Ditɛronɔmi 19 - EBƆRƐ BE KAWƆL

Kumɔlga be nde be asheŋ

¹ Nɛ Enyɛnpe Ebɔrɛ na kaŋ mur basa nɛ e bee ta bumo be kasawule a sa menyi ere nɛ men sɔ bumo be ndegboŋana nɛ nwuana n chena,

^2-3 men barga efuli na to ntuŋ asa, nɛ katuŋ kama e baa kɔ kade nɛ kumo to be keshile n yɔ maaŋ baa du kpakpa. Saŋɛ na so menyi be ekama nɛ e mɔ esa, beeŋ tiŋ n shile n ya ŋana nɛ b sa maŋ mɔ mo alɛ gba.

⁴ Nɛ menyi to be ekama maŋ kute m mɔ esa nɛ e maŋ la mo doŋ, e beeŋ tiŋ n shile n yɔ ndeana na be kuko to n ya ŋana nseŋ nya mbe kumu.

⁵ An ta fanɛ menyi to be benyɔ yɔ kupuŋ to nɛ b ya ku ndibi, nɛ jemanɛ nɛ baa ku ndibi na kekpanfu nɛ b kɔ a ku na be kumu pee ŋ ŋmɛa eko m mɔ, emo nɛ e keta kumo a ku na beeŋ tiŋ n shile n yɔ nde asa na be kuko to n ya ŋana nɛ b sa maŋ mɔ mo alɛ gba.

⁶ E maŋ daga luwu, ŋkpal manɛ so e maŋ kre kemɔ mo barkasa na nna. Ama esa nɛ e wu na mo kurgepo beeŋ tiŋ n nya agbo ŋkpal e ka wu so. Bumo alɛ beeŋ tiŋ n lara bumo kanaŋ to be esa ko fanɛ e tɛ emo nɛ e mɔ bumo kurgepo na m mɔ mo. Nɛ fanɛ kade nɛ e beeŋ shile n ya ŋana nseŋ nya mo kumu na wɔ kufɔ nɛ kakpa nɛ e wɔ na, esa nɛ e wu na mo kurgepoana na beeŋ tiŋ n ju mo m pɛ nseŋ mɔ mo.

⁷ Amoso nɛ ŋ kaŋɛ fanɛ a daga men lara nde asa n yili nɛ basa e baa shile a yɔ amo to n ya kaa ŋana nsaa nya bumo be amu na.

^8-9 Nɛ menyeeŋ wora kusɔ kama nɛ mee kaŋɛ menyi kabre ere, nsaa sha Enyɛnpe menyi be Ebɔrɛ na, nsaa wora asheŋ a bɛ mbe keŋini so, e beeŋ shin nɛ menyi be kasawule nɛ e nase kumo be kɔnɔ n sa menyi nananyɛnana na e kpalga to n ti so. Nɛ loŋ kaŋ wora, menyeeŋ naŋ lara nde asa n ti adra na so.

¹⁰ Men wora loŋ, saŋɛ na so b maaŋ mɔ basa nɛ b maŋ wora n jija ashi kasawule nɛ Enyɛnpe Ebɔrɛ na ta a sa menyi na so nɛ kumo be kulubi a baa bɛ menyi.

¹¹ Ama nɛ fo kute m mɔ fo barkasa ŋkpal fo ka kishi mo so nseŋ shile n yɔ nde na be kekama to n ya ŋana.

¹² Loŋ bre fo kade to be benimu beeŋ shuŋi nɛ b ya bar fo nɛ b ta fo m bɔ esa nɛ fo mɔ na mo kurgepoana enɔ nɛ bumo alɛ gba e mɔ fo n tal to.

¹³ B maaŋ wu fo kuwɔr. A daga fanɛ b lara basa mɔpo kikɛ ashi Israɛl be efuli so, saŋɛ na so asheŋ beeŋ baa nite nɛnɛ.

¹⁴ Ekama be kapetɛsawule kɔ egbaŋ to be ndulgijembu nna a ŋini kumo be ekar ashi kasawule nɛ Enyɛnpe Ebɔrɛ na bee sa menyi na so. Amoso men sa maŋ kaa firgi men braana be ndulgijembu.

¹⁵ Esa koŋwule be shɛda maaŋ tiŋ n shin nɛ esa e ji n tɔr ashi kulubi to. Kanaŋkama, basa anyɔ ŋko besa e daga fanɛ b ji shɛda pɔɛŋ nɛ esa e ji n tɔr ashi kulubi to.

¹⁶ Nɛ fanɛ menyi to be eko bee sha ketɔrɔ mo barkasa nseŋ ku efɛ n deŋi mo,

¹⁷ menyi benyɔ na kikɛ daga fanɛ men yɔ kakpa nɛ menyee shuŋ Ebɔrɛ na nɛ bɔrɛmatapo na nɛ demujipoana nɛ b wɔ ndoŋ na e ya keni demu na to n ji kumo.

¹⁸ Demujipoana na beeŋ mige demu na to nɛnɛ ŋ keni, nɛ fanɛ efɛ nɛ fo kuu

¹⁹ feeŋ nya kasogberge nɛ k daga efɛpo. Kananɛ menyeeŋ wora nɛ le be kulubi maaŋ baa wɔ efuli na so nna na.

²⁰ Kumo be kaman nɛ b shin nɛ ekama e nu kusɔ nɛ k wora na be asheŋ nɛ kufu e pɛ bumo, nɛ ekama maaŋ naa sha kewora loŋ be kulubi kikɛ.

²¹ Kasogberge nɛ k dese e la fanɛ nɛ esa baaŋ lara mo barkasa be efute ŋko kenishi ŋko kinyi ŋko ŋ ku mo barkasa be enɔ so ŋko keya so, b wora mo kananɛ e wora mo barkasa na gbagba chap. A maŋ daga fanɛ men baa wu kuwɔr ashi le be asheŋ to.