Ditɛronɔmi 14 - EBƆRƐ BE KAWƆL

Ekpa nɛ k maŋ daga kebɔla so n shu nli be asheŋ

¹ Israɛlebi, menyi ere la Enyɛnpe Ebɔrɛ na be basa nna. Amoso, nɛ menyee shu nli men sa maa ku menyi be eyurana ŋko a she menyi be nsɔto be emin fanɛ kananɛ basa pɔtɛ bee wora na.

² Menyi ere la basa nɛ Enyɛnpe menyi be Ebɔrɛ na lara nna nɛ men baa la mo gbagba be basa ashi edimɛdi nɛ b wɔ durnya kikɛ to.

Asɔbɔya nɛ e walɛ so nɛ amo nɛ e maŋ walɛ so be asheŋ

³ Men sa maa ji kusɔ kama nɛ Enyɛnpe Ebɔrɛ na kaŋɛ fanɛ k maŋ walɛ so.

⁴ Asɔbɔya nɛ menyeeŋ tiŋ n ji e la, ana nɛ mbolpɔ nɛ mboe

⁵ nɛ echibir nɛ kupuŋ to be asɔbɔya nɛ a duli mbolpɔ nɛ mboe nɛ eshantaŋ.

⁶ Menyeeŋ tiŋ n ji asɔbɔya kama nɛ emo be alotobi barga to nɛ a bee gbu apla.

⁷ Ama asɔbɔya kama nɛ amo be alotobi maaŋ barga to nɛ amo alɛ maa gbu a pla maŋ daga keji. Amoso men sa maa ji enyɔma nɛ elɔŋɛ nɛ ewosokro. Le be asɔbɔya ere maŋ walɛ so, ŋkpal manɛ so, baa gbu apla ama amo alɛ be alotobi maŋ barga to.

⁸ Men sa maŋ kaa ji epreku. Amo be alotobi barga to ama amo alɛ maa gbu apla, amoso a maŋ walɛ so. Men sa maa ji asɔbɔya ere be kekama ŋko m beta amo be kuwuso gba.

⁹ Menyeeŋ tiŋ n ji ekɔrɔtɔ nɛ baa kpaso be yiri kikɛ,

¹⁰ ama nchu to be asɔ keniso kikɛ nɛ b maa kpaso maŋ daga men ji amo. A maŋ walɛ so n sa menyi.

¹¹ Menyeeŋ tiŋ n ji kabuibi kama nɛ k walɛ so.

^12-18 Ama men sa maa ji le be mbuibi ere, kajɔnɔkoso nɛ jita nɛ jitamanchaŋ nɛ kɔlfɔɔti nɛ kɔl nɛ lambɛ nɛ margaati nɛ nyiŋgbeŋ be yiri kikɛ nɛ gbuŋgbula be yiri kikɛ nɛ tɔkɔrkɔ nɛ lambɛ be yiri kikɛ nɛ kelɛkelɛ nɛ luku nɛ mɔmɔ nɛ kɔɔŋkɔŋ.

¹⁹ Asɔ firgisobi nɛ a bee ber abar so a firgi kikɛ maŋ walɛ so n sa menyi, amoso men sa maa ji amo.

²⁰ Ama menyeeŋ tiŋ n ji asɔ firgisobi ko fanɛ elotɔr nɛ epantɛ nɛ alonte.

²¹ Menyi ere la Enyɛnpe menyi be Ebɔrɛ na be basa nna, amoso men sa maŋ kaa ji kusɔbɔya kikɛ nɛ k wu kpi. Menyeeŋ tiŋ n shin nɛ befɔ nɛ b chena menyi to na bre e ji kumo, ŋko menyeeŋ tiŋ n fa kumo n sa befɔ pɔtɛ. Men sa maŋ kaa daŋɛ kubolpɔbi ŋko kaboebi be eblaŋ kumo nio be kenyipochu to kikɛ.

Kudu kudusopo be mbra be asheŋ

²² Israɛlebi, kafɛ kikɛ men baa lara menyi be adɔjibi to be kudu kudusopo a yili.

²³ Kumo be kaman nɛ men yɔ kakpa nɛ Enyɛnpe menyi be Ebɔrɛ na lara n yili fanɛ kakpa nɛ menyeeŋ baa shuŋ mo na nseŋ ya ji menyi be ayu nɛ yabra belbelso nɛ ɔlif be ŋku be kudu kudusopoana nɛ ana nɛ mbolpɔ be ewurkoŋ na ndoŋ. Men baa wora le nseŋ koya kebaabunyaŋ Enyɛnpe menyi be Ebɔrɛ na saŋkikɛ.

²⁴ Ama nɛ fanɛ menyi be echenakpa nɛ kakpa nɛ menyeeŋ baa shuŋ Ebɔrɛ na wɔ kufɔ nɛ k du menyi so kpakpa nɛ ketiŋ n sulɔ adɔjibi nɛ Enyɛnpe Ebɔrɛ na ta n nɛfa menyi na be kudu kudusopo n yɔ ndoŋ,

²⁵ kumo ere men fa adɔjibi na nseŋ ta amansherbi na n yɔ kakpa nɛ menyee shuŋ Ebɔrɛ na.

²⁶ Menyi nɛ menyi be laŋ to ebi kaŋ fo ndoŋ nɛ men ta amansherbi na n tɔ ajibi nɛ menyee sha nɛ ana nɛ mbolpɔ nɛ mboe nɛ yabra belbelso nɛ nsa n wora kejigboŋ n ji menyi be amu ashi Enyɛnpe menyi be Ebɔrɛ na be anishito.

²⁷ Ama men sa maŋ kaa kplaŋ Livai be basa nɛ b wɔ menyi be nde to so jemanɛ nɛ menyee ji na, ŋkpal manɛ so, b maaŋ baa kɔ bumo gbagba be nsawule nɛ baaŋ baa dɔ amo so a nya ajibi.

²⁸ Kafɛ sasopo kikɛ be lalaloge nɛ men chala menyi be adɔjibi kikɛ be kudu kudusopo a wɔtɔ ebu to a yili menyi be nde to nsaa maa ji amo.

²⁹ Le be ajibi ere la Livaiebi nɛ b maŋ kɔ bumo gbagba be nsawule na, nɛ befɔ, nɛ amunibi, nɛ bekulpoche, nɛ b wɔ menyi be nde to na peya nna. Saŋɛ na so, bumo alɛ gba beeŋ nya n ji yɛlayɛlaso. Men baa wora loŋ nɛ Enyɛnpe menyi be Ebɔrɛ na e nɛfa menyi ashi kusɔ kama nɛ menyee wora to.