Ditɛronɔmi 27 - EBƆRƐ BE KAWƆL

Ebal be kebee so be bɔrɛsure na be asheŋ

¹ Ndoŋ nna nɛ Mosis nɛ Israɛl be bejuŋkparpoana na kikɛ ba yili Israɛl be basa be anishito nɛ e kaŋɛ bumo le: “Men baa wora mbraana nɛ mee ta a sa menyi kabre ere kikɛ kasonu.

² Kachɛ nɛ menyi beeŋ dii lɔr nɛ baa tre Jɔɔdan na n yɔ kasawule nɛ Enyɛnpe menyi be Ebɔrɛ na bee ta a sa menyi ere so, menyeeŋ ta ajembu gboŋgboŋi n yuu nseŋ baga eshishɛr n la amo.

³ Kumo be kaman nɛ men sibɛ mbraana ere kikɛ n deŋi amo so. Nɛ men kaŋ yɔ kasawule lela nɛ k bee wora adɔjibi ga nɛ Enyɛnpe, men nananyɛnana be Ebɔrɛ na nase kumo be kɔnɔ n sa menyi na so

⁴ nseŋ ya kaa wɔ Jɔɔdan be lɔr na be kaba ndoŋ, menyeeŋ yuu ajembu ashi kebee nɛ ba tre Ebal na so kananɛ mee kaŋɛ menyi ere nseŋ baga eshishɛr n la amo.

⁵ Loŋ be kakpa ere gbagba nɛ menyeeŋ ta ajembu nɛ b maŋ ta abɛlso be ashuŋsɔ n shɛl m pɔr bɔrɛsure nɛ menyeeŋ baa lara esarga kumo so a sa Enyɛnpe menyi be Ebɔrɛ na.

⁶ Ŋkpal manɛ so, ajembu nɛ b maŋ shɛl a daga fanɛ men baa ta a pɔr ebɔrɛsure a sa Enyɛnpe menyi be Ebɔrɛ na, nsaa lara esarga chɔɔso

⁷ nɛ kɔnɔkoŋwule nɛ kapandi be esarga, nsaa ji amo kagbenefuliso ashi Enyɛnpe menyi be Ebɔrɛ na be anishito a bunyaŋ mo nsaa kule mo enɛfa.

⁸ Menyi alɛ e sa maŋ teŋ so fanɛ menyeeŋ sibɛ Ebɔrɛ be mbraana ere kikɛ n deŋi ajembu nɛ menyeeŋ yuu nseŋ baga eshishɛr n la amo na so. Saŋɛ na so ekama beeŋ tiŋ a wu amo a kraŋ.”

⁹ Kumo be kaman nɛ Mosis nɛ bɔrɛmatapoana nɛ b shi Livai be yiri to na naŋ kaŋɛ Israɛl be basa na le: “Israɛl be basa, men nu ŋ kutɔ nfe. Kabre anyi bee nyiŋi menyi nna fanɛ men la Enyɛnpe menyi be Ebɔrɛ na be basa nna,

¹⁰ amoso men baa wora mo kasonu nsaa bɛ mbe mbraana nɛ n ta a sa menyi kabre ere kikɛ so.”

Eshoduu nɛ a wɔ kusoe kpakpaso to be asheŋ

¹¹ Ade kikɛ be kaman nɛ Mosis naŋ kaŋɛ Israɛl be basa na le:

¹² Men kaŋ dii Jɔɔdan be lɔr na n loge, Simɔn nɛ Livai nɛ Juda nɛ Issaka nɛ Efreim nɛ Manase nɛ Bɛnjamin be eyiri to be basa e naŋ yili kebee nɛ baa tre Gɛrizim na so ŋ kaŋɛ Israɛlebi kikɛ enɛfa nɛ a wɔtɔ be asheŋ,

¹³ nɛ Ruben nɛ Gad nɛ Ashɛr nɛ Zebulun nɛ Dan nɛ Naftali be eyiri to be basa malɛ e yili kebee nɛ baa tre Ebal na so ŋ kaŋɛ bumo eshoduu nɛ a wɔtɔ be asheŋ.

