Ditɛronɔmi 15 - EBƆRƐ BE KAWƆL

Kafɛ shunusopo na be asheŋ

¹ Nfɛ ashunu kikɛ be lalaloge menyeeŋ ta bekama nɛ b ji menyi akɔ na kikɛ be akɔ nɛ b ji na m paŋ bumo.

² Kananɛ menyeeŋ baa wora kumo nde: Menyi to be ekama nɛ mo barkasa Israɛl be esa paŋ amansherbi mo kutɔ beeŋ kpra kukɔ na. E sa maŋ naŋ sɔ amansherbi na, ŋkpal manɛ so, Enyɛnpe Ebɔrɛ na gbagba e kpra kukɔ na.

³ Menyeeŋ tiŋ n shin nɛ efɔ bre e ka kukɔ nɛ e ji menyi, ama a maŋ daga fanɛ men shin nɛ menyi gbagba to bre be esa e ka kukɔ nɛ e ji menyi na.

⁴ Enyɛnpe menyi be Ebɔrɛ na beeŋ nɛfa menyi ashi kasawule nɛ e ta a sa menyi na so.

⁵ Nɛ menyeeŋ wora mo kasonu nsaa bɛ kusɔ kama nɛ mee kaŋɛ menyi kabre ere so nɛnɛ bre, menyi to be ekoŋwule gba maa ba nɛ e shu ketir.

⁶ Enyɛnpe Ebɔrɛ na beeŋ nɛfa menyi fanɛ kananɛ e nase kɔnɔ na, nɛ efuli damtaana so ebi e paŋ menyi amansherbi, ama menyi ere maaŋ ya paŋ efuli kama so ebi amansherbi. Menyi alɛ beeŋ ji kuwura efuli damta so, ama efuli kama maaŋ ji kuwura menyi ere so.

⁷ Kede be kaman nɛ asheŋ tir Israɛl be basa ko nɛ b wɔtɔ menyi be ndeana to ashi kasawule nɛ Enyɛnpe menyi be Ebɔrɛ na bee sa menyi ere so, kumo ere men sa maŋ kaa wora kejimuni nseŋ kini kechɛ bumo to.

⁸ Men baa bugi ŋgbene a paŋ bumo kanaŋkamaso nɛ ketir bumo.

⁹ Men sa maa kini kepaŋ basa asɔ ŋkpal kafɛ nɛ baa yige basa be akɔ a kɛ bumo na ka taga to so. Men sa maŋ shin nɛ le be nfɛra lubi ere e ba menyi to gba kuraa. Nɛ menyi baŋ kini kesa betirpo na m paŋ, baaŋ shu ŋ ŋini Enyɛnpe Ebɔrɛ na nɛ kumo be kulubi e baa bɛ menyi.

¹⁰ Amoso men baa wora betirpo be asheŋ tirso yɛlyɛla so a sa bumo, mannɛ kejimuni so. Saŋɛ na so nɛ Enyɛnpe Ebɔrɛ na e nɛfa menyi ashi kusɔ kama nɛ menyee wora to.

¹¹ Kanaŋ kama nɛ asheŋ du, Israɛl be basa ko beeŋ baa la betirpo nɛ asheŋ e tir bumo. Amoso nɛ mee kaŋɛ menyi fanɛ men baa wora asheŋ a sa bumo yɛlyɛla so na.

Keyige anya be asheŋ

¹² Israɛl be enyɛn ŋko eche kama nɛ e beeŋ fa mbe kumu ŋko nɛ esa beeŋ fa n sa menyi be ekama, a daga fanɛ nɛ e baŋ shuŋ nfɛnshe, men yige mo kafɛ shunusopo na to nɛ e baa yɔ.

¹³ Nɛ menyi alɛ baŋ yige bumo fanɛ b baa yɔ, men sa maŋ shin nɛ b ta enɔfuloŋ a yɔ.

¹⁴ Men bugi ŋgbene n sa bumo mbolpɔ nɛ ayu nɛ yabra belbelso nɛ Enyɛnpe Ebɔrɛ na ta n nɛfa menyi na be ako.

¹⁵ Men baa nyiŋi fanɛ menyi alɛ gba daa la anya nna ashi Ijipt be efuli so nɛ Enyɛnpe menyi be Ebɔrɛ na sɔ menyi n yige. Amoso nɛ mee ta mbra ere a sa menyi na.

¹⁶ Ashere fo kenya na maaŋ baa sha keyɔ ŋkpal e ka bee sha fo nɛ fo kanaŋ so nsaa sha kebaawɔ menyi kutɔ.

¹⁷ Kumo ere fo keta mo n yɔ fo laŋ be kabuna to n ya futi mbe kusoe, nɛ e ki fo kenya mbaanaayɔ. Hale kenya cheso gba a loŋ a daga fanɛ fo wora mo alɛ gba.

¹⁸ Nɛ men baŋ yige menyi be anya malɛ fanɛ b baa yɔ, men sa maŋ shin nɛ kebaabesa menyi nɛ men baa bile asheŋ. Ŋkpal manɛ so nfɛnshe kikɛ nɛ baa shuŋ menyi, menyi alɛ maŋ jija amansherbi bumo so a fo kananɛ menyee ka paawura kukɔ be bargato gba. Aloŋ nɛ Enyɛnpe menyi be Ebɔrɛ na beeŋ nɛfa menyi kusɔ kama nɛ menyee wora to.

Asɔbɔya wurkoŋ be asheŋ

¹⁹ Kede be kaman, kusɔbɔya fanɛ kena ŋko kubolpɔ ŋko kaboe pibi wurkoŋ la Enyɛnpe menyi be Ebɔrɛ na peya nna nɛ a maŋ daga fanɛ men ta loŋ be ana na a shuŋ ŋko ŋ kuya mbolpɔ na be afuibi n wora kusɔ ko.

²⁰ Kafɛ kikɛ menyi nɛ menyi be laŋ to ebi beeŋ baa mɔ amo a lara sarga pɔɛŋ nseŋ we eblaŋ na ashi kakpa nɛ Enyɛnpe Ebɔrɛ na lara n yili fanɛ men baa shɛr ndoŋ a shuŋ mo na.

²¹ Ama nɛ fanɛ kusɔbɔya na buri to ŋko n tan nna ŋko doro ko wɔ kumo so nna, kumo ere men sa maŋ kaŋ ta kumo n lara sarga n sa Enyɛnpe menyi be Ebɔrɛ na.

²² Menyeeŋ tiŋ m mɔ le be asɔbɔya ere n we ashi menyi be echenakpaana. Menyi to be bumo nɛ b walɛ so nɛ bumo nɛ b maŋ walɛ so kikɛ beeŋ tiŋ n we amo be eblaŋ fanɛ kananɛ menyee mɔ echibir nɛ eshantaŋ a we na.

²³ Ama men sa maŋ kaa ji amo be ŋklaŋ bre. A daga fanɛ men chulgi amo n wurge kasawule.