Ditɛronɔmi 2 - EBƆRƐ BE KAWƆL

¹ Kumo be kaman nɛ an bɛta n sɔ Teku Peper na be ekpa a yɔ keshishɛrsawule na so fanɛ kananɛ Enyɛnpe Ebɔrɛ na kaŋɛ kenishipereso na. Nfɛ damta nɛ anyee nite a kulti Edɔm be kepreŋsawule na.

² Ndoŋ nna nɛ Enyɛnpe Ebɔrɛ na kaŋɛ ma

³ fanɛ an nite ŋ kulti apreŋ na so n chɛr ga, amoso an kilgi a yɔ kelargato be esoso be kaba so.

⁴ Kumo be kaman nɛ e naŋ kaŋɛ ma fanɛ n ta mbraana ere n sa menyi: “Menyee sha kebɔla Edɔmebi nɛ b la Isɔɔ be kaman to ebi nseŋ naa la men kurgepoana na be kasawule so n choŋ nna na. Baaŋ baa ŋana menyi,

⁵ ama men sa maŋ kaŋ fara kena nɛ bumo, ŋkpal manɛ so, m maaŋ ta bumo be kasawule, nɛ k fo fanɛ keyadra koŋwule gba, n sa menyi. N teŋ ta Edɔm be efuli na n sa Isɔɔ nɛ mbe kaman to ebi nna.

⁶ Menyeeŋ tiŋ n tɔ ajibi nɛ nchu bumo kutɔ jemanɛ nɛ men bɔla bumo be kasawule so a choŋ na bre.”

⁷ Men baa nyiŋi kananɛ Enyɛnpe menyi be Ebɔrɛ na nɛfa menyi ashi asɔ kama nɛ men wora to. E keni menyi so jemanɛ nɛ men daa nite keshishɛrsawule palɛlɛ na so a kulti na. Menyi nɛ mo e daa la nfɛ adena ere kikɛ. Menyi alɛ daŋ nya kusɔ kama nɛ menyee sha.

⁸ Amoso an ka wɔ enite na to na nɛ an ku Isɔɔ be kaman to ebi nɛ b la an kurgepoana na be kasawule n lɛ. An daŋ bɔla ekpa nɛ k dese nde nɛ baa tre Elaf nɛ Eziɔngɛba a yɔ Teku Wuso na ase na nna, nseŋ ya kilgi n sɔ keshishɛrsawule be ekpa nɛ k bee yɔ Mowab be kasawule so na.

⁹ Ndoŋ nna nɛ Enyɛnpe Ebɔrɛ na kaŋɛ ma le: “Men sa maŋ kaŋ tɔrɔ Mowab be basa nɛ b la Lɔt be kaman to ebi na ŋko n fara kena nɛ bumo. N teŋ ta kadegboŋ nɛ baa tre Ar na nna n sa bumo, ma alɛ maaŋ ta bumo be kasawule be kaba kama n sa menyi.”

¹⁰ (Pɔɛŋ nɛ Enyɛnpe Ebɔrɛ na ta kasawule na n sa Mowabebi na, edimɛdi be yiri ko nɛ b daŋ pɔlto nsaa du jeŋgreŋ jeŋgreŋ nɛ b daa tre bumo Emim, e daa wɔ Ar. B daŋ pɔlto nsaa du jeŋgreŋ jeŋgreŋ nna fanɛ edimɛdi be yiri ko nɛ baa tre Anak na.

¹¹ Mowabebi ere e daa tre bumo Emebi, ama bekama daa tre bumo Refaebi nna fanɛ kananɛ b daa tre Anakebi na nna.

¹² Basa ko daa wɔ Edɔm be kasawule na so nɛ baa tre bumo Hɔɔ. Nɛ Edɔmebi nɛ b la Isɔɔ be kaman to ebi na ba mɔ Hɔɔebi na be bedamta nseŋ tintiŋ bumo nɛ b ka na nɛ b lar efuli na so nɛ b chena ndoŋ, fanɛ kananɛ Israɛl be basa gba beeŋ ba ju basa nɛ b wɔ kasawule nɛ Enyɛnpe Ebɔrɛ na ta n sa bumo na.)

