Ditɛronɔmi 26 - EBƆRƐ BE KAWƆL

Sososo be adɔjibi nɛ kudu kudusopo be asheŋ

¹ Nɛ men kaŋ ya kɔ n sɔ kasawule nɛ Enyɛnpe menyi be Ebɔrɛ na ta a sa menyi na n chena so n loge,

² menyi to be ekama daga fanɛ e ta mbe sososo be adɔjibi nɛ e beeŋ teŋi na n wɔtɔ kelantaŋɛ to n yɔ kakpa nɛ Enyɛnpe menyi be Ebɔrɛ na lara n yili fanɛ men baa shuŋ mo na.

³ Men yɔ bɔrɛmatapo nɛ e wɔ kushuŋ to loŋ be jemanɛ na kutɔ n ya kaŋɛ mo le: “Kusɔ nɛ ŋ kɔ a chɔrɔ Enyɛnpe ma Ebɔrɛ a ŋini fanɛ n nya ekpa n luri kasawule nɛ e nase kumo be kɔnɔ n sa an nananyɛnana na dra dra na kikɛ na nna na.”

⁴ Saŋɛ na so bɔrɛmatapo na beeŋ sɔ kelantaŋɛ na mo kutɔ n ya yili Enyɛnpe menyi be Ebɔrɛ na be bɔrɛsure na ase.

⁵ Kumo be kaman nɛ esa nɛ e bar kakɛ na e kaŋɛ le ashi Enyɛnpe Ebɔrɛ na be anishito, “N nananyɛn daa la esa nɛ e shi Aremiya be efuli so nna. Mo alɛ daa maa kɔ mo kumu so be kowu nseŋ daŋ ta mbe kanaŋ n yɔ Ijipt be efuli so n ya chena ndoŋ. B ka daŋ yɔ ndoŋ nɛ b daa maŋ shi, ama b daŋ m ba ki efuligboŋ nɛ k kɔ eleŋ ga.

⁶ Kumo be kaman nɛ Ijiptebi na ba kaa nyaŋ anyi nɛ anyee shuŋ bumo fanɛ anya.

⁷ Ndoŋ nna nɛ an shu n fin Enyɛnpe an nananyɛnana be Ebɔrɛ na be kechɛto nɛ e nu anyi be kushu nseŋ wu awurfoŋ nɛ anyee ji nɛ kananɛ baa tɔrɔ anyi nɛ anyi be ŋgbenejija damta,

⁸ nseŋ bɔla mbe yuku nɛ mbe eleŋgboŋ na so ŋ kɔ n suge anyi ashi Ijiptebi be enɔ to. Emamachisheŋ nɛ alemaŋkarsheŋ nɛ asheŋ nɛ a bee keta kufu nɛ e daŋ wora nseŋ bɔla amo so m mɔlga anyi.

⁹ Kumo be kaman nɛ e bar anyi nfe m ba ta kasawule nɛ k walɛ nsaa kɔ eleŋ a wora adɔjibi ere n sa anyi.

¹⁰ Amoso nɛ ŋ kɔ ma sososo be adɔjibi nɛ Enyɛnpe Ebɔrɛ na sa ma na a ba nɛ m ba sa mo.” E kaŋ malga le n loge nɛ e murgi m bunyaŋ Enyɛnpe Ebɔrɛ na ndoŋ.

¹¹ Kede be kaman nɛ mo nɛ mbe kanaŋ nɛ Livai be yiri to ebi na, nɛ befɔ nɛ menyi nɛ bumo wɔtɔ na kikɛ e chɛ abar n di Enyɛnpe menyi be Ebɔrɛ na epaŋ nseŋ ji bumo be amu ndoŋ.

¹² Nfɛ nsa kikɛ be lalaloge, menyeeŋ ta menyi be adɔjibi be kudu kudusopo n sa Livai be yiri to ebi nɛ befɔ nɛ amunibi nɛ bekulpoche, saŋɛ na so, bumo alɛ gba beeŋ nya asɔ nɛ baa sha kikɛ n ji ashi menyi be echenakpaana. Nɛ men wora loŋ n loge nɛ

¹³ men kaŋɛ Enyɛnpe Ebɔrɛ na le: “An Nyɛnpe nɛ anyi be Ebɔrɛ, fo e kaŋɛ fanɛ anyi be adɔjibi be kudu kudusopo kikɛ la asɔ cheembi nna. N wora fo mbra kasonu nseŋ ta amo n sa Livai be yiri to ebi nɛ befɔ nɛ amunibi nɛ bekulpoche fanɛ kananɛ fo kaŋɛ na.

¹⁴ M maŋ ta amo be kekama n ji jemanɛ nɛ n daa wora keeli, ma alɛ daa maŋ lara amo be kekama kowu jemanɛ nɛ n daa maŋ walɛ so daŋkare be ekpa so gba na. Ade be kaman, m maŋ ta amo be kekama n nyina ebuni kikɛ. Ama kusɔ nɛ fo, Enyɛnpe Ebɔrɛ na kaŋɛ na gbagba nɛ n ta kudu kudusopo na n wora.

¹⁵ Amoso yili fo kakpa cheembi ashi ebɔrɛso n nɛfa fo basa Israɛlebi nɛ kasawule lela nɛ k kɔ eleŋ a wora adɔjibi nɛ fo ta n sa anyi na gba, fanɛ kananɛ fo nase kumo be kɔnɔ n sa an nanaana na.”

Enyɛnpe Ebɔrɛ na gbagba be basa be asheŋ

¹⁶ “Enyɛnpe menyi be Ebɔrɛ na bee kaŋɛ menyi kabre nna fanɛ men wora mbe mbraana ere kikɛ kasonu nseŋ ta menyi be ŋgbene kikɛ m bɛ amo so kashenteŋto.

¹⁷ Kabre, men shuli so fanɛ Enyɛnpe na e la menyi be Ebɔrɛ. Menyi alɛ bee nase kɔnɔ nna fanɛ menyeeŋ wora mbe mbraana kikɛ kasonu nseŋ bɛ kusɔ kama nɛ e kaŋɛ menyi so.

¹⁸ Ŋkpal loŋ so, Enyɛnpe Ebɔrɛ na gba sɔ menyi fanɛ mo gbagba be basa nɛ e bee sha ga kabre, fanɛ kananɛ e nase kɔnɔ na. Mo alɛ bee kaŋɛ menyi nna fanɛ men baa wora mbe mbraana kikɛ kasonu.

¹⁹ Enyɛnpe Ebɔrɛ na e to efuliana na kikɛ, ama e beeŋ shin nɛ men nya ketre, nɛ b kpaŋ nseŋ maŋkura menyi a chɔ amo kikɛ. Menyi alɛ beeŋ baa la Enyɛnpe menyi be Ebɔrɛ na be basa gbagba nna, fanɛ kananɛ e nase kɔnɔ na.”