Ditɛronɔmi 22 - EBƆRƐ BE KAWƆL

¹ Nɛ fo wu fo barkasa Israɛl be esa be kena ŋko kubolpɔ ka foe n luri to a yɔ, sa maŋ kaŋ kplaŋ kumo so, ama fo pɛ kumo n ya sa esa nɛ e wɔ kumo na.

² Ama nɛ fanɛ esa nɛ e wɔ kumo na wɔ kakpa wɔfɔ nna ŋko fo maŋ nyi esa nɛ e wɔ kusɔbɔya na nna, kumo ere fo ta kumo n yɔ fo pe. Nɛ kusɔbɔyawura kaŋ baa kaa fin kumo nɛ fo ta n sa mo.

³ Nɛ fanɛ fo wu fo barkasa Israɛl be esa be kurma ŋko kusɔbuuso ŋko kusɔ be yiri kikɛ nɛ k foe, kusɔ nɛ k daga fo wora nna na.

⁴ Nɛ fanɛ fo barkasa Israɛl be esa be kena ŋko kurma tɔr a dese nsaa maa sha kekoso n yili nɛ fo tu mo, sa maŋ kaŋ kplaŋ mo so, chɛ mo to nɛ e ŋin kusɔbɔya na to n yili kumo be aya so.

⁵ Beche maŋ daga kewɔtɔ benyɛn be asɔbuuso. Benyɛn malɛ gba maŋ daga kewɔtɔ beche be asɔbuuso, ŋkpal manɛ so, Enyɛnpe menyi be Ebɔrɛ na kishi basa nɛ baa wora loŋ be asheŋ na nna.

⁶ Nɛ fanɛ fo wu kabuibi be kesha kedibi so ŋko kasawule so nɛ kabuibi na puu kumo be afule ŋko bibi popɔrbi so, sa maŋ kaŋ pɛ kabuibi na.

⁷ Feeŋ tiŋ m pɛ bibi na ama a daga fanɛ fo yige kabuibi na gbagba bre saŋɛ na so feeŋ chɛr kasawule so nseŋ dii kedama kebaawɔtɔ.

⁸ Nɛ fanɛ fo pɔr kowu popɔr, a daga fanɛ fo pɔr egbalshin kumo be kuchoŋi na so ŋ kulti, saŋɛ na so esa maaŋ shi kumo so n tɔr to n wu nɛ kumo be kulubi e bɛ fo.

⁹ Nɛ fo baŋ dɔ asɔrso nɛ baa tre greep na be ndibi be kudɔ, sa maŋ naŋ duu shɛŋ n wea amo to. Nɛ fo wora loŋ, fo maŋ naa kɔ ekpa nɛ fo ji kudɔ na to be kusɔ kikɛ. A daga fanɛ fo bar adɔjibi na kikɛ kakpa nɛ menyeeŋ baa shuŋ Ebɔrɛ na.

¹⁰ Men sa maŋ kaŋ ta kubɔ to be kebarga n deŋi gbolu nɛ kurma so nɛ amo anyɔ na kikɛ e baa gberge katekpa koŋwule a dɔ.

¹¹ Men sa maa buu asɔbuuso nɛ b ta asisawa be kechɛbi m ba kikɛ.

¹² Men baa ba ajolobi a chuge menyi be asɔbuuso be nnɔkar ana na kikɛ so.

Kakil to be kewora n da so be asheŋ

¹³ An ta fanɛ enyɛn ka ta kasuŋgurbia nɛ k maŋ chɛr nɛ e kaŋɛ fanɛ e maŋ naa sha eche na,

¹⁴ ŋkpal loŋ so ŋ ku efɛ n deŋi eche fanɛ e ka ta mo na e maŋ tu mo nɛ tumba.

¹⁵ Eche na mo kurgepoana beeŋ ta wajɛ nɛ enyɛn na nɛ eche na daŋ dese so bumo be kejafɔ achɛ nɛ ŋklaŋ gbiti kumo a ŋini fanɛ eche na maŋ nyi enyɛn nna pɔɛŋ nseŋ yɔ kakil to na n ya ŋini benimu nɛ baa ji demu na ashi demujikpa.

