Ditɛronɔmi 18 - EBƆRƐ BE KAWƆL

Bɔrɛmatapoana na be kachige be asheŋ

¹ Livai be yiri to be basa nɛ baaŋ baa la bɔrɛmatapoana na bre maaŋ nya kasawule na be kachige ashi Israɛl be efuli so. Ama esarga nɛ ŋkɛ nɛ basa beeŋ baa lara a sa Enyɛnpe Ebɔrɛ na be ako nɛ baaŋ baa nya.

² B maaŋ baa kɔ kasawule fanɛ kananɛ eyiriana na kikɛ beeŋ baa kɔ na. Bumo be kachige e naaŋ baa la esarga nɛ basa beeŋ lara n sa Enyɛnpe Ebɔrɛ na be ako fanɛ kananɛ e nase kɔnɔ na.

³ Amoso jemanɛ kikɛ nɛ menyeeŋ mɔ kena ŋko kubolpɔ n lara sarga, kusɔbɔya na be keba nɛ ketaya nɛ apuntosɔ beeŋ baa la bɔrɛmatapoana na peya nna.

⁴ Kede be kaman, menyeeŋ baa sa bumo ayu nɛ menyeeŋ juŋkpar n teŋi, nɛ yabra belbelso nɛ ɔlif be ŋku nɛ menyeeŋ juŋkpar n wora, nɛ mbolpɔ be afuibi nɛ menyeeŋ juŋkpar n she na kikɛ.

⁵ Menyeeŋ baa sa bumo ade kikɛ nna, ŋkpal manɛ so, Enyɛnpe Ebɔrɛ na e lara bumo nɛ bumo be kaman to ebi ashi Israɛl be eyiriana na to nɛ b baa shuŋ mo fanɛ bɔrɛmatapoana mbaanaayɔ.

⁶ Livai be yiri to be esa kama nɛ e bee sha, beeŋ tiŋ n shi kade nɛ e wɔ ashi Israɛl be efuli so be kaplɛkama m ba kakpa nɛ menyee shuŋ Ebɔrɛ na

⁷ m ba shuŋ fanɛ bɔrɛmatapo n sa Enyɛnpe Ebɔrɛ na fanɛ kananɛ Livai be yiri to be basa bee shuŋ ndoŋ na.

⁸ Livai be yiri to be esa beeŋ tiŋ n fa mbe kanaŋ to be asɔ n nya amansherbi, beko malɛ maaŋ wora loŋ. Ama Livaiebi kama nɛ baa shuŋ kakpa nɛ menyee shuŋ Ebɔrɛ na kikɛ beeŋ nya ajibi nɛ basa na bar m ba lara esarga ŋko m ba kɛ Ebɔrɛ na, a sasa.

Ekishisheŋ be asheŋ

⁹ “Nɛ menyi kaŋ yɔ kasawule nɛ Enyɛnpe menyi be Ebɔrɛ na ta a sa menyi na so, men sa maŋ kaa wora ekishisheŋ nɛ efuliana nɛ a wɔ ndoŋ na bee wora na.

^10-11 Men sa maŋ kaa chɔɔ menyi be mbia ebɔrɛsure so a lara esarga. Menyi alɛ e sa maŋ shin nɛ menyi be basa e baa kpal ŋko a kɔ mputi ŋko a to akprambi ŋko a kre mbre. Kumo be kaman men sa maŋ kaa malga bubuni kutɔ a bishi so a fin kenu kusɔ ko bumo kutɔ.

¹² Enyɛnpe menyi be Ebɔrɛ na kishi basa nɛ baa wora le be asheŋ ere nna, amoso nɛ e beeŋ chɛ menyi to n ju efuliana na n lar kasawule na so na.

¹³ Menyi ere daga fanɛ men baa ji kashenteŋ a sa Enyɛnpe Ebɔrɛ na ekpa kikɛ so nna nsaa maa wora ekishisheŋ ere.”

Enyɛnpe Ebɔrɛ ka nase kɔnɔ fanɛ e beeŋ shuŋi anebi be asheŋ

¹⁴ Ndoŋ nna nɛ Mosis naŋ kaŋɛ le: “Kasawule nɛ menyee yɔ nɛ men ya sɔ n chena so ere so, basa bee nu nna a sa basa nɛ baa kpal nsaa bishi so. Ama Enyɛnpe menyi be Ebɔrɛ na maŋ sa menyi ere akpa fanɛ men baa wora loŋ kikɛ.

¹⁵ Kusɔ nɛ e beeŋ wora e la fanɛ e beeŋ shuŋi anebi ko nɛ e du fanɛ ma nseŋ shi menyi gbagba be basa to nɛ e ba menyi kutɔ. A daga fanɛ men wora loŋ be anebi na kasonu.

¹⁶ Kachɛ nɛ men daŋ shɛr ashi kebeegboŋ nɛ baa tre Sainai na ase na, men daŋ kule ma nna fanɛ menyi maŋ naa sha kenu Enyɛnpe Ebɔrɛ na be ebɔl ŋko n wu mbe edɛ gboŋ na kikɛ, ŋkpal manɛ so, menyi daa lɔ kufu nna fanɛ menyeeŋ wu.”

¹⁷ Ndoŋ nna nɛ Enyɛnpe Ebɔrɛ na kaŋɛ ma le: “Kashenteŋ nɛ b ji na.

¹⁸ Amoso meeŋ shuŋi anebi ko nɛ e du fanɛ fo nseŋ shi bumo gbagba be basa to nɛ e ba bumo kutɔ. Ma alɛ beeŋ baa ta ma kubɔya a sa mo nɛ mo alɛ e baa kaŋɛ bumo kusɔ kama nɛ ŋ kaŋɛ mo na gbagba chap.

¹⁹ Ŋkpal kubɔya na ka beeŋ shi ma kutɔ so, esa kama nɛ e kaŋ kini kewora kumo kasonu, ŋ gbagba e naaŋ bishi amodoŋwura ŋko ŋ gberge mo kusoe.

²⁰ Ama nɛ fanɛ anebi ko sa kubɔya ko ashi ma ketre to nɛ k maŋ shi ŋ kutɔ, loŋ be anebi na beeŋ wu ŋkpal loŋ so. Kusɔ nɛ k beeŋ nya anebi kama nɛ e beeŋ sa kubɔya ashi agbir ko be atre to gba nna na.”

²¹ Menyi beeŋ baa belsi nsaa bishi menyi be amu fanɛ nuso nɛ anyeeŋ wora m pin fanɛ anebi ere be kubɔya ere shi Enyɛnpe Ebɔrɛ na kutɔ nna.

²² Nɛ fanɛ anebi baŋ sa kubɔya ko ashi Enyɛnpe Ebɔrɛ na be ketre to nɛ k maŋ ba kashenteŋ nseŋ wora m bɔlɔ so, kumo ere kubɔya na maŋ shi Enyɛnpe Ebɔrɛ na kutɔ nna na. Anebi na gbagba be nfɛra to nɛ kubɔya na shi nɛ a maŋ daga fanɛ men baa ŋana loŋ be anebi na.