Ditɛronɔmi 28 - EBƆRƐ BE KAWƆL

Enɛfa nɛ a wɔ kasonu to be asheŋ

¹ Nɛ Mosis naŋ kaŋɛ Israɛl be basa na le: Nɛ fanɛ menyeeŋ wora Enyɛnpe menyi be Ebɔrɛ na kasonu nseŋ bɛ mbe mbraana nɛ n ta a sa menyi kabre ere so kashenteŋto, e beeŋ shin nɛ men ki efuligboŋ nsaa kɔ eleŋ ga a chɔ efuliana nɛ a ka a wɔ durnya to na kikɛ.

² Men baa wora Enyɛnpe menyi be Ebɔrɛ na kasonu nseŋ nya enɛfa ere.

³ Enyɛnpe Ebɔrɛ na beeŋ nɛfa menyi be ndeana nɛ adɔsawule.

⁴ Enyɛnpe Ebɔrɛ na beeŋ nɛfa menyi nɛ men nya mbia nɛ adɔjibi nɛ ana nɛ mbolpɔ damta.

⁵ Enyɛnpe Ebɔrɛ na beeŋ nɛfa menyi be adɔjibi nɛ ajibi kama nɛ menyeeŋ ta amo n wora n ji kikɛ.

⁶ Enyɛnpe Ebɔrɛ na beeŋ nɛfa kusɔ kama nɛ menyeeŋ wora kikɛ.

⁷ “Enyɛnpe Ebɔrɛ na beeŋ chɛ to ŋ kɔ m pɔɔ men doŋana so. Baaŋ mel abar m bɔla kaboŋ koŋwule m ba menyi so, ama baaŋ pesaŋ to m bɔla mboŋ damta so m bɛta n shile.

⁸ Enyɛnpe Ebɔrɛ na beeŋ nɛfa menyi be ashuŋ nseŋ shin nɛ menyi be mpuro e bɔlɔ ayu ashi kasawule nɛ e ta a sa menyi ere so.

⁹ Nɛ menyeeŋ wora Enyɛnpe menyi be Ebɔrɛ na kasonu nseŋ wora kusɔ kama nɛ e kaŋɛ menyi, e beeŋ shin nɛ men baa kraa la mo gbagba be basa fanɛ kananɛ e nase kumo be kɔnɔ na.

¹⁰ Saŋɛ na so, durnya be basa kikɛ beeŋ wu fanɛ Enyɛnpe Ebɔrɛ na e lara menyi nɛ men baa la mbe basa. Bumo alɛ beeŋ baa ŋana menyi.

¹¹ Enyɛnpe Ebɔrɛ na beeŋ sa menyi mbia nɛ asɔbɔya nɛ adɔjibi damta ashi kasawule nɛ e nase kumo be kɔnɔ n sa menyi nananyɛnana na so.

¹² Mo koŋwule na beeŋ bugi ebɔrɛso be mbuna n shin nɛ bɔrɛ e ba menyi jemanɛ nɛ k daga nseŋ nɛfa menyi be ashuŋ. Saŋɛ na so, efuli damtaana be basa beeŋ baa ba menyi kutɔ m ba ka paŋ menyi amansherbi ama menyi ere maaŋ yɔ efuli kikɛ so n ya paŋ shɛŋ.

¹³ Nɛ menyeeŋ baa wora Enyɛnpe menyi be Ebɔrɛ na kasonu nsaa bɛ mbe mbraana nɛ n ta a sa menyi kabre ere kikɛ so kashenteŋto, e beeŋ shin nɛ men ki bejuŋkparpo durnya be efuliana kikɛ to.

¹⁴ Ama men sa maŋ kaŋ kini kewora mbe mbra kama kasonu ekpa kama so. Menyi alɛ e sa maŋ kaŋ shuŋ agbir m bunyaŋ amo.”

Kusoe kpakpaso be kasogberge be asheŋ

¹⁵ Kede be kaman nɛ Mosis naŋ kaŋɛ: Ama nɛ men wora kusoe kpakpaso nsaa maŋ bɛ Enyɛnpe menyi be Ebɔrɛ na mbraana nɛ n ta a sa menyi kabre ere so kashenteŋto, le be asheŋ lubi ere kikɛ e naaŋ wora menyi.

