Ditɛronɔmi 31 - EBƆRƐ BE KAWƆL

Joshuwa ka sɔ Mosis so be asheŋ

¹ Ade be kaman nɛ Mosis naŋ kaŋɛ Israɛlebi na le:

² “Nfɛ kalfa nɛ adunyɔ nɛ n ji durnya to. Ma alɛ maŋ naa kɔ eleŋ nseŋ kraa juŋkpar menyi. Kumo be kaman, Enyɛnpe Ebɔrɛ na malɛ gba kaŋɛ ma fanɛ m maaŋ dii n yɔ Jɔɔdan be lɔr na be kaba ndoŋ.

³ Enyɛnpe menyi be Ebɔrɛ na gbagba nɛ Joshuwa e naaŋ juŋkpar menyi n ya kɔ efuliana nɛ a wɔ ndoŋ na; saŋɛ na so, menyeeŋ tiŋ n ya chena kasawule na so fanɛ kananɛ Enyɛnpe Ebɔrɛ na kaŋɛ na.

⁴ Enyɛnpe Ebɔrɛ na gbagba e naaŋ mur basa na, fanɛ kananɛ e pɔɔ Amɔriebi be bewura, Sihɔn nɛ Ɔg so nseŋ mur bumo be efuli na.

⁵ Mo koŋwule na e naaŋ chɛ menyi to nɛ men pɔɔ efuliana na so nseŋ mɔ esa kama nɛ e wɔ ndoŋ.

⁶ Men nya kagbene a kɔ kenyɛn. Men sa maa ŋana bumo. Ŋkpal manɛ so, Enyɛnpe menyi be Ebɔrɛ na gbagba beeŋ baa wɔ menyi kutɔ. Mo alɛ maaŋ lar menyi kaman ŋko ŋ kplaŋ menyi so kikɛ.”

⁷ Ade be kaman, nɛ Mosis tre Joshuwa m ba kaŋɛ mo le ashi Israɛl be basa na kikɛ be anishito: “Nya kagbene a kɔ kenyɛn. Fo e naaŋ juŋkpar basa ere n ya sɔ kasawule nɛ Enyɛnpe Ebɔrɛ na nase kumo be kɔnɔ n sa bumo nananyɛnana na n chena so.

⁸ Enyɛnpe Ebɔrɛ na gbagba beeŋ baa wɔ fo kutɔ a juŋkpar fo. Mo alɛ maaŋ lar fo kaman ŋko ŋ kplaŋ fo so kikɛ; amoso sa maa pɔ aba ŋko a lɔ kufu.”

Kebaakraŋ mbra na nfɛ ashunu kikɛ be asheŋ

⁹ Mosis daŋ sibɛ Ebɔrɛ be mbra na nna n wɔtɔ kawɔl to nseŋ ta kumo n sa Israɛl be bejuŋkparpoana na nɛ bɔrɛmatapoana nɛ b shi Livai be yiri to nsaa keni Enyɛnpe Ebɔrɛ na be kɔnɔkoŋwule be ŋkre be deka so na.

¹⁰ Kumo be kaman nɛ Mosis kaŋɛ bumo le kenishipere so: “Nfɛ ashunu kikɛ be lalaloge, kumo e la kafɛ nɛ baa yige akɔ a paŋ na, men kraŋ mbra be kawɔl ere awɔrso n sa ekama jemanɛ nɛ menyee ji Kebaawɔ Abuu to be kachɛgboŋ na.

¹¹ Jemanɛ nɛ Israɛl be basa beeŋ ba gama abar so nɛ b shuŋ Enyɛnpe menyi be Ebɔrɛ na ashi kakpa nɛ menyeeŋ baa shuŋ Ebɔrɛ na nɛ menyeeŋ kraŋ kumo n sa bumo.

¹² Menyeeŋ tre benyɛn nɛ beche nɛ mbia nɛ befɔ nɛ b tu menyi n chena men be ndeana to na n shɛr; saŋɛ na so, bumo be ekama beeŋ nu mbra na nseŋ koya kebaabunyaŋ Enyɛnpe menyi be Ebɔrɛ na a wora mbe mbraana kasonu kashenteŋto.

¹³ Ekpa nɛ men be kaman to ebi nɛ b maŋ naŋ nu Enyɛnpe menyi be Ebɔrɛ na be mbra be asheŋ beeŋ bɔla so n nya kumo n nu nna na. Kumo be loŋ beeŋ shin nɛ b koya kebaawora mo kasonu bumo be kebaawɔtɔ to ashi kasawule nɛ menyee yɔ nɛ men ya sɔ n chena so ashi Jɔɔdan be lɔr na be kaba ndoŋ na.”

Israɛl ka beeŋ lar Enyɛnpe Ebɔrɛ na kaman be asheŋ

¹⁴ Ade kikɛ be kaman, nɛ Enyɛnpe Ebɔrɛ na kaŋɛ Mosis le: “Fo maaŋ naŋ chɛr nseŋ wu, amoso keta Joshuwa m ba wajɛbu cheembi na to; saŋɛ na so, meeŋ ŋini mo asheŋ ko nɛ e ki Israɛl be ejuŋkparpo. Ndoŋ nna nɛ Mosis nɛ Joshuwa kikɛ yɔ wajɛbu cheembi na to

¹⁵ nɛ Enyɛnpe Ebɔrɛ na bɔla kuwɔlpa nɛ k wɔ wajɛbu cheembi na be kabuna to na so n lara mbe kumu ŋ ŋini bumo.”

