Ditɛronɔmi 11 - EBƆRƐ BE KAWƆL

Kesha nseŋ wora Enyɛnpe Ebɔrɛ na kasonu be asheŋ

¹ Men baa sha Enyɛnpe menyi be Ebɔrɛ na nsaa wora mbe mbraana kikɛ kasonu.

² Kabre men baa nyiŋi fanɛ menyi nɛ Enyɛnpe Ebɔrɛ na daŋ ŋini ekpa mannɛ menyi be mbia. Menyi e wu Enyɛnpe Ebɔrɛ na ka bɔla mbe yukugboŋ so

³ n wora emamachisheŋ ashi Ijipt be efuli so. Menyi e wu kusɔ nɛ e wora Ijipt be ewura Fɛɛro nɛ mbe basa kikɛ.

⁴ Men wu kananɛ Enyɛnpe Ebɔrɛ na mur Ijipt be benapo nɛ bumo be egbaŋɛ nɛ egbaŋɛturko ashi Teku Peper na to jemanɛ nɛ b daa ju a buu menyi so na.

⁵ Menyi alɛ nyi kusɔ nɛ Enyɛnpe Ebɔrɛ na wora n sa menyi ashi keshishɛrsawule na so pɔɛŋ nɛ men fo nfe.

⁶ Ade be kaman, men wu kusɔ nɛ e wora benyɛn anyɔ nɛ baa tre Datan nɛ Abiram nɛ b la kanyɛn nɛ baa tre Ɛliyab nɛ e shi Ruben be yiri to na be bibinyɛn. Ekama be anishito nɛ kasawule baŋɛ n ta bumo nɛ bumo be nnanto ebi nɛ ewajɛbu nɛ bumo be nyɛrbi nɛ asɔbɔya kikɛ m min.

⁷ Kashenteŋto, menyi gbagba e wu asheŋgboŋ nɛ Enyɛnpe Ebɔrɛ na wora ere kikɛ kenishiso.

⁸ Amoso, men baa wora asheŋ nɛ ŋ kaŋɛ menyi kabre ere kikɛ kasonu. Aloŋ nɛ menyeeŋ tiŋ n dii Jɔɔdan be lɔr na n ya sɔ kasawule nɛ menyee sha keluri to ere n chena so.

⁹ Nseŋ tiŋ n chena kasawule lela nɛ k bee wora adɔjibi ga, nɛ Enyɛnpe Ebɔrɛ na nase kumo be kɔnɔ n sa menyi nananyɛnana nɛ bumo kaman to ebi ere so n chɛr.

¹⁰ Kasawule nɛ menyee yɔ nɛ men ya sɔ n chena so na walɛ a chɔ Ijipt be kasawule na, kakpa nɛ men daa wora ania a wurge menyi be asɔduuso so nchu na.

¹¹ Ama kasawule nɛ menyee sha keluri to ere la abee nɛ ataŋɛ nna nɛ bɔrɛ bee ba kumo so nɛnɛ.

¹² Enyɛnpe menyi be Ebɔrɛ na gbagba e naa keni kasawule na so kafɛ kikɛ.

¹³ Amoso men baa wora mbraana nɛ n ta a sa menyi kabre ere kasonu. Men baa sha Enyɛnpe menyi be Ebɔrɛ na nsaa ta menyi be ŋgbene kikɛ a shuŋ mo.

¹⁴ Nɛ menyee wora loŋ, e beeŋ shin nɛ bɔrɛ e ba jemanɛ nɛ k daga menyi be kasawule so, kumo e la fanɛ dɔchubɔrɛso nɛ kechalaso be bɔrɛ beeŋ ba nɛnɛ n sa menyi, saŋɛ na so menyeeŋ dɔ n nya ayu nɛ yabra belbelso nɛ ɔlif be ŋku nɛnɛ,

¹⁵ nɛ menyi be asɔbɔya e baa nya afitiri lela damta a ji. Menyi alɛ gbagba beeŋ nya ajibi nɛ menyee sha.

¹⁶ Amoso, men baa da so nɛ menyi maaŋ lar Enyɛnpe Ebɔrɛ na kaman nseŋ ya kaa shuŋ agbir.

¹⁷ Nɛ men wora loŋ, Enyɛnpe Ebɔrɛ na beeŋ nya agbo n wɔtɔ menyi nseŋ pɛ bɔrɛ nɛ menyi be adɔsawule e wɔl nɛ menyi be adɔjibi e wora ŋ gben. Kumo be kaman k maŋ chɛr nɛ menyi gbagba e wu m mur kasawule lela nɛ Enyɛnpe Ebɔrɛ na bee sa menyi na so.

