Ditɛronɔmi 25 - EBƆRƐ BE KAWƆL

¹ Nɛ menyi to be benyɔ nya kesheŋ nseŋ yɛr kumo demujikpa nɛ b ji kumo nɛ eko ji m bri mo barkasa,

² nɛ emo nɛ e ji n tɔr na be kasogberge la fanɛ b kuya mo so nna, demujipo na beeŋ shin nɛ e dese epun so nɛ b kuya mbe kaman so. Achuchɔ nɛ baaŋ kuya mo so na beeŋ ba shi kulubi nɛ e wora na to nna.

³ Baaŋ tiŋ n kuya mo so fanɛ achuchɔ adena, ama a maŋ daga fanɛ a baa chɔ loŋ. Nɛ achuchɔ na chɔso loŋ, k beeŋ baa la ŋaba n sa mo ekama be anishito.

⁴ Men sa maa kre kena nɛ men kɔ a bri ayu be kɔnɔ so.

Kusɔ nɛ feeŋ wora n sa ekurgepo nɛ e wu be asheŋ

⁵ Nɛ beniopibi wɔtɔ abar so nɛ ekoŋwule wu nsaa maŋ kurge ebi, mbe ekulpoche na maŋ daga fanɛ e ya kil esa nɛ e maŋ shi mo kul na be kanaŋ to. Mo kul nɛ e wu na mo sipo ŋko mo da e daga fanɛ e ta mo a kil.

⁶ Sososo be ebinyɛn nɛ baaŋ kurge na beeŋ baa la emo nɛ e wu na pibinyɛn, saŋɛ na so mbe ketre maaŋ mur ashi Israɛl.

⁷ Ama nɛ fanɛ mo kul nɛ e wu na mo kurgepo kama maa sha keta mo a kil bre, ekulpoche na beeŋ yɔ kade be benimu kutɔ n ya kaŋɛ bumo le: “Ŋ kul e wu ŋ ka ma nɛ anyi alɛ maŋ kurge ebinyɛn nɛ e beeŋ shin nɛ mbe ketre maaŋ mur. Ŋ kul mo kurgepo malɛ kini keta ma ŋ kurge ebinyɛn.”

⁸ Kumo be kaman nɛ benimu na malɛ e tre esa nɛ e wu na mo kurgepo na m malga n sa mo. Nɛ e kraŋ kini keta ekulpoche na ŋ kil,

⁹ kumo ere ekulpoche na beeŋ yɔ mo kutɔ ashi kade be benimuana na be anishito n ya gbaŋ loŋ be ekurgepo na be kesebeta koŋwule, nseŋ tu echɔl n fɛa mbe anishito ŋ kaŋɛ le: “Kusɔ nɛ baa wora esa nɛ e kini kekurge kaman to ebi n sa mo kurgepo nna na.”

¹⁰ Yili loŋ be jemanɛ na a yɔ esa kama ashi Israɛl beeŋ baa wu mbe kanaŋ fanɛ esa nɛ b gbaŋ mbe kesebeta be kanaŋ.

Mbra pɔtɛ be asheŋ

¹¹ Nɛ benyɛn anyɔ bee bile nɛ ekoŋwule be eche ba chɛ mo kul to nseŋ to m pɛ enyɔsopo na be anyɛnsɔ to,

¹² men ku eche na be enɔ so. Men sa maŋ kaŋ wu mo kuwɔr kikɛ.

^13-14 Men sa maa puni basa ashi menyi be kasɔkarga to, a ta asɔ nɛ a kɔr abar to a karga asɔ a sa basa nɛ beko e baa nya a chɔ beko, ashi menyi be kasɔfa nɛ kasɔto to.

¹⁵ Men baa ta asɔ nɛ a daga a karga asɔ be egbɛ ŋko amo be kananɛ a sa, saŋɛ na so menyi beeŋ chena kasawule nɛ Enyɛnpe menyi be Ebɔrɛ na bee sa menyi na so n chɛr.

¹⁶ Ŋkpal manɛ so, Enyɛnpe Ebɔrɛ na kishi basa nɛ baa puni nsaa maa ji kashenteŋ nna.

Kemur Amalɛkebi kikɛ be asheŋ

¹⁷ Ade kikɛ be kaman nɛ Mosis naŋ kaŋɛ le: Men baa nyiŋi kusɔ nɛ Amalɛkebi na wora menyi jemanɛ nɛ men daŋ shi Ijipt be efuli so a ba na.

¹⁸ B daa maŋ ŋana Ebɔrɛ nseŋ daŋ kre kena m bɛ menyi so m ba kɔ menyi jemanɛ nɛ men daŋ gben a chul to na nseŋ mɔ menyi to be bumo nɛ b daŋ shir kaman na.

¹⁹ Amoso, nɛ Enyɛnpe menyi be Ebɔrɛ na kaŋ sa menyi kasawule na, nɛ men chena kumo so nɛ kayurwushi, a daga fanɛ men mur Amalɛkebi na kikɛ, saŋɛ na so, esa kama maaŋ naŋ nyiŋi bumo be asheŋ gba kuraa. Men sa maŋ kaa teŋ kesheŋ ere so kikɛ!