¹³ Kede be kaman, nɛ an dii Lɔr nɛ baa tre Zered na n luri Mowab be kasawule so fanɛ kananɛ Enyɛnpe Ebɔrɛ na kaŋɛ fanɛ an wora na.

¹⁴ An ka lar kakpa nɛ baa tre Kadɛsh Bania na be nfɛ adesa nɛ aburwa nna na. Benyɛn kama nɛ b daa tiŋ a kɔ kena loŋ be jemanɛ na kikɛ wu, fanɛ kananɛ Enyɛnpe Ebɔrɛ na kaŋɛ fanɛ baaŋ wu na.

¹⁵ Enyɛnpe Ebɔrɛ na e daa maŋ shin nɛ b nya bumo be amu n ji hale nɛ bumo kikɛ wu mur.

¹⁶ Bumo kikɛ ka wu be kaman,

¹⁷ nɛ Enyɛnpe Ebɔrɛ na kaŋɛ anyi le:

¹⁸ “Kabre, menyi beeŋ bɔla ekpa nɛ k bee yɔ Ar be kade to na so m ya baŋɛ n sɔ Mowab be efuli so n ya bɔla kumo be kelargato be esoso be egbaŋ to n choŋ.

¹⁹ Menyeeŋ taga Ammɔnebi nɛ b la Lɔt be kaman to ebi na be kasawule to, ama men sa maŋ kaŋ tɔrɔ bumo ŋko n fara kena nɛ bumo; ŋkpal manɛ so, m maaŋ ta kasawule nɛ n ta n sa bumo na be kaba kama n sa menyi.”

²⁰ (Pɔɛŋ nɛ Ammɔnebi ba kɔ n sɔ kasawule nɛ Enyɛnpe Ebɔrɛ na ta n sa bumo na, yiri nɛ b daa tre Refaebi na be beko e daa wɔ ndoŋ, ama Ammɔnebi na bre daa tre bumo Zamzummim nna.

²¹ Zamzummimebi ere daa la yiri nɛ b shi nsaa kɔ eleŋ ga nseŋ naa du jeŋgreŋ jeŋgreŋ fanɛ Anak be yiri to ebi na nna. Ama Enyɛnpe Ebɔrɛ na daŋ mur bumo nna, saŋɛ na so Ammɔnebi beeŋ sɔ bumo be kasawule na n chena so.

²² Loŋ koŋwule na nɛ Enyɛnpe Ebɔrɛ na wora n sa Edɔmebi, nɛ bumo alɛ gba la Isɔɔ be kaman to ebi na gba. E daŋ mur Hɔɔebi na nna, saŋɛ na so Edɔmebi na beeŋ sɔ bumo be kasawule na n chena kakpa nɛ b kraa wɔ ere.

²³ Katuŋ ko ebi nɛ baa tre Avvim na e daa wɔ ndekarso nɛ a dese hale n ya lar kadegboŋ nɛ baa tre Gaaza na ashi epeŋilarkpa kaba so ndoŋ, nɛ Filistiebi nɛ b daa wɔ kepla nɛ baa tre Kriit na ba m ba mɔ bumo nseŋ sɔ kasawule na n chena so.)

²⁴ An ka bɔla Mowabebi be kasawule so n choŋ na be kaman, nɛ Enyɛnpe Ebɔrɛ naŋ kaŋɛ anyi le: “To, men fara n dii lɔr nɛ baa tre Aanɔn na. Mee ta Amɔriebi be ewura nɛ e wɔ Hɛshbɔn nɛ baa tre mo Sihɔn nɛ mbe efuli a bɔɔ menyi enɔ nna. Amoso, men yɔ n ya kɔ mo nseŋ sɔ kasawule na n chena so.

²⁵ Yili kabre a yɔ, meeŋ shin nɛ kaplɛkama be basa e baa ŋana menyi. Kufu beeŋ pɛ ekama nɛ e beeŋ nu b ka ti menyi be ketre nɛ e baa chicha.”

