baa tre Abarim nɛ a wɔ Mowabebi be kasawule so nseŋ shoŋi kadegboŋ nɛ baa tre Jɛriko na so n ya dii kebeegboŋ nɛ baa tre Nebo na n yili kumo so n to kenishi ŋ keni kasawule nɛ mee sha keta n sa Israɛlebi na.

⁵⁰ Feeŋ wu kebeegboŋ na so nɛ b puli fo kumo so fanɛ kananɛ fo da Ɛɛrɔn wu kebeegboŋ nɛ baa tre Hɔɔ na so nɛ b puli mo kumo so na.

⁵¹ Ŋkpal manɛ so, menyi benyɔ na kikɛ daŋ maŋ ji kashenteŋ n sa ma ashi basa na be anishito. Jemanɛ nɛ men daa wɔ Meriba be nchu nɛ k mata kade nɛ baa tre Kadɛsh na ashi kiyi nɛ baa tre Zin so na ase, men daŋ maŋ maŋkura ma ashi basa na be anishito.

⁵² Amoso kufɔ nɛ feeŋ yili ŋ keni kasawule nɛ mee ta a sa Israɛl be basa na, ama fo alɛ maaŋ yɔ kumo so.”