Ditɛronɔmi 12 - EBƆRƐ BE KAWƆL

Kakpa koŋwule nɛ k daga kushuŋ Ebɔrɛ ndoŋ be asheŋ

¹ Mbraana nɛ a daga fanɛ men baa wora amo kasonu ashi kasawule nɛ Enyɛnpe Ebɔrɛ nɛ menyi nananyɛnana shuŋ na ta a sa menyi na so nna na. Men nu amo!

² Men ya jija abee jeŋgreŋ nɛ agoŋgulombi nɛ ndibigboŋ nɛ basa na ta ŋ ki bumo be agbirshuŋkpa na kikɛ.

³ Men bure bumo be agbirsure nɛ eshabɔrɛ nɛ b ta ajembu m pɔr na nseŋ chɔɔ asɔ kama nɛ a yili n sa kegbir cheso nɛ baa tre Ashira na, saŋɛ na so basa maaŋ naŋ shuŋ agbirana na ashi loŋ be mboŋ kikɛ.

⁴ Kede be kaman, men sa maŋ kaa shuŋ Enyɛnpe menyi be Ebɔrɛ na fanɛ kananɛ basa na bee shuŋ bumo be agbirana na.

⁵ Enyɛnpe Ebɔrɛ na gbagba beeŋ lara kakpa nɛ menyi to be eyiriana na beeŋ baa shɛr a shuŋ mo ashi bumo be mboŋ nɛ baaŋ chena.

⁶ Loŋ be mboŋana na nɛ menyeeŋ baa lara menyi be esarga chɔɔso nɛ menyi be kudu kudusopoana nɛ ŋkɛ be yiri yiri nɛ menyeeŋ nase nnɔ n sa Enyɛnpe Ebɔrɛ na nɛ menyi be keparso be esarga nɛ ana nɛ mbolpɔ be ewurkoŋ be esarga nɛ esarga nɛ a ka na kikɛ.

⁷ Enyɛnpe menyi be Ebɔrɛ nɛ e nɛfa menyi na be anishito nɛ menyi nɛ menyi be kaman to ebi beeŋ baa ji asɔ lela nɛ menyeeŋ shuŋ n nya ndoŋ na.

⁸ Jemanɛ na malɛ kaŋ fo, men sa maŋ kaa wora asheŋ fanɛ kananɛ men chɛr a wora na. Naniere bre kananɛ kepar menyi be ekama nɛ e bee shuŋ Ebɔrɛ,

⁹ ŋkpal manɛ so, menyi maŋ naŋ luri kasawule nɛ Enyɛnpe menyi be Ebɔrɛ na ta a sa menyi nɛ men chena so kayurwushi so na to.

¹⁰ Ama nɛ men kaŋ dii Jɔɔdan be lɔr na, Enyɛnpe Ebɔrɛ na beeŋ shin nɛ men ya kɔ n sɔ kasawule na n chena so. Mo alɛ beeŋ baa kuŋ menyi ashi men doŋana so nɛ men baa wɔ kayurwushi to.

¹¹ Kumo be kaman, Enyɛnpe Ebɔrɛ na beeŋ lara kakpa koŋwule nɛ menyeeŋ baa shuŋ mo ndoŋ nsaa lara menyi be esarga chɔɔso nɛ kudu kudusopoana nɛ ŋkɛ be yiri yiri nɛ menyeeŋ nase nnɔ n sa mo na nɛ asɔ kama nɛ e kaŋɛ fanɛ men baa bar mo na kikɛ ndoŋ.

¹² Men shin nɛ menyi nɛ menyi be mbia nɛ nyɛrbi nɛ Livai be yiri to be basa nɛ b wɔ menyi be ndeana to na be ŋgbene e fuli menyi ashi Enyɛnpe Ebɔrɛ na be anishito. Men baa nyiŋi fanɛ Livai be yiri to be basa na maaŋ baa kɔ bumo gbagba be kasawule.

¹³ Men sa maŋ kaa lara menyi be esarga mboŋ kama nɛ menyee sha.

¹⁴ A daga fanɛ men baa lara amo ashi kakpa nɛ Enyɛnpe Ebɔrɛ na gbagba beeŋ ŋini menyi ashi menyi be eyiriana na to be kekama be echenakpa. Ndoŋ nawule nɛ menyeeŋ baa lara menyi be esarga nɛ menyeeŋ baa chɔɔ na nɛ asɔ kama nɛ mee kaŋɛ menyi ere kikɛ.

¹⁵ Ama men kɔ ekpa nɛ men baa mɔ menyi be asɔbɔya bre ashi menyi be ndeana to a we kanaŋkama nɛ menyee sha, fanɛ kananɛ menyeeŋ we chibir ŋko shantaŋ be eblaŋ na. Kanaŋ kama nɛ Enyɛnpe Ebɔrɛ na beeŋ nɛfa menyi, menyeeŋ tiŋ n ji. Menyi kikɛ beeŋ tiŋ n ji, bumo nɛ b walɛ so nɛ bumo nɛ b maŋ walɛ so daŋkare be ekpa so kikɛ beeŋ tiŋ n ji amo.

¹⁶ Ama a maŋ daga fanɛ men ji amo be ŋklaŋ bre. A daga fanɛ men baa chulgi ŋklaŋ na a wurge kasawule nna fanɛ nchu.

¹⁷ Kumo be kaman, men sa maŋ kaa ji ayu ŋko ɔlif be ŋku be kudu kudusopo ŋko menyi be ana nɛ mbolpɔ be ewurkoŋ nɛ ŋkɛ nɛ menyeeŋ nase nnɔ n sa Enyɛnpe Ebɔrɛ na nɛ menyi be keparso be ŋkɛ kama nɛ menyeeŋ ta n sa Enyɛnpe Ebɔrɛ na ashi menyi be echenakpaana.

