Ditɛronɔmi 16 - EBƆRƐ BE KAWƆL

Kebansonchoŋ be asheŋ

¹ Israɛl be basa, a daga fanɛ men baa ji Kebansonchoŋ be kachɛgboŋ na kufɔl nɛ baa tre ‘Abib’ na to, ŋkpal manɛ so nfɛ nɛ a choŋ na, loŋ be kufɔl na be kanyɛso ko nɛ Enyɛnpe menyi be Ebɔrɛ na kɔ m mɔlga menyi ashi Ijipt be efuli so. ‘Abib’ e la Hibruwebi be sososo be kufɔl ashi bumo be kafɛ to.

² Kusɔbɔya nɛ menyeeŋ ta n lara sarga n sa Enyɛnpe menyi be Ebɔrɛ na Kebansonchoŋ be kachɛgboŋachɛ na daga fanɛ k baa la kena ŋko kubolpɔ ŋko kaboe. Menyi alɛ beeŋ ya mɔ kumo ashi kakpa nɛ Enyɛnpe Ebɔrɛ na lara n yili fanɛ men baa shuŋ mo ndoŋ na nna.

³ Nɛ menyi baa ji Kebansonchoŋ be kachɛgboŋ be ajibi na, men sa maŋ kaŋ ta bodobodo nɛ yiisi wɔ amo to n ti so n ji. Nchɛnshunu nɛ menyee ji bodobodo nɛ a maŋ kɔ yiisi amo to fanɛ kananɛ men daŋ wora jemanɛ nɛ k daŋ ba fanɛ men nya manaŋ n lar Ijipt be efuli so na. Menyeeŋ baa we le be bodobodo nna saŋɛ na so menyeeŋ baa nyiŋi kachɛ nɛ men ta n lar Ijipt be efuli nɛ k daa la awurfoŋ be kaboŋ n sa menyi na so. Baaŋ baa tre bodobodo na ‘awurfoŋ be bodobodo’.

⁴ A maŋ daga fanɛ esa kikɛ menyi be kasawule na so e baa kɔ yiisi mbe laŋ to nchɛnshunu na kikɛ to. A daga fanɛ men we kusɔbɔya nɛ menyeeŋ mɔ kaaseso n ji Kebansonchoŋ na be eblaŋ kikɛ kachɛ sososo na be kanyɛ na kikɛ.

⁵ Men sa maŋ kaŋ mɔ kebansonchoŋ be kusɔbɔya na n lara sarga ashi kade kama nɛ menyeeŋ baa wɔ na to.

⁶ A daga fanɛ men mɔ kumo ashi kakpa nɛ Enyɛnpe Ebɔrɛ na lara n sa menyi fanɛ ndoŋ nɛ menyeeŋ baa shuŋ mo na nna. Saŋɛ nɛ epeŋi bee luri efar to na nɛ menyeeŋ mɔ kusɔbɔya na fanɛ kananɛ men daŋ wora pɔɛŋ nseŋ lar Ijipt be efuli so na.

⁷ Kumo be kaman nɛ men daŋɛ kumo n we ashi kakpa nɛ menyeeŋ baa shuŋ Ebɔrɛ na. Kumo be ŋklade kachipurso nɛ men bɛta n yɔ epe.

⁸ Nchɛnshe nɛ menyee we bodobodo nɛ a maŋ kɔ yiisi, kachɛ shunusopo na nɛ men shɛr m bunyaŋ Enyɛnpe menyi be Ebɔrɛ na. Menyi alɛ e sa maŋ kaŋ shuŋ shɛŋ loŋ be kachɛ na.

Kasɔteŋi be kachɛgboŋ be asheŋ

⁹ Ade kikɛ be kaman nɛ men yili jemanɛ nɛ men fara a teŋi menyi be ayu na a karga n ya fo ebɔkwe ashunu.

¹⁰ Kumo be kaman nɛ men ji Kasɔteŋi be kachɛgboŋ na. Menyeeŋ yili kananɛ Enyɛnpe menyi be Ebɔrɛ na nɛfa menyi na so n lara ŋkɛ m ba bunyaŋ mo.

