Ditɛronɔmi 17 - EBƆRƐ BE KAWƆL

¹ Men sa maŋ kaŋ ta kena ŋko kubolpɔ nɛ k kɔ doro kikɛ n lara sarga n sa Enyɛnpe Ebɔrɛ na, ŋkpal manɛ so, e kishi loŋ ga.

² Nɛ men kaŋ nu fanɛ benyɛn ŋko beche ko ashi menyi be ndeana na be kekama to wora kulubi n da Enyɛnpe Ebɔrɛ na so n tɔr mbe kɔnɔkoŋwule be ŋkre na be ntaŋ

³ ŋkpal b ka shuŋ agbirana ŋko epeŋi ŋko kufɔl ŋko achɛkpabi so,

⁴ kumo ere men keni to n fin kumo be kashenteŋ. Nɛ k kaa la kashenteŋ fanɛ kulubi ere wora Israɛl be efuli so nna,

⁵ men keta loŋ be basa n lar kade na to n ya kpa bumo ajembu m mɔ.

⁶ Ama pɔɛŋ nɛ men kpa bumo ajembu m mɔ, a daga fanɛ basa anyɔ ŋko basa damta ka ji shɛda fanɛ kashenteŋ nɛ b wora kulubi na. A maŋ daga fanɛ men mɔ bumo ŋkpal esa koŋwule be shɛda so.

⁷ Eshɛdajipoana na e naaŋ juŋkpar ŋ kpa bumo ajembu nɛ basa nɛ b ka na malɛ e chɛ to ŋ kpa bumo ajembu m mɔ. Kananɛ menyeeŋ wora n lara kulubi na ashi menyi to nna na.

⁸ K beeŋ tiŋ m ba fanɛ asheŋ nɛ a beeŋ ba demujipoana nɛ b wɔ menyi to na kutɔ, beeŋ baa du kpakpa n sa bumo nɛ b tiŋ n ji amo. K beeŋ tiŋ a la fanɛ kusɔ be kejija ŋko esa be kenu ebesa ŋko esa be kemɔ be asheŋ nɛ a daga fanɛ b ji. Nɛ k kaŋ ba loŋ, men yɛr demu na kakpa nɛ Enyɛnpe menyi be Ebɔrɛ na lara n yili fanɛ b baa shuŋ mo na,

⁹ n ya ta demu na n nase bɔrɛmatapoana nɛ b shi Livaiebi be yiri to na nɛ demujipo nɛ e bee shuŋ loŋ be jemanɛ na be anishito nɛ b ji kumo.

¹⁰ B kaŋ ji demu na nseŋ nase kumo kananɛ b pɛ, men wora kusɔ nɛ b kaŋɛ na gbagba chap.

¹¹ Menyeeŋ sɔ kusɔ nɛ b pɛ na nseŋ bɛ kusɔ nɛ baaŋ ŋini menyi fanɛ men wora na so.

¹² Esa kama nɛ e kaŋ pɛl ŋ kini kewora demujipo na ŋko bɔrɛmatapo nɛ e wɔ kushuŋ to loŋ be jemanɛ na kasonu, daga fanɛ men mɔ mo. Kananɛ menyeeŋ wora n lara kulubi Israɛl be efuli so nna na.

¹³ Aloŋ e naaŋ shin nɛ kufu e pɛ ekama nɛ e beeŋ nu kumo be asheŋ nɛ esa kikɛ maaŋ naŋ wora loŋ kikɛ.

Ewura be asheŋ

¹⁴ Israɛlebi, men kaŋ ya kɔ n sɔ kasawule nɛ Enyɛnpe menyi be Ebɔrɛ na bee sa menyi na n chena so, menyeeŋ kaŋɛ fanɛ menyee sha ewura fanɛ efuliana pɔtɛana nɛ a kulti menyi na.

¹⁵ Nɛ k kaŋ ba loŋ, men lara esa nɛ Enyɛnpe Ebɔrɛ na gbagba lara nɛ e ki menyi be ewura na. Mo alɛ daga fanɛ e baa la menyi to be esa gbagba, mannɛ efɔ.

¹⁶ Esa nɛ e beeŋ ki ewura na maŋ daga fanɛ e baa kɔ egbaŋɛ damta, fɔŋfɔŋ egbaŋɛ nɛ a shi Ijipt be efuli so. Ŋkpal manɛ so, Enyɛnpe Ebɔrɛ na tiŋ ŋ kaŋɛ fanɛ mbe basa maŋ daga kenaŋ bɛta n yɔ Ijipt be efuli so kikɛ.

¹⁷ Ewura na maŋ daga fanɛ e baa kɔ beche damta, ŋkpal manɛ so, loŋ beeŋ shin nɛ e lar Enyɛnpe Ebɔrɛ na kaman. Mo alɛ maŋ daga fanɛ e gbare shuwa nɛ gbiti n sa mbe kumu nseŋ dii kedama ga.

¹⁸ Esa nɛ e beeŋ ki ewura na beeŋ shin nɛ b keni Enyɛnpe Ebɔrɛ na be mbraana be kawɔl nɛ k wɔ bɔrɛmatapoana nɛ b shi Livai be yiri to na kutɔ na so n sibɛ kuko n sa mo nɛ e ta n yili mbe enɔ so.

¹⁹ Kawɔl ere beeŋ baa wɔ mo kutɔ nɛ e baa kraŋ kumo nsaa wora mbraana na kasonu karechɛ kikɛ, saŋɛ na so, e beeŋ koya kabɔrɛŋana nsaa sa Enyɛnpe Ebɔrɛ na bunyaŋ.

²⁰ Kumo alɛ be loŋ beeŋ naŋ shin nɛ ewura na e sa maa fɛ fanɛ e bɔ mo braana Israɛlebi na be ekama nseŋ naŋ shin nɛ e sa maŋ kini kewora Enyɛnpe Ebɔrɛ na be mbraana kasonu. Aloŋ e naaŋ shin nɛ mo nɛ mbe kaman to ebi e ji kuwura na n chɛr ashi Israɛl be efuli so.