¹⁸ Menyi nɛ menyi be mbia nɛ menyi be nyɛrbi nɛ Livai be yiri to be basa nɛ b wɔ menyi be ndeana to na beeŋ baa ji esarga ŋko ŋkɛana ere ashi kakpa nɛ Enyɛnpe menyi be Ebɔrɛ na beeŋ lara n yili fanɛ kakpa nɛ menyeeŋ baa shuŋ mo na nna. Kumo alɛ daga fanɛ menyi be ŋgbene e baa fuli menyi a laŋɛ kusɔ kama nɛ menyeeŋ baa wora ashi ndoŋ na so nna.

¹⁹ Menyi alɛ e baa da so nɛ menyi maaŋ kplaŋ Livaiebi na so kikɛ jemanɛ nɛ menyeeŋ baa wɔ menyi be kasawule na so na.

²⁰ “Nɛ Enyɛnpe menyi be Ebɔrɛ na kaŋ shin nɛ menyi be kakpa nɛ menyeeŋ baa wɔ na kpalga to fanɛ kananɛ e nase kumo be kɔnɔ na, menyeeŋ tiŋ a we eblaŋ jemanɛ kikɛ nɛ menyee sha.

²¹ Nɛ fanɛ kakpa koŋwule nɛ menyeeŋ baa shuŋ Ebɔrɛ na wɔ kufɔ, kumo ere jemanɛ kikɛ nɛ menyee sha menyeeŋ tiŋ m mɔ ana ŋko mbolpɔ nɛ Enyɛnpe Ebɔrɛ na sa menyi na be kekama n we ashi men peana fanɛ kananɛ ŋ kaŋɛ menyi na.

²² Menyi to be bumo nɛ b walɛ so nɛ bumo nɛ b maŋ walɛ so daŋkare be ekpa so kikɛ beeŋ tiŋ n we eblaŋ na fanɛ kananɛ menyee we echibir ŋko eshantan be eblaŋ na.

²³ Ama men sa maŋ kaa ji eblaŋ nɛ ŋklaŋ wɔ kumo to, ŋkpal manɛ so, kusɔbɔya na be ŋkpa wɔ ŋklaŋ na to nna nɛ a maŋ daga men baa ji eblaŋ na nɛ ŋkpa wɔ kumo to.

²⁴ Men sa maŋ kaa ta ŋklaŋ na fanɛ ajibi a ji amo, ama men baa chulgi amo a wurge kasawule fanɛ nchu.

²⁵ Nɛ menyee wora mbra ere kasonu, Enyɛnpe Ebɔrɛ na be kagbene beeŋ baa fuli menyi so nɛ asheŋ a nyalɛ n sa menyi nɛ menyi be kaman to ebi.

²⁶ Menyeeŋ baa ta menyi be esarga nɛ ŋkɛ nɛ menyeeŋ nase nnɔ n sa Enyɛnpe Ebɔrɛ na a yɔ kakpa koŋwule nɛ e beeŋ lara n yili fanɛ men baa shuŋ mo na nna.

²⁷ Loŋ be kakpa na nɛ menyeeŋ baa lara esarga chɔɔso ashi Enyɛnpe Ebɔrɛ na be bɔrɛsure so nsaa lara esarga kama nɛ menyeeŋ baa mɔ a chulgi amo be ŋklaŋ a wurge bɔrɛsure na ase nsaa we amo be eblaŋ gba ashi ndoŋ.

²⁸ Nɛ fanɛ menyeeŋ wora mbraana nɛ mee kaŋɛ menyi ere kasonu kashenteŋto, asheŋ beeŋ nyalɛ n sa menyi nɛ menyi be kaman to ebi hale mbaanaayɔ. Ŋkpal manɛ so, menyeeŋ baa wora kusɔ nɛ k daga nsaa par Enyɛnpe menyi be Ebɔrɛ na nna na.”

Kusoe kpele a laŋɛ kagbirshuŋ be kaplɛa so be asheŋ

²⁹ Ndoŋ nna nɛ Mosis naŋ kaŋɛ le: “Enyɛnpe menyi be Ebɔrɛ na e naaŋ baa mur efuliana nɛ menyeeŋ baa kɔ a sɔ bumo be nsawule na nɛ men nya n chena ndoŋ.

³⁰ Enyɛnpe menyi be Ebɔrɛ na kaŋ mur efuliana na be kaman, men baa da so nɛ menyi maaŋ kute bumo be kabɔrɛshuŋ to. Ŋkpal manɛ so, k beeŋ baa la luwu nna n sa menyi. Men sa maŋ kaa fin kepin kananɛ baa shuŋ bumo be agbirana to gba, saŋɛ na so nɛ men baa bɔla loŋ be ekpa so a shuŋ Enyɛnpe Ebɔrɛ na.

³¹ Men sa maŋ kaa shuŋ Enyɛnpe menyi be Ebɔrɛ na ekpa nɛ baa bɔla so a shuŋ bumo be agbirana na. Ŋkpal manɛ so, ashi bumo be kagbirshuŋ to baa kaa wora ekishisheŋ nɛ Enyɛnpe Ebɔrɛ na kishi nna. Bumo alɛ bee kaa mɔ bumo mbia a chɔɔ a lara esarga bumo be agbirsureana so nna.

³² Men baa wora mbraana nɛ mee ta a sa menyi ere kikɛ kasonu nsaa maŋ ta shɛŋ n ti amo so ŋko n lara shɛŋ ashi amo to.”