Ditɛronɔmi 3 - EBƆRƐ BE KAWƆL

Israɛl be basa ka kɔ m pɔɔ Ewura Ɔg so be asheŋ

¹ Kumo be kaman, nɛ an kilgi n sɔ kelargato be esoso be kaba so a yɔ Bashan be efuli so, nɛ Ewura Ɔg nɛ mbe benapo lar m ba nɛ b ba kɔ anyi ashi kade nɛ baa tre Edrei na.

² Nɛ Enyɛnpe Ebɔrɛ na kaŋɛ ma le: “Mosis, men sa maa ŋana mo. Meeŋ chɛ menyi to nɛ men kɔ m pɔɔ Ewura Ɔg nɛ mbe benapo so n suge bumo be kasawule. Men mur mo nɛ mbe basa kikɛ fanɛ kananɛ men wora Amɔriebi be ewura, Sihɔn, nɛ e daa ji kuwura ashi Hɛshbɔn na.”

³ Ndoŋ nna nɛ Enyɛnpe Ebɔrɛ na shin nɛ an kɔ m pɔɔ Ewura Ɔg nɛ mbe basa so nseŋ mɔ bumo kikɛ.

⁴ An daŋ suge mbe nde kikɛ. Kukoŋwule gba daa maŋ ka nɛ anyi maŋ suge kumo. Nde adeshe nɛ an daŋ kɔ n sɔ ashi efuli nɛ baa tre Agob nɛ Ewura Ɔg daŋ chena Bashan a ji kumo so be kuwura na.

⁵ B daŋ pɔr egbalana nna n wɔtɔ amo mbunagboŋ nɛ abersobi ŋ kulti nde na kikɛ n wɔtɔ. Ndewurbi damta nɛ b maŋ pɔr egbalana ŋ kulti amo gba daa wɔ efuli na so nna.

⁶ Nɛ an daŋ mur ndeana na kikɛ nseŋ mɔ benyɛn nɛ beche nɛ mbia na kikɛ fanɛ kananɛ an wora Ewura Sihɔn be ndeana na.

⁷ An daŋ ta asɔbɔya na nna nseŋ sensaŋ ndeana na to n ta asɔ lela na kikɛ.

⁸ “Kasawule nɛ k dese Lɔr nɛ baa tre Jɔɔdan na be epeŋilarkpa be kaba so na nɛ an daŋ suge ashi Amɔriebi be bewura anyɔ na kutɔ. Bumo be nsawule daŋ yili lɔr nɛ baa tre Aanɔn nɛ k wɔ kelargato be kaseto na nna n ya fo kebeegboŋ nɛ baa tre Hɛɛmɔn nɛ k wɔ kelargato be esoso na ase na nna.

⁹ (Hɛɛmɔn be kebeegboŋ ere nɛ Sidɔnebi bee tre Siriyɔn nɛ Amɔriebi malɛ bee tre kumo Senir.)

¹⁰ Ewura Ɔg be nde nɛ a wɔ kepreŋsawule so na kikɛ nɛ amo nɛ a wɔ Giliad nɛ Bashan be efuli so kikɛ hale n ya fo nde nɛ a wɔ nde nɛ baa tre Saleka nɛ Edrei na be epeŋilarkpa be kaba so na kikɛ nɛ an daŋ kɔ n suge.”

¹¹ (Ewura Ɔg e daŋ ka edimɛdi be yiri nɛ baa tre Refaebi na be esa lalalogesopo. Kejembu nɛ b daŋ ta n lɔŋɛ deka nɛ b ta m puli mo na. Kumo be nteŋ daa sa fanɛ ayadra kuduana nɛ kumo be mparto malɛ daa sa fanɛ ayadra ashe, nɛ esa kraa beeŋ wu kumo ashi Ammɔnebi be kadegboŋ nɛ baa tre Rabba na to.)

Eyiri nɛ b chena Jɔɔdan be lɔr na be epeŋilarkpa be kaba so na be asheŋ

¹² An ka sɔ kasawule na n loge na, nɛ n chige kumo be kaba nɛ k dese kade nɛ baa tre Arowa be kelargato be esoso be kaba so nɛ k mata Aanɔn be lɔr na ase na nɛ Giliad be kepreŋsawule na be kaba, n ta kumo so be ndeana n ti so n sa Ruben nɛ Gad be eyiri to ebi.

¹³ Kumo be kaman, nɛ n ta Giliad be kaba nɛ k ka na nɛ Bashan be kasawule kikɛ, kakpa nɛ Ewura Ɔg chena e ji kuwura na, kumo e la Agob be efuli so be kebonfugboŋ na kikɛ na n sa Manase be yiri na be bargato. (Bashan daa la kakpa nɛ baa tre Refaebi be kasawule nna).

¹⁴ Ndoŋ nna nɛ kanyɛn nɛ baa tre Jaiya nɛ e shi Manase be yiri to na malɛ ta Agob be efuli so be kebonfugboŋ be kasawule na kikɛ, yili Bashan hale n ya lar Gɛshɔr nɛ Maaka be basa be egbaŋ to. (Jaiya daŋ ta mbe ketre nna n nase ndewurbi na kikɛ, hale nɛ mbre baa tre amo Jaiya be ndewurbi nna.)