¹⁶ Nɛ eche na mo tuto e kaŋɛ benimu na le: “N ta m pibiche nna n sa kanyɛn ere, ama naniere e maŋ naa sha m pibiche,

¹⁷ nseŋ ku efɛ n deŋi mo a kaŋɛ fanɛ e maŋ kɔ tumba. Ama kusɔ nɛ k bee ŋini fanɛ eche na daa kɔ tumba nde. Men keni ŋklaŋ nɛ a daŋ gbiti wajɛchɛbi nɛ b daŋ dese so bumo be kejafɔ achɛ na!”

¹⁸ Nɛ kade be benimuana na e shin nɛ b pɛ enyɛn na ŋ kuya so.

¹⁹ Kumo be kaman nɛ b fa mo gbiti be ndarbi kalfa n sa eche na mo tuto, ŋkpal enyɛn na ka ŋaba Israɛl be esa pibiche so. Ama eche na kraa beeŋ baa la mbe eche, mo alɛ maŋ kɔ ekpa nɛ e tiŋ ŋ kini eche na kikɛ hale nɛ e ya wu.

²⁰ Ama nɛ fanɛ kusɔ nɛ enyɛn na kaŋɛ na la kashenteŋ nna nɛ shɛŋ malɛ maŋ wɔtɔ a ŋini fanɛ eche na daa kɔ tumba,

²¹ kumo ere kade na to be benyɛn beeŋ keta eche na n yɔ mo tuto be laŋ be kabuna to n ya kpa mo ajembu m mɔ. Ŋkpal e ka pin enyɛn, jemanɛ nɛ e kraa wɔ mo tuto pe pɔɛŋ nseŋ ba kakil to so, nyɔmɔ be kesheŋ nɛ e wora ashi anyi be basa to na. Kananɛ menyeeŋ lara le be kulubi ere ashi menyi to nna na.

²² Nɛ fanɛ b pɛ enyɛn nɛ e bee di mo barkasa be eche, a daga fanɛ b mɔ bumo benyɔ kikɛ. Kananɛ menyeeŋ lara le be kulubi ere ashi menyi to nna na.

²³ Nɛ fanɛ b pɛ enyɛn kade to nɛ e bee di eche nɛ esa ko bee ji mbe kesha nɛ e ta mo,

²⁴ menyeeŋ keta bumo benyɔ na kikɛ n lar kade na to n ya kpa bumo ajembu m mɔ. Eche na daga luwu ŋkpal e ka maŋ boŋ to n tre basa nɛ b ba chɛ mo to jemanɛ nɛ e wɔ kade to nɛ ekama daŋ beeŋ tiŋ n nu e ka bee boŋ to so. Enyɛn na malɛ daga luwu nna ŋkpal e ka di eche nɛ esa ko bee ji mbe kesha so. Kananɛ menyeeŋ wora n lara le be kulubi ere ashi menyi to nna na.

²⁵ Ama nɛ fanɛ enyɛn ya pur eche nɛ esa ko bee ji mbe kesha kupuŋ to, kumo ere enyɛn na nawule e daga luwu.

²⁶ Men sa maŋ kaŋ wora eche na bre shɛŋ, ŋkpal manɛ so, e maŋ wora kulubi nɛ k daga luwu. Le be demu ere baa du fanɛ esa ka kre n ya mɔ mo barkasa nna.

²⁷ Kupuŋ to nɛ enyɛn na ya pur eche na. Hale e boŋ to a fin kechɛto gba, e maaŋ nya esa nɛ e chɛ mo to ndoŋ.

²⁸ Nɛ fanɛ b pɛ enyɛn nɛ e bee pur eche nɛ b maŋ daa ji mbe kesha nɛ b ta mo,

²⁹ a daga fanɛ men tintiŋ enyɛn na nɛ e ta eche na a kil. Enyɛn na beeŋ ka gbiti be ndarbi adunu nɛ a la keshaji be amansherbi n sa eche na mo tuto pɔɛŋ nɛ e ki mbe eche ŋkpal enyɛn na ka teŋ di mo na so. Enyɛn na malɛ maaŋ naŋ tiŋ ŋ kini eche na kikɛ hale nɛ e ya wu.

³⁰ Enyɛn kikɛ e sa maŋ kaŋ di mo tuto be beche to be ekama ŋko n ta eche kama nɛ mo tuto kil ŋ ku so kikɛ. Kumo loŋ la ŋaba nna n sa mo tuto na.