¹⁶ Enyɛnpe Ebɔrɛ na be kɔnɔsho beeŋ ba menyi be ndeana nɛ adɔsawule so.

¹⁷ Enyɛnpe Ebɔrɛ na be kɔnɔsho beeŋ ba menyi be ayu nɛ ajibi kama nɛ menyeeŋ ta amo n wora n ji kikɛ so.

¹⁸ Enyɛnpe Ebɔrɛ na be kɔnɔsho beeŋ ba menyi nɛ menyi be mbia nɛ adɔjibi nɛ ana nɛ mbolpɔ so nɛ a maaŋ foo.

¹⁹ Enyɛnpe Ebɔrɛ na be kɔnɔsho beeŋ ba kusɔ kama nɛ menyeeŋ wora so.

²⁰ Nɛ fanɛ men kini Enyɛnpe Ebɔrɛ na nseŋ wora kulubi, e beeŋ shin nɛ kumu lubi gboŋgboŋi nɛ kebagato nɛ etɔrɔ e ba kusɔ kama nɛ menyeeŋ wora so nɛ men mur cheche.

²¹ Enyɛnpe Ebɔrɛ na malɛ beeŋ naŋ shin nɛ alɔ lubi e tɔr menyi so nɛ menyi maaŋ nya alenfia hale n ya fo fanɛ men kikɛ ka beeŋ mur ashi kasawule nɛ menyee yɔ nɛ men ya chena so na so.

²² E beeŋ shin nɛ alɔ nɛ a bee suse nɛ asɔ puŋiso nɛ kayurbeldɛ e tɔr menyi so. Kumo be kaman, e beeŋ shin nɛ ewule nɛ afu tushiso a ba mur menyi be adɔjibi kikɛ. Le be aleblawu ere beeŋ baa wɔ menyi so hale n ya fo fanɛ men kikɛ ka beeŋ wu m mur.

²³ Enyɛnpe Ebɔrɛ na beeŋ shin nɛ bɔrɛ maaŋ naŋ ba, nɛ kasawule a wɔl ŋ ki kpakpa fanɛ kebɛlso na

²⁴ nɛ afugboŋ nɛ shishɛrpumpuŋ e sɔ kaplɛkama n ya fo fanɛ men ka beeŋ mur cheche.

²⁵ Ade kikɛ be kaman, Enyɛnpe Ebɔrɛ na beeŋ shin nɛ men doŋana e pɔɔ menyi so. Menyeeŋ mel abar m bɔla kaboŋ koŋwule n ya kɔ bumo, ama menyeeŋ pesaŋ to m bɔla mboŋ damta n shile. Durnya to be basa kikɛ beeŋ nu kusɔ nɛ k wora menyi na be asheŋ nɛ kufu gboŋgboŋi a tɔr bumo so.

²⁶ Men kaŋ wu a dese, mbuibi nɛ kupuŋ to be asɔbɔya e naaŋ ji menyi nɛ esa kikɛ maaŋ baa wɔtɔ nɛ e ju bumo.

²⁷ Enyɛnpe Ebɔrɛ na beeŋ shin nɛ asɔ puŋiso e tɔr menyi so fanɛ kananɛ e daŋ wora Ijiptebi na. E beeŋ shin nɛ achuubɔbɔ e to n to menyi be eyurana so, nɛ ajijeli a pɛ menyi nɛ men baa wule eyur, ama menyi alɛ maaŋ nya kechɛ kikɛ.

²⁸ Enyɛnpe Ebɔrɛ na beeŋ shin nɛ eboŋ e tɔr menyi so nseŋ naŋ shin nɛ men tan. E beeŋ shin nɛ men be nfɛra e wea to nɛ men maaŋ naa fɛ nfɛra niŋi so.

²⁹ E beeŋ shin nɛ men baa nite a laa a laa kapiidi fanɛ etanpo na a maa wu ekpa a nite. Ade kikɛ be kaman, kusɔ kama nɛ menyeeŋ baa wora maaŋ nyalɛ n sa menyi. Basa pɔtɛ beeŋ ba kaa mɛaŋ menyi nsaa yuri menyi be asɔ nɛ esa kikɛ maaŋ baa wɔtɔ nɛ e chɛ menyi to.