¹⁴ Kumo be kaman nɛ Livai be yiri to be basa na e baa ponte awɔrso a kaŋɛ eshoduu na kukoko to le:

¹⁵ Ebɔrɛ be kɔnɔsho beeŋ ba esa kama nɛ e beeŋ ta kejembu ŋko kedibi ŋko kebɛlso n lɔŋɛ kegbir a shuŋ ashiri to so. Ŋkpal manɛ so, Enyɛnpe Ebɔrɛ na kishi kagbirshuŋ ga. Nɛ basa nɛ b yil Ebal be kebee so na kikɛ e shuli so le: ‘Amɛn!’

¹⁶ Nɛ b naŋ kaŋɛ: “Ebɔrɛ be kɔnɔsho beeŋ ba esa kama nɛ e beeŋ ŋaba mo tuto ŋko mo nio so.” Nɛ basa nɛ b yil Ebal be kebee so na kikɛ shuliso le: ‘Amɛn!’

¹⁷ Nɛ b naŋ kaŋɛ: “Ebɔrɛ be kɔnɔsho beeŋ ba esa kama nɛ e beeŋ lɔŋɛ mo barkasa be kasawule be egbaŋ to be kejembu n yuu a fin kepuni mo so.” Nɛ basa nɛ b yil Ebal be kebee so na e kaŋɛ: ‘Amɛn!’

¹⁸ Nɛ b naŋ kaŋɛ: “Ebɔrɛ be kɔnɔsho beeŋ ba esa kama nɛ e beeŋ keta tanpo kekpabi n yɔ kakpa nɛ e maa sha keyɔ.” Nɛ basa nɛ b yil Ebal be kebee so na e kaŋɛ: ‘Amɛn!’

¹⁹ Nɛ b naŋ kaŋɛ, “Ebɔrɛ be kɔnɔsho beeŋ ba esa kama nɛ e beeŋ mɔn befɔ nɛ amunibi nɛ bekulpoche kashenteŋ na ŋkpal basa nɛ b la so.” Nɛ basa nɛ b yil Ebal be kebee so na e kaŋɛ: ‘Amɛn!’

²⁰ Nɛ b naŋ kaŋɛ: “Ebɔrɛ be kɔnɔsho beeŋ ba esa kama nɛ e beeŋ di mo tuto be beche to be ekama ŋ ŋaba mo na so.” Nɛ basa nɛ b yil Ebal be kebee so na e kaŋɛ: ‘Amɛn!’

²¹ Nɛ b naŋ kaŋɛ, “Ebɔrɛ be kɔnɔsho beeŋ ba esa kama nɛ e beeŋ di kusɔbɔya na so.” Nɛ basa nɛ b yil Ebal be kebee so na e kaŋɛ: ‘Amɛn!’

²² Nɛ b naŋ kaŋɛ: “Ebɔrɛ be kɔnɔsho beeŋ ba esa kama nɛ e beeŋ di mo sipoche ŋko mo nio mo chamana pibiche na so.” Nɛ basa nɛ b yil Ebal be kebee so na e kaŋɛ: ‘Amɛn!’

²³ Nɛ b naŋ kaŋɛ, “Ebɔrɛ be kɔnɔsho beeŋ ba esa kama nɛ e beeŋ di mo shache.” Nɛ basa nɛ b yil Ebal be kebee so na e kaŋɛ: ‘Amɛn!’

²⁴ Nɛ b naŋ kaŋɛ, “Ebɔrɛ be kɔnɔsho beeŋ ba esa kama nɛ e beeŋ ŋana m mɔ esa ashiri to na so.” Nɛ basa nɛ b yil Ebal be kebee so na e kaŋɛ: ‘Amɛn!’

²⁵ Nɛ b naŋ kaŋɛ, “Ebɔrɛ be kɔnɔsho beeŋ ba esa kama nɛ e beeŋ sɔ brɔbu nseŋ mɔ esa nɛ e maŋ wora shɛŋ na so.” Nɛ basa nɛ b yil Ebal be kebee so na e kaŋɛ: ‘Amɛn!’

²⁶ Nɛ b naŋ kaŋɛ: “Ebɔrɛ be kɔnɔsho beeŋ ba esa kama nɛ e maaŋ wora Ebɔrɛ be mbraana kikɛ kasonu na so.” Nɛ basa nɛ b yil Ebal be kebee so na e kaŋɛ: ‘Amɛn!’