¹¹ Menyi nɛ menyi be mbia nɛ nyɛrbi nɛ Livaiebi nɛ befɔ nɛ amunibi nɛ bekulpoche nɛ b wɔ kade na to na beeŋ ji menyi be amu ashi Enyɛnpe Ebɔrɛ na be anishito ashi kakpa nɛ menyee shuŋ Ebɔrɛ na.

¹² Men baa nyiŋi fanɛ men daa la anya nna ashi Ijipt be efuli so, amoso men baa wora mbraana ere kasonu.

Abuu to be kebaawɔ be kachɛgboŋ be asheŋ

¹³ Men kaŋ loge menyi be kayuteŋi nɛ asɔrso be kechuge, men ji Abuu to be kachɛgboŋ na nchɛnshunu.

¹⁴ Menyi nɛ menyi be mbia nɛ nyɛrbi nɛ Livaiebi nɛ befɔ nɛ amunibi nɛ bekulpoche nɛ menyi nɛ bumo wɔ menyi be ndeana to na e ji menyi be amu ashi Enyɛnpe menyi be Ebɔrɛ na be anishito.

¹⁵ Menyeeŋ ji kachɛgboŋ na m bɛ abar so nchɛnshunu ashi kakpa nɛ menyeeŋ baa shuŋ Ebɔrɛ na n ta kemaŋkura n sa Enyɛnpe menyi be Ebɔrɛ na. Menyi alɛ e shin nɛ menyi be ŋgbene e fuli menyi ŋkpal Enyɛnpe Ebɔrɛ na ka nɛfa menyi be adɔ nɛ ashuŋ so.

¹⁶ Ela asa nɛ menyi be efuli so be basa kikɛ beeŋ ba shuŋ Enyɛnpe Ebɔrɛ na ashi kakpa nɛ menyeeŋ baa shuŋ Ebɔrɛ na. Jemanɛ nɛ baaŋ baa wora loŋ e la Kebansonchoŋ be kejigboŋachɛ nɛ Kasɔteŋi be kejigboŋachɛ nɛ Abuu to be kebaawɔ be kejigboŋachɛ. Menyi to be ekama beeŋ bar kakɛ

¹⁷ nɛ e beeŋ tiŋ n nya ashi adɔjibi nɛ Enyɛnpe Ebɔrɛ na ta n nɛfa mo na to m ba sa Ebɔrɛ.

Demujipoana be kushuŋ be asheŋ

¹⁸ Ade kikɛ be kaman nɛ Mosis naŋ kaŋɛ Israɛlebi na le: “Menyeeŋ lara demujipoana nɛ benimuana ko ashi menyi be ndeana nɛ Enyɛnpe, menyi be Ebɔrɛ na beeŋ sa menyi na to nɛ bumo alɛ e sa maa ji basa demu ŋkpɛato be ekpa so.

¹⁹ K maŋ daga b baa ji durmu ŋko a kpɛa to ashi bumo be demujiana to. B sa maŋ kaa sɔ brɔbu basa kutɔ pɔɛŋ nsaa ji bumo demu, ŋkpal manɛ so ŋkɛ be kesɔ beeŋ tiŋ n shin nɛ enyiashempo e sa maŋ ji kashenteŋ nseŋ shin nɛ beshenteŋjipo e ki befɛpo, saŋɛ na so nɛ b baa ji asheŋ ekpa nɛ k maŋ daga so.

²⁰ Nɛ menyi Israɛlebi bee sha kechena kayurwushi so n chɛr, kumo ere men ta kashenteŋji n chena abar so kasawule nɛ Enyɛnpe menyi be Ebɔrɛ bee sa menyi ere so.

²¹ Kumo be kaman nɛ men baŋ pɔr Enyɛnpe menyi be Ebɔrɛ na be bɔrɛsure, men sa maŋ kaŋ yuu kedibi tenteŋ nɛ k yili n sa kegbir cheso nɛ baa tre ‘Ashira’ na kumo ase.

²² Menyi alɛ e sa maŋ kaŋ yuu kegbir jembu kikɛ ashi Enyɛnpe Ebɔrɛ na be bɔrɛsure na ase kikɛ. Ŋkpal manɛ so, Enyɛnpe Ebɔrɛ na kishi amo nna.”