³⁰ Menyi to be eko beeŋ ji eche be kesha nsaa sha keta mo, ama pɔɛŋ nɛ b wora kejafɔ, esa pɔtɛ e naaŋ pur eche na n jija mo. Beko beeŋ pɔr nwu, ama bumo alɛ maaŋ nya n chena amo to. Beko beeŋ dɔ ndibi sɔrso be adɔ, bumo alɛ maaŋ nya amo be asɔrso juŋkparso gba n ji.

³¹ Baaŋ mɔ menyi gbagba be ana m bɛ amo menyi be anishito, ama menyi alɛ maaŋ nya amo be eblaŋ n we. Basa pɔtɛ beeŋ ba kaa kpa menyi be ekurma nɛ mbolpɔ a yɔ nɛ men baa keni, ama esa kikɛ maaŋ baa wɔtɔ nɛ e tintiŋ bumo nɛ b bɛta asɔbɔya na m ba sa menyi.

³² Basa beeŋ ba pɛ menyi be mbia tintiŋ so n yɔ efuli pɔtɛ so nɛ men baa yil a keni, ama menyi alɛ maaŋ tiŋ n wora shɛŋ. Karechɛ kikɛ menyeeŋ baa mɛrge anishi a keni ekpa fanɛ menyi be mbia na beeŋ bɛta m ba hale nɛ menyi maaŋ naa wu nɛnɛ. Ama mbia na malɛ maaŋ naŋ bɛta m ba kikɛ.

³³ Efuli pɔtɛ so be basa beeŋ ba suge menyi be adɔjibi nɛ men gben n dɔ n nya na. Menyi maaŋ naŋ nya shɛŋ ama kɔrfɛ nɛ kamɛaŋ nawule.

³⁴ Awurfoŋ nɛ menyeeŋ ji na beeŋ shin nɛ men be nfɛra a wea to nɛ men baa wora asheŋ fanɛ basa nɛ baa lɔ eboŋ.

³⁵ Enyɛnpe Ebɔrɛ na malɛ beeŋ shin nɛ men be aya e ku atamɛ nɛ a bee besa ga, ama amo alɛ maaŋ nya kechɛ kikɛ. Achuubɔbɔ beeŋ to n to men be amu to n ya fo ayadra so.

³⁶ Ade malɛ kikɛ be kaman, Enyɛnpe Ebɔrɛ na beeŋ shin nɛ bedoŋ e pɛ menyi nɛ men be ewura tintiŋ so n yɔ efuli pɔtɛ so, kakpa nɛ menyi ŋko men nananyɛnana maŋ naŋ chena ŋ ku so na, nɛ men ya shuŋ agbirana nɛ b ta ndibi nɛ ajembu n lɔŋɛ.

³⁷ Men be asheŋ beeŋ chinchiŋ efuli kama nɛ Enyɛnpe Ebɔrɛ na beeŋ pesaŋ menyi to n yɔ na so be basa kikɛ, ŋkpal kusɔ nɛ k beeŋ wora menyi na so. Ama bumo alɛ kraa beeŋ wora menyi eyurto nseŋ mushe menyi.

³⁸ Menyeeŋ dɔ n duu asɔduuso damta, ama gbrɛbi nɛ menyeeŋ teŋi. Elotɔr e naaŋ baa ji men be adɔjibi.

³⁹ Menyeeŋ dɔ ndibi sɔrso be adɔ nseŋ keni amo so nɛnɛ, ama menyi alɛ maaŋ nya amo be asɔrso n chuge ŋko n nya amo be yabra belbelso n nuu. Kumo be kaman nɛ ashushombi e ji ndibi na gbagba.

⁴⁰ Ɔlifs be ndibi beeŋ kɔr kaplɛkama ashi efuli na so, ama menyi alɛ maaŋ nya ɔlifs be ŋku ŋ gbiti menyi be amu to. Ŋkpal manɛ so, amo be asɔrso beeŋ chuge n tɔr nɛ a maŋ naŋ daŋ.