¹⁵ Ade be kaman, nɛ n chige Giliad be kasawule n sa kanyɛn nɛ baa tre Makiir nɛ e shi Manase be yiri to na be kabuna ebi.

¹⁶ Nseŋ ta kasawule nɛ k dese yili Giliad n ya fo Aanɔn be lɔr ase na n sa Ruben nɛ Gad be eyiri to ebi. Aanɔn be lɔr na e daa la bumo be kelargato be kaseto be egbaŋ nɛ Jabbɔk be lɔr na malɛ daa la bumo be kelargato be esoso be egbaŋ nɛ kumo be kaba ya lar bumo nɛ Ammɔnebi be egbaŋ to.

¹⁷ Bumo be kasawule na be epeŋitɔrkpa be kaba so dese loŋ n ya fo Jɔɔdan be lɔr na, nseŋ yili Galili be kepagboŋ na ase ashi kelargato be esoso be kaba so ŋ gbelge to n ya fo Teku Wuso na ashi kelargato be kaseto be kaba so hale n ya fo kebeegboŋ nɛ baa tre Pisga na ashi epeŋilarkpa be kaba so.

¹⁸ Loŋ be jemanɛ na gbagba nɛ n ta mbraana ere n sa Ruben nɛ Gad be eyiri nɛ Manase be yiri be bargato nɛ b wɔ epeŋilarkpa be kaba so na: “Enyɛnpe anyi be Ebɔrɛ na e sa menyi kasawule nɛ k dese Jɔɔdan be epeŋilarkpa be kaba so ere. Men bela menyi be benapo ase nɛ b tu Israɛl be eyiri nɛ a ka na n dii Jɔɔdan be lɔrgboŋ na n ya chɛ bumo to ŋ kɔ n sɔ kasawule na n chena so.

¹⁹ Menyi be beche nɛ mbia nɛ asɔbɔya damta na nawule a daga fanɛ b shir kaman ashi nde nɛ n chige n sa menyi na to.

²⁰ Enyɛnpe Ebɔrɛ na beeŋ chɛ bumo alɛ gba to nɛ b kɔ m pɔɔ bedoŋ be efuliana nɛ a wɔ Jɔɔdan be epeŋitɔrkpa be kaba so na so nseŋ suge bumo be nsawule n chena so. Kumo be kaman, nɛ men bɛta m ba kasawule nɛ n chige sa menyi ere so.”

²¹ Kede be kaman nɛ ŋ kaŋɛ Joshuwa le: “Fo wu kusɔ nɛ Enyɛnpe Ebɔrɛ na wora Ewura Sihɔn nɛ Ewura Ɔg na nna na. Aloŋ nɛ e beeŋ wora ekama nɛ menyeeŋ ya kɔ ashi kasawule nɛ k wɔ lɔr be kaba ndoŋ na so.

²² Amoso, men sa maa ŋana bumo, ŋkpal manɛ so, Enyɛnpe menyi be Ebɔrɛ na beeŋ chɛ menyi to ŋ kɔ bumo.”

Mosis ka maŋ nya ekpa n luri Keenan be asheŋ

²³ Loŋ be jemanɛ na nɛ n daŋ kule Ebɔrɛ kenishipere so ŋ kaŋɛ le:

²⁴ “Enyɛnpetale Ebɔrɛ, n nyi fanɛ asheŋgboŋ nɛ emamachisheŋ nɛ fee sha kewora na nɛ fo fara ŋ ŋini ma na. Ebɔrɛ kikɛ maŋ naa wɔ ebɔrɛso ŋko kasawule so nɛ e beeŋ tiŋ n wora asheŋgboŋ nɛ fo wora ere!

²⁵ Jande, Enyɛnpe Ebɔrɛ, shin nɛ ma alɛ gba e dii Jɔɔdan be lɔr na n ya wu kasawule lela nɛ k dese kaba ndoŋ na; kumo e la kepreŋsawule lela na, nɛ Lebanɔn be abeegboŋ na.”

²⁶ Ama ŋkpal menyi basa ere so, Enyɛnpe Ebɔrɛ na daŋ nya agbo nna n wɔtɔ ma nsaa maŋ nu ma kekule. Kusɔ nɛ e kaŋɛ e la: “A kukwe loŋ! Sa maŋ naŋ malga le be kamalga ere n sa ma kikɛ!

²⁷ Dii n yɔ Pisga be kebeegboŋ na be awɔlto n ya to kenishi ŋ keni ŋ kulti. Keni kusɔ nɛ feeŋ wu kenishiso kikɛ nɛnɛ, ŋkpal manɛ so, fo maaŋ dii Jɔɔdan be lɔr na be kaba ndoŋ.

²⁸ Ta mbraana ere n sa Joshuwa. Leŋ mo to nɛ e nya kagbene nɛ kenyɛn, ŋkpal manɛ so, mo e naaŋ juŋkpar basa na nɛ b dii lɔr na n ya chena kasawule nɛ fo wu na so.”

²⁹ Kede be kaman, nɛ an kilgi a wɔ ketaŋɛ nɛ k dese n shoŋi kade nɛ baa tre Bɛf Piyɔɔ na to.