Ditɛronɔmi 21 - EBƆRƐ BE KAWƆL

Esa ka wu nɛ b maŋ pin kusɔ nɛ k mɔ mo be asheŋ

¹ Nɛ fanɛ men wu b ka mɔ esa n nase kupuŋ to ashi kasawule nɛ Enyɛnpe menyi be Ebɔrɛ na ta a sa menyi na so, ama menyi alɛ maŋ pin esa nɛ e mɔ mo na,

² menyi to be benimuana nɛ demujipoana na beeŋ ya yili kakpa nɛ ebuni na dese na ŋ karga aya n yɔ nde nɛ a mata ndoŋ na be kekama to.

³ Nɛ kade kama nɛ k mata ndoŋ ga na be benimu e lara kena fɔlbi nɛ b maŋ naŋ ta n shuŋ ŋ ku so,

⁴ n yɔ kabombi nɛ kumo be nchu maa loge ase n ya yili kasawule nɛ b maŋ naŋ dɔ kumo so ŋ ku so so ŋ ki kena na be kubɔ m bu.

⁵ Bɔrɛmatapoana nɛ b shi Livai be yiri to na gba beeŋ yɔ ndoŋ, ŋkpal manɛ so, bumo e naa ji asheŋ nɛ a bee bar kebagato nɛ nlusheŋ. Enyɛnpe menyi be Ebɔrɛ na malɛ e lara bumo fanɛ b baa shuŋ mo nsaa bɔla mbe ketre so a nɛfa basa nsaa ji mpetɛ nɛ kebile n doro abar be asheŋ.

⁶ Kumo be kaman nɛ kade nɛ k mata kakpa nɛ b wu ebuni na be benimuana na e fɔr bumo be enɔana n wurge kena nɛ b bu kumo be kubɔ na so

⁷ nseŋ kaŋɛ le: “Mannɛ anyi e mɔ esa ere, anyi alɛ maŋ nyi esa nɛ e mɔ mo.

⁸ Amoso, Enyɛnpe Ebɔrɛ, ta m paŋ fo basa Israɛlebi nɛ fo kɔ n suge ashi Ijipt be efuli so na. Ta m paŋ anyi nsaa maŋ shin nɛ esa nɛ b mɔ ere be luwu be kulubi a baa bɛ anyi.”

⁹ Nɛ men wora Enyɛnpe Ebɔrɛ na kasonu nseŋ wora kusɔ nɛ e kaŋɛ ere, e beeŋ ta esa nɛ b mɔ na be kulubi na m paŋ Israɛl be basa.

Beche nɛ menyeeŋ pɛ kena to be asheŋ

¹⁰ Nɛ Enyɛnpe menyi be Ebɔrɛ na kaŋ shin nɛ men yɔ kena to n ya kɔ m pɔɔ so nseŋ pɛ basa bedamta,

¹¹ ashere menyi to be eko beeŋ wu bumo to be eche ko nɛ e walɛ kebita m par mo, nɛ e baa sha keta mo ŋ ki mbe eche.

¹² Kumo ere e keta eche na n yɔ mbe laŋ to n ya shin nɛ e she mbe kumu nseŋ kuya mbe akuti so. Kumo be kaman nɛ eche na e chɛrga mbe asɔbuuso nɛ e dela m ba na nseŋ buu Israɛlebi be asɔbuuso.

¹³ Ade be kaman, nɛ e chena enyɛn na be laŋ to n shu mo nio nɛ mo tuto be keeli kufɔl lelemu pɔɛŋ nɛ enyɛn na e ta mo ŋ ki mbe eche.

¹⁴ Nɛ jemanɛ ko ba fo nɛ Israɛl be enyɛn na maŋ naa sha kenyache na, e beeŋ tiŋ n yige mo nɛ e baa yɔ. Ŋkpal enyɛn na ka teŋ di eche na so, e maaŋ naŋ tiŋ n fa mo fanɛ mbe kenya.

Ewurkoŋ nɛ kapetɛji be asheŋ

¹⁵ Nɛ fanɛ enyɛn kɔ beche anyɔ nɛ bumo kikɛ kurge bibinyɛn n sa mo, ama wurkoŋ na maŋ la mbe eche shaso pibinyɛn,

¹⁶ e kaa barga mbe kapetɛ to a sa mbe mbia, a maŋ daga e kpɛa to n ta kapetɛ nɛ k daga mbe wurkoŋnyɛn na n sa mbe eche shaso na pibinyɛn na.

¹⁷ A daga fanɛ e ta mbe kapetɛ na be ntuŋ anyɔso nna n sa mbe wurkoŋnyɛn na, hale e ka maŋ la mbe eche shaso pibinyɛn ere gba. Enyɛn daga e baa keni mbe wurkoŋnyɛn nna a bɔlɔ kenishi nsaa sa mo mbe kapetɛ be kachige nɛ k la wurkoŋnyɛn peya mbra be ekpa so.

Ebinyɛn nɛ e maŋ kɔ kasonu be asheŋ

¹⁸ An ta fanɛ esa ko ka kɔ mo pibinyɛn kpeŋso nɛ e maa nu a sa mo nio nɛ mo tuto nɛ baa gberge mo kusoe nɛ e kraa maa chɛrga.

¹⁹ Loŋ be kebia mo tuto nɛ mo nio daga fanɛ b yɛr mo kade nɛ b wɔ na be benimuana kutɔ nna nɛ b ya ji kebia na demu.

²⁰ Kusɔ nɛ baaŋ ya kaŋɛ nde: “An pibinyɛn ere kpeŋ nna nsaa maa nu a sa anyi. E la esa nɛ e bee boo nsa nsaa jija amansherbi nna.”

²¹ Saŋɛ na so nɛ kade na be benyɛn e kpa kebia na ajembu m mɔ, nɛ kumo be loŋ e lara le be kulubi ere ashi menyi to nɛ kufu e pɛ Israɛl be esa kama nɛ e nu kumo be asheŋ.

Mbra be yiri yiri be asheŋ

²² Nɛ fanɛ esa wora kulubi nɛ b kpal loŋ so n chɛ mo n shiga kedibi so m mɔ,

²³ a maŋ daga kebuni na ka shiga kedibi na so hale nɛ kare a chɛ kumo so. A daga fanɛ b puli kumo kamɔnchɛ na kikɛ, ŋkpal manɛ so, kebuni be kebaasha kedibi so bee gberge Ebɔrɛ be kɔnɔsho a ba kasawule na so nna. Amoso men baa puli basa nɛ baa chɛ a shiga ndibi so a mɔ na, saŋɛ na so menyi maaŋ jija kasawule nɛ Enyɛnpe menyi be Ebɔrɛ na ta a sa menyi na.