⁴¹ Menyeeŋ kurge mbia damta, ama menyi alɛ beeŋ paŋ bumo. Ŋkpal manɛ so, bedoŋ beeŋ pɛ bumo anya ashi kena to n yɔ efuli pɔtɛana so.

⁴² Elotɔr beeŋ ba ji menyi be ndibi be afantaŋ nɛ asɔrso nɛ menyi be adɔjibi kikɛ m mur.

⁴³ Befɔ nɛ menyi nɛ bumo chena men be ndeana to na beeŋ dii dama n nya eleŋ ga, ama ketir e naaŋ pɛ menyi ere nɛ men be eleŋ e yɔɔ so.

⁴⁴ Befɔ na beeŋ nya amansherbi a paŋ menyi, ama menyi ere maaŋ nya shɛŋ m paŋ bumo. Kumo be lalaloge, baaŋ ba ji kuwura menyi so.

⁴⁵ Nɛ menyi Israɛlebi baŋ maŋ wora Enyɛnpe menyi be Ebɔrɛ na kasonu nseŋ bɛ mbe mbraana nɛ e ta a sa menyi ere so, e beeŋ shin nɛ nnɔsho ere a ba menyi so m mur menyi.

⁴⁶ Saŋɛ na so, nɛ ekama e wu menyi nɛ men be kaman to ebi nseŋ pin fanɛ Enyɛnpe Ebɔrɛ na be kɔnɔsho e pɛ menyi.

⁴⁷ Enyɛnpe Ebɔrɛ na bre nɛfa menyi ekpa kama so, ama ŋkpal men ka kini keshuŋ mo kagbene koŋwule so n ta kemaŋkura n sa mo na so,

⁴⁸ e beeŋ shuŋi bedoŋ menyi kutɔ nɛ men shuŋ bumo nɛ ketir e pɛ menyi nɛ men maaŋ nya ajibi n ji ŋko nchu n nuu ŋko asɔbuuso gba m buu. Men doŋana na beeŋ kɔrfɛ menyi hale n ya mur menyi.

⁴⁹ Enyɛnpe Ebɔrɛ na beeŋ shin nɛ efuli pɔtɛ be basa nɛ men maa nu bumo be ŋgbar e shi kufɔ kufɔ ŋ kre kena m ba purgi menyi fanɛ kusore ka ta koshi na.

⁵⁰ B maaŋ baa kɔ kushuso n sa ekama ŋko kuwɔrwu n sa enimu ŋko kebia.

⁵¹ Baaŋ suge menyi be asɔbɔya nɛ adɔjibi kikɛ nɛ akoŋ a mɔ menyi. B maaŋ yige ayu ŋko yabra belbelso ŋko ɔlifs be ŋku ŋko ana ŋko mbolpɔ kama n sa menyi.

⁵² Bumo alɛ beeŋ kre kena m ba kulti kade kama nɛ k wɔ kasawule nɛ Enyɛnpe, menyi be Ebɔrɛ na ta a sa menyi ere n wɔtɔ. Baaŋ bure egbal lempo jeŋgreŋana nɛ menyeeŋ pɔr ŋ kulti men be ndeana n ta men be yirda n deŋi amo so na.

⁵³ Jemanɛ nɛ men doŋana beeŋ kre kena m ba kulti menyi be ndeana n wɔtɔ na, ajibi be asheŋ beeŋ ki kpakpa n sa menyi nɛ men baa yɛla kenishi to a fin ajibi hale n ya kaa pɛ mbia nɛ Enyɛnpe menyi be Ebɔrɛ na sa menyi na a we.

^54-55 Jemanɛ na kaŋ fo, menyi to be enyɛn kama nɛ e du boeŋ nsaa la esa gba beeŋ ba kaa yɛla kenishi to a fin ajibi hale n ya pɛ mbe mbia ko n we ŋkpal e ka maŋ nya ajibi nɛ e ji so. E maaŋ sa mo niopibi ŋko mbe eche nɛ e bee sha ga ŋko mbe mbia nɛ b ka na gba be ekama, kebia nɛ e mɔ a we na be eblaŋ na be ako.

