Ditɛronɔmi 30 - EBƆRƐ BE KAWƆL

Kenaŋ bɛta m ba Enyɛnpe Ebɔrɛ na kutɔ be asheŋ

¹ “Naniere n ta nɛfa nɛ shoduu nna a nase menyi be anishito nɛ men keni to n lara kumo nɛ menyee sha. Nɛ asheŋ ere kikɛ kaŋ wora menyi nɛ k ba fanɛ men pesaŋ to n ya kaa wɔ efuli pɔtɛana so, menyeeŋ nyiŋi ekpa nɛ m bugi n sa menyi nɛ men keni to n lara kumo nɛ menyee sha na.

² Nɛ fanɛ menyi nɛ men be kaman to ebi beeŋ bɛta m ba Enyɛnpe Ebɔrɛ na kutɔ, nseŋ ta menyi be ŋgbene kikɛ n wora mbe mbraana nɛ n ta a sa menyi kabre ere kasonu,

³ kumo ere Enyɛnpe menyi be Ebɔrɛ na beeŋ wu menyi kuwɔr. Mo alɛ beeŋ naŋ bɛta menyi n shi efuliana nɛ e pesaŋ menyi to n yɔ na so m ba nseŋ shin nɛ men naŋ dii dama.

⁴ Hale nɛ men pesaŋ to n yɔ durnya be efuli kama nɛ k wɔ kufɔ kufɔ gba, Enyɛnpe menyi be Ebɔrɛ na beeŋ naŋ gama menyi abar so m bɛta menyi m ba;

⁵ saŋɛ na so, menyeeŋ naŋ ba sɔ kasawule nɛ men nananyɛnana daŋ chena so nɛ k la men be kapetɛ na n chena so. Enyɛnpe Ebɔrɛ na malɛ beeŋ shin nɛ men dii dama nseŋ naŋ wora keshi a chɔ kananɛ men nananyɛnana daa sa na.

⁶ Ade be kaman, Enyɛnpe menyi be Ebɔrɛ na beeŋ sa menyi nɛ men be kaman to ebi ŋgbene nɛ a kɔ kasonu; saŋɛ na so, menyeeŋ tiŋ n sha mo nɛ menyi be ŋgbene kikɛ nseŋ naŋ chena kasawule na so.

⁷ Mo alɛ beeŋ laŋɛ eshoduu ere kikɛ n deŋi men doŋana nɛ b kishi menyi nseŋ mɛaŋ menyi na so.

⁸ Menyi alɛ beeŋ wora mo kasonu nsaa bɛ mbe mbraana nɛ n ta a sa menyi kabre ere so.

⁹ Kumo be kaman, Enyɛnpe menyi be Ebɔrɛ na beeŋ shin nɛ men nya mbia nɛ asɔbɔya damta nseŋ naŋ shin nɛ menyi be adɔjibi e wora ga. Kananɛ e daŋ fuli kagbene n shin nɛ asheŋ nite nɛnɛ n sa men nananyɛnana na, aloŋ nɛ e beeŋ fuli kagbene n shin nɛ asheŋ e nite nɛnɛ n sa menyi alɛ gba.

¹⁰ Ama a daga fanɛ men ka wora mo kasonu nsaa bɛ mbe mbraana nɛ a wɔ mbra be kawɔl to na so. A daga men ka ta menyi be ŋgbene kikɛ m bɛta m ba mo kutɔ.

¹¹ Kusɔ nɛ mee kaŋɛ menyi kenishipere so kabre ere maŋ du kpakpa ga nɛ menyi maaŋ tiŋ n wora kumo kasonu.”

¹² Enyɛnpe Ebɔrɛ na be mbraana na maŋ wɔ ebɔrɛso nna nɛ men bishi le: “Wanɛ e naaŋ dii n yɔ esoso n ya sɔ amo ŋ gbelge to m ba sa anyi nɛ an nu amo nseŋ wora amo kasonu?”

¹³ Amo alɛ maŋ naa wɔ teku be kaba ndoŋ nna nɛ men naŋ bishi fanɛ: “Wanɛ e naaŋ yɔ teku be kaba ndoŋ n ya bar amo m ba sa anyi nɛ an nu amo nseŋ wora amo kasonu?”

¹⁴ Ayai, mbraana na wɔ menyi kutɔ nna. Menyeeŋ tiŋ ŋ koya amo m pin amo a kute amo to. Amoso men baa wora amo kasonu naniere.

¹⁵ “Kelela nɛ ŋkpa ŋko kulubi nɛ luwu nɛ mee ta a nase menyi be anishito kabre na, nɛ men keni to n lara kumo nɛ menyee sha.

¹⁶ Nɛ menyeeŋ wora Enyɛnpe, menyi be Ebɔrɛ na be mbraana kasonu nseŋ sha mo bre, menyeeŋ dii dama nsaa la efuli nɛ kumo be basa shi. Enyɛnpe menyi be Ebɔrɛ na malɛ beeŋ nɛfa menyi ashi kasawule nɛ menyee yɔ nɛ men ya sɔ n chena so na so.

¹⁷ Ama nɛ men kini nseŋ wora kusoe kpakpaso nseŋ n ya kaa shuŋ agbir bre,

¹⁸ menyeeŋ mur. Mee kpla menyi kusoe naniere nna. Nɛ mannɛ aloŋ, men maaŋ chena kasawule nɛ menyee yɔ nɛ men ya sɔ n chena so ashi Jɔɔdan be lɔr na be kaba ndoŋ so na n chɛr.

¹⁹ Ade kikɛ be kaman, luwu nɛ ŋkpa nɛ Ebɔrɛ be nɛfa nɛ mbe eshoduu nɛ n ta a nase menyi be anishito na. Ma alɛ bee ta ebɔrɛso nɛ kasawule so nna fanɛ a ji shɛda n sa amo be kumo nɛ menyeeŋ lara. Men lara ŋkpa, saŋɛ na so, menyi nɛ men be mbia beeŋ baa wɔ ŋkpa to.

²⁰ Men baa sha Enyɛnpe menyi be Ebɔrɛ na a wora mo kasonu nsaa ji kashenteŋ a sa mo nɛ menyi nɛ men be kaman to ebi e chena kasawule nɛ e nase kumo be kɔnɔ n sa men nananyɛnana, Eebraham nɛ Aizek nɛ Jeekɔb, na so n chɛr.”