¹⁶ Kumo be kaman nɛ Enyɛnpe Ebɔrɛ na kaŋɛ Mosis le: “Fo maaŋ naŋ chɛr nseŋ wu. Fo alɛ be luwu be kaman basa na maaŋ naa ji kashenteŋ a sa ma nseŋ lar kɔnɔkoŋwule be ŋkre nɛ ma nɛ bumo kre na to. Baaŋ lar ma kaman n ya kaa shuŋ nnyamase be agbirana nɛ a wɔ kasawule nɛ baa yɔ na so.

¹⁷ Nɛ b kaŋ wora loŋ malɛ, meeŋ nya agbo ga n wora bumo nseŋ kplaŋ bumo so nɛ b mur. Kumu lubi gboŋgboŋi beeŋ ba bumo so nɛ b pin fanɛ asheŋ ere kikɛ bee wora nna ŋkpal ma, bumo be Ebɔrɛ na, ka maŋ naa wɔ bumo kutɔ so.

¹⁸ Ma alɛ beeŋ kini kechɛ bumo to, ŋkpal b ka ya kaa shuŋ agbirana n wora kulubi so.

¹⁹ To, sibɛ kashɛ ere n nase naniere, nseŋ ŋini Israɛl be basa na nɛ b baa boŋ kumo; saŋɛ na so, baaŋ pin kusɔ nɛ mee sha fanɛ b baa wora nsaa maaŋ nya kusɔ ko n yili so ŋ kini kewora ma kasonu.

²⁰ Ma alɛ beeŋ keta bumo n yɔ kasawule nɛ k kɔ eleŋ a wora adɔjibi nɛnɛ na so fanɛ kananɛ n nase kumo be kɔnɔ n sa bumo nananyɛnana na. Baaŋ ya nya kusɔ kama nɛ baa sha n ji ndoŋ. Ama b kaŋ ya nya n ji n daŋ, baaŋ lar ma kaman n ya kaa shuŋ agbirana n jija ma nɛ bumo be kɔnɔkoŋwule be ŋkre na.

²¹ Kumo be loŋ beeŋ shin nɛ kumu lubi gboŋgboŋi e ba bumo nɛ bumo be kaman to ebi so. Ama b kraa beeŋ baa boŋ kashɛ ere nɛ k baa ji shɛda a gbiti bumo. Pɔɛŋ nɛ meeŋ keta bumo n yɔ kasawule nɛ n nase kumo be kɔnɔ n sa bumo na gba so, n tea nyi kusɔ nɛ baa fɛ.”

²² Loŋ be kachɛ na gbagba nɛ Mosis sibɛ kashɛ na nseŋ ŋini Israɛlebi na kumo.

²³ Kumo be kaman nɛ Enyɛnpe Ebɔrɛ na naŋ kaŋɛ Nun pibinyɛn, Joshuwa, le: “Baa kɔ kenyɛn nseŋ yili fo kagbene kukoŋwule. Ŋkpal manɛ so, ŋ gbagba e naaŋ chɛ fo to nɛ fo tiŋ n juŋkpar Israɛl be basa ere n yɔ kasawule nɛ n nase kumo be kɔnɔ n sa bumo na so.”

²⁴ Ndoŋ nna nɛ Mosis sibɛ Ebɔrɛ be mbraana na kikɛ nyam n wɔtɔ kawɔl to. E daa maŋ yige amo be kekama n lɛ.

²⁵ E ka sibɛ amo n loge nɛ e ya kaŋɛ bɔrɛmatapoana nɛ baa sulɔ Enyɛnpe Ebɔrɛ be kɔnɔkoŋwule be ŋkre be deka na le:

²⁶ “Men sɔ Ebɔrɛ be mbra be kawɔl ere n nase m mata Enyɛnpe menyi be Ebɔrɛ na be kɔnɔkoŋwule be ŋkre be deka na. K beeŋ baa wɔtɔ ndoŋ a ji shɛda fanɛ men nyi kusɔ nɛ Enyɛnpe Ebɔrɛ na bee sha fanɛ men baa wora.

²⁷ N nyi kananɛ bumo be amu nɛ ŋgbene du kpakpa. Jemanɛ nɛ n wɔ bumo to gba, b lar Enyɛnpe Ebɔrɛ na kaman. Ma luwu be kaman bre baaŋ wora kumo nɛ k chɔ loŋ.

²⁸ Amoso, shin nɛ Israɛl be eyiriana na be bejuŋkparpoana nɛ benimuana na e shɛr nɛ ŋ kaŋɛ bumo asheŋ ere nseŋ ta esoso nɛ kasawule ŋ ki eshɛdajipo fanɛ men kikɛ tea nyi kusɔ nɛ k daga fanɛ men baa wora.

²⁹ Ade be kaman n nyi fanɛ ma luwu be kaman, basa na be amu beeŋ ki kpakpa nɛ b kini kusɔ nɛ ŋ ŋini bumo ere n lɛ nseŋ kini kewora Enyɛnpe Ebɔrɛ na kasonu. Kumo be loŋ malɛ beeŋ shin nɛ Enyɛnpe Ebɔrɛ na e nya agbo n wora bumo n shin nɛ kumu lubi gboŋgboŋi e ba bumo so.”

Mosis be kashɛ be asheŋ

³⁰ Ade kikɛ be kaman, nɛ Mosis kute kusɔ nɛ kashɛ na bee kaŋɛ kikɛ n sa Israɛl be basa nɛ b shɛr ndoŋ na kikɛ nɛ b nu.