^56-57 Loŋ be jemanɛ na, menyi to be eche nɛ e du boeŋ nsaa la damawura nɛ e maŋ naŋ lar n nite aya so n yɔ kaboŋ ko ŋ ku so gba beeŋ ba kaa yɛla kenishi to a fin ajibi, hale n ya ŋana n ta mbe kebia popɔrbi nɛ kekurgesha kikɛ n we. E maaŋ sa mo kul nɛ e bee sha ga na gba ŋko mbe mbia nɛ b ka na be ekama.

⁵⁸ Nɛ men kini kewora Ebɔrɛ be mbraana nɛ b sibɛ n wɔtɔ kawɔl ere to ere kasonu kashenteŋto nseŋ kini kesa Enyɛnpe menyi be Ebɔrɛ na be ketre nɛ k kɔ kemaŋkura na bunyaŋ,

⁵⁹ kumo ere e beeŋ shin nɛ alɔ nɛ e maŋ kɔ kechɛ nɛ alɔ lubi nɛ a bee suse manaŋ manaŋ na e ba menyi nɛ men be kaman to ebi so.

⁶⁰ Mo alɛ beeŋ naŋ shin nɛ alɔ lubi nɛ men daŋ wu ashi Ijipt be efuli so na e ba menyi so nɛ men maaŋ nya amo be kechɛ.

⁶¹ Ade kikɛ be kaman, mo alɛ beeŋ naŋ shin nɛ alɔ be yiri yiri nɛ a bee suse manaŋ manaŋ nsaa maŋ wɔ Ebɔrɛ be mbra be kawɔl ere to gba a ba mur menyi.

⁶² Kananɛ men wora keshi a du fanɛ achɛkpabi ka wɔ awɔlpa so ere, nɛ men kaŋ kini kewora Enyɛnpe menyi be Ebɔrɛ na kasonu, menyi to be basa gbrɛbi e naaŋ ka a wɔ ŋkpa to.

⁶³ Enyɛnpe Ebɔrɛ na fuli kagbene nna n shin nɛ asheŋ bee nite nɛnɛ a sa menyi nseŋ shin nɛ men wora keshi n ti so. Ama nɛ men kini kewora mo kasonu, kumo ere e maaŋ naŋ tiŋ n wora shɛŋ, ama kemur menyi ashi kasawule nɛ menyee yɔ nɛ men ya chena so na.

⁶⁴ Enyɛnpe Ebɔrɛ na beeŋ shin nɛ men pesaŋ to n sɔ durnya to be efuliana kikɛ so n ya shuŋ agbirana nɛ b ta ndibi nɛ ajembu n lɔŋɛ nɛ menyi nɛ men nananyɛnana maŋ naŋ shuŋ ŋ ku so na.

⁶⁵ Menyi alɛ maaŋ nya kayurwushi kaplɛkama. Menyeeŋ baa yɛlga epe, ama menyi alɛ maaŋ tiŋ m bɛta n yɔ.

⁶⁶ Kapa nɛ kanyɛ menyeeŋ baa wɔ kufu gboŋgboŋi be kebaawɔtɔ to, a lɔ kufu fanɛ bedoŋ beeŋ mɔ menyi.

⁶⁷ Kusɔ kama nɛ menyeeŋ wu kenishi so beeŋ shin nɛ men be ŋgbene e baa ku menyi. Kachipurso kikɛ, le nɛ menyeeŋ baa kaŋɛ: “Kanyɛ daŋ biri gba, k bɔ!” Kanyɛ malɛ naŋ biri nɛ men naŋ kaŋɛ le: “Kare daŋ chɛ gba, k bɔ!”

⁶⁸ N daŋ kaŋɛ menyi fanɛ men sa maŋ kaŋ bɛta n yɔ Ijipt be efuli so. Ama naniere Enyɛnpe Ebɔrɛ na gbagba beeŋ bɛta menyi n wɔtɔ nchu so be ekuloŋgboŋ to n yɔ Ijipt, nɛ men ya kaa sha kefa menyi be amu fanɛ anya nɛ esa kikɛ maaŋ tɔ menyi ndoŋ.