Israɛlebi na ka kɔ m pɔɔ Ewura Sihɔn so be asheŋ

²⁶ An ka dii lɔr nɛ baa tre Aanɔn na nseŋ ya wora anyi be keeyi to ashi kakpa nɛ baa tre Kademɔt be keshishɛrsawule so na be kaman, nɛ n ta kayurwushi be kubɔya ere n shuŋi mbɔ ewura Sihɔn kutɔ ashi Hɛshbɔn:

²⁷ “Jande, shin nɛ an bɔla fo efuli so n choŋ. Kegbembi so nɛ anyeeŋ bɔla n choŋ nɛ ekama maŋ yɔ bena so ŋko jisoso.

²⁸ Anyi alɛ beeŋ ka ajibi nɛ anyeeŋ ji nɛ nchu nɛ anyeeŋ nuu be kukɔ. Kusɔ nɛ anyee sha e la kebɔla fo efuli so to

²⁹ hale nɛ an ya dii lɔr nɛ baa tre Jɔɔdan na n yɔ kasawule nɛ Enyɛnpe anyi be Ebɔrɛ na ta a sa anyi na so. Edɔmebi nɛ Mowabebi bre tiŋ n shin nɛ an bɔla bumo be nsawule so n choŋ.”

³⁰ Ama Ewura Sihɔn daa maaŋ shuli fanɛ an bɔla mbe efuli so n choŋ, ŋkpal manɛ so, Enyɛnpe menyi be Ebɔrɛ na daŋ shin nɛ e wora mbe kagbene kpakpa nna nsaa sha kekɔ anyi, saŋɛ na so anyi beeŋ kɔ m pɔɔ mo so nseŋ sɔ mbe kasawule nɛ an kraŋ chena so ere.

³¹ Ndoŋ nna nɛ Enyɛnpe Ebɔrɛ na kaŋɛ ma le: “Mee sha kechɛ menyi to nna nɛ men kɔ m pɔɔ Ewura Sihɔn so nseŋ sɔ mbe kasawule, amoso, men yɔ n ya kɔ mo!”

³² Nɛ Ewura Sihɔn keta mbe benapo n lar m ba nɛ e ba kɔ anyi ashi kade nɛ baa tre Jahaz na.

³³ Ama Enyɛnpe anyi be Ebɔrɛ na daŋ chɛ anyi to nɛ an pɔɔ bumo so, nseŋ mɔ mo nɛ mbe mbinyɛnso nɛ mbe benapo na kikɛ.

³⁴ Kumo be kaman, nɛ an kɔ m pɔɔ nde nɛ a wɔ Ewura Sihɔn be kasawule so kikɛ m mur amo, nseŋ mɔ benyɛn nɛ beche nɛ mbia kikɛ. Anyi daa maŋ shin nɛ esa koŋwule gba ji efute.

³⁵ Ndoŋ nna nɛ an ta bumo be asɔbɔya nseŋ sensaŋ bumo be nde kikɛ to n ta bumo be asɔ lela kikɛ.

³⁶ Enyɛnpe anyi be Ebɔrɛ na daŋ shin nɛ an yili kade nɛ baa tre Arowa nɛ k wɔ Aanɔn be ketaŋɛ be ekarso na nɛ kadegboŋ nɛ k wɔ ketaŋɛ na to na nna ŋ kɔ n sɔ kasawule na kikɛ hale n ya fo Giliad be egbaŋ to. Ndeana na be kekama be egbalana be kebure daŋ maŋ du anyi so kpakpa.

³⁷ Ama an daa maŋ yɔ Ammɔnebi be ndeana nɛ a wɔ kepreŋsawule na so, ŋko amo nɛ a wɔ lɔr nɛ baa tre Jabbɔk na ase, ŋko mboŋ nɛ Enyɛnpe Ebɔrɛ na kaŋɛ anyi fanɛ an sa maŋ yɔ amo to na.