Ditɛronɔmi 13 - EBƆRƐ BE KAWƆL

Kebaashuŋ Agbirana be asheŋ

¹ Ade kikɛ be kaman, nɛ Mosis naŋ kaŋɛ Israɛlebi na le: “Anebiana ŋko basa nɛ baa kute edare be afito beeŋ ba kaŋɛ menyi fanɛ emamachisheŋ beeŋ wora menyi to

² a fin kananɛ baaŋ nya menyi nɛ men shuŋ agbirana nɛ menyi maŋ naŋ shuŋ ŋ ku so. Nɛ k kaŋ ba loŋ

³ men sa maŋ kaa nu a sa bumo. Enyɛnpe menyi be Ebɔrɛ na e naa bɔla bumo so a sha kewora menyi ŋ keni nseŋ pin fanɛ menyee sha mo nɛ menyi be ŋgbene kikɛ ŋko menyi maa sha mo.

⁴ Men baa bɛ Enyɛnpe Ebɔrɛ na so nsaa bunyaŋ mo. Menyi alɛ e baa wora mo nɛ mbe mbraana kasonu nsaa shuŋ mo nseŋ naa ji kashenteŋ a sa mo.

⁵ Kumo be kaman nɛ men mɔ basa nɛ baa kute edare be afito ŋko anebiana nɛ baŋ kaŋɛ menyi fanɛ men lar Enyɛnpe Ebɔrɛ nɛ e lara menyi kenyaya to ashi Ijipt be efuli so kaman na. Le be basa ere la basa lubi nna nsaa wora ania nɛ b lara menyi kebaawɔtɔ nɛ Enyɛnpe Ebɔrɛ na kaŋɛ fanɛ men baa kɔ na to. A daga fanɛ men mɔ bumo, saŋɛ na so menyeeŋ lara kulubi ere ashi menyi to.

⁶ Kede be kaman, fo niopibi ko ŋko fo pibi ko ŋko eche nɛ fee sha ŋko fo teri kpakpaso ko beeŋ tiŋ m ba fo kutɔ ashiri to nɛ e ba leŋ fo to n wɔtɔ agbir nɛ fo ŋko fo nananyɛnana maŋ naŋ shuŋ ŋ ku so to.

⁷ Bumo be beko beeŋ tiŋ n leŋ fo to n wɔtɔ basa nɛ b taga menyi to ŋko bumo nɛ b wɔ kufɔ ŋ kulti menyi na be agbirana be kushuŋ to.

⁸ Ama sa maŋ kaŋ shin nɛ b leŋ fo to n wɔtɔ kagbirshuŋ to. Sa maŋ kaa nu a sa bumo gba kuraa. Fo alɛ e sa maŋ kaa wu bumo kuwɔr ŋko a shu bumo so a kuŋ bumo gba.

⁹ Shin nɛ b mɔ bumo! Fo gbagba e juŋkpar ŋ kpa bumo kejembu pɔɛŋ nɛ ekama nɛ e wɔ ndoŋ e chɛ fo to ŋ kpa bumo ajembu m mɔ.

¹⁰ Shin nɛ b kpa bumo ajembu m mɔ! Ŋkpal manɛ so, baa sha kelara fo ashi Enyɛnpe fo Ebɔrɛ nɛ e lara fo kenyaya to ashi Ijipt be efuli so na be kushuŋ to nna na.

¹¹ Kumo be kaman, Israɛl be basa kikɛ beeŋ nu kusɔ nɛ k wora na be asheŋ, nɛ kufu e pɛ bumo nɛ ekama maaŋ naŋ wora loŋ be kesheŋ lubi na kikɛ.

¹² Jemanɛ nɛ menyeeŋ ya kaa wɔ ndeana nɛ Enyɛnpe menyi be Ebɔrɛ na beeŋ sa menyi na to na, menyeeŋ nu

¹³ fanɛ menyi be efuli so be basa jiga ko fule bumo be ndeana to be basa ko nɛ b shuŋ agbirana nɛ menyi maŋ naŋ shuŋ ŋ ku so kikɛ.

¹⁴ Nɛ menyi kaŋ nu loŋ be ŋkooko be kubɔya na, men keni to n fin kumo be kashenteŋ. Nɛ k kaa la fanɛ le be kulubi ere wora kashenteŋto nna,

¹⁵ kumo ere men mɔ basa nɛ b wɔ loŋ be kade na to kikɛ nɛ bumo asɔbɔya gba kikɛ n ti so. Men mur kade na cheche.

¹⁶ Kumo be kaman nɛ men chala basa na be asɔ kikɛ ashi kade na be kelɔnɛ so nseŋ chɔɔ amo nɛ kade na nɛ kusɔ kama nɛ k wɔ kumo to fanɛ sarga n sa Enyɛnpe menyi be Ebɔrɛ na. A daga k dese alambure loŋ nɛ b sa maŋ naŋ lɔŋɛ kumo m pɔr kikɛ hale mbaanaayɔ.

¹⁷ Menyi alɛ e sa maŋ kaŋ ta kusɔ kama kade na to. Aloŋ e naaŋ shin nɛ Enyɛnpe Ebɔrɛ na be agbogboŋ e wushi nɛ e wu menyi kuwɔr. Kumo be kaman nɛ e shin nɛ men wora keshi n ti so fanɛ kananɛ e nase kumo be kɔnɔ n sa men nananyɛnana na.

¹⁸ Amoso nɛ a daga fanɛ men baa wora kusɔ nɛ Enyɛnpe menyi be Ebɔrɛ na kaŋɛ fanɛ k walɛ na. Mee ta mbraana ere nna a sa menyi kabre nɛ men baa wora amo kasonu.”