¹⁸ Men baa nyiŋi mbraana ere nseŋ ta amo n wɔtɔ menyi be nfɛra nɛ ŋgbene to. Men sibɛ amo n chɛ menyi be enɔana nɛ menyi be nsɔto nɛ a baa la kanyiŋi a sa menyi.

¹⁹ Men baa ŋini menyi be mbia amo nsaa malga amo be asheŋ jemanɛ kikɛ ashi menyi be elaŋ to nɛ jemanɛ nɛ men lar kowu a nite nɛ jemanɛ nɛ men ya dese kanyɛso nɛ jemanɛ nɛ men koso kachipurso.

²⁰ Menyi alɛ e sibɛ amo n deŋi menyi be nwu be mbuna nɛ menyi be nde be mbunagboŋana so.

²¹ Aloŋ e naaŋ shin nɛ menyi nɛ menyi be mbia e chena kasawule nɛ Enyɛnpe menyi be Ebɔrɛ na nase kumo be kɔnɔ n sa men nananyɛnana na so n chɛr. Menyeeŋ chena ndoŋ hale n ya fo durnya ere be lalaloge.

²² Men baa sha Enyɛnpe menyi be Ebɔrɛ na nsaa wora mbraana nɛ n ta a sa menyi kabre ere kasonu nɛnɛ. Men baa wora kusɔ kama nɛ e kaŋɛ menyi kenishipere so nsaa ji kashenteŋ a sa mo.

²³ Aloŋ nɛ Enyɛnpe Ebɔrɛ na beeŋ chɛ menyi to nɛ men sɔ kasawule na. Efuliana nɛ a wɔ ndoŋ na be basa shibi nsaa kɔ eleŋ a chɔ menyi, ama e beeŋ tintiŋ bumo n lar kasawule na so jemanɛ nɛ menyeeŋ baa kɔ bumo na.

²⁴ Kasawule kama nɛ menyeeŋ bɔla so n choŋ beeŋ ki menyeya nɛ menyi be efuli e salga to n shi keshishɛrsawule nɛ k wɔ kelargato be kaseto be kaba so na n ya fo Lebanɔn be abeegboŋ ashi kelargato be esoso nseŋ naŋ yili lɔrgboŋ nɛ baa tre Yufreetes na ashi epeŋilarkpa n ya fo Teku nɛ baa tre Mɛditerenia nɛ k wɔ epeŋitɔrkpa be kaba so na.

²⁵ Kaplɛkama nɛ menyeeŋ yɔ kasawule na so, Enyɛnpe, menyi be Ebɔrɛ na beeŋ shin nɛ kufu a pɛ basa nɛ b wɔ ndoŋ na fanɛ kananɛ e nase kɔnɔ na. Esa kikɛ maaŋ tiŋ ŋ kuŋ menyi akpa.

²⁶ Nɛfa nɛ shoduu be ekpa nɛ mee bugi a sa menyi kabre na.

²⁷ Nɛ fanɛ menyee wora Enyɛnpe menyi be Ebɔrɛ na be mbraana kasonu, menyeeŋ nya nɛfa kabre,

²⁸ ama nɛ fanɛ menyi maa wora mbe mbraana ere kasonu nseŋ ya kaa shuŋ agbirana nɛ men maŋ naŋ shuŋ ŋ ku so bre, kɔnɔsho beeŋ ba menyi so.

²⁹ Enyɛnpe menyi be Ebɔrɛ na kaŋ chɛ menyi to nɛ men sɔ kasawule na n chena so, a daga fanɛ men shɛr kebeegboŋ nɛ baa tre Gɛrizim na so m moli Enyɛnpe Ebɔrɛ na be enɛfa na kumo so nseŋ naŋ shɛr kebeegboŋ nɛ baa tre Ebal na so m moli mbe eshoduu na malɛ kumo so.

³⁰ Abeegboŋ anyɔ ere wɔ Keenanebi nɛ b tase ketaŋɛ nɛ baa tre Jɔɔdan be Ketaŋɛ na to na be kaba nɛ k dese Jɔɔdan be lɔr na be epeŋitɔrkpa be kaba so na nna. Abeegboŋana ere mata ekpa nɛ k dese n taga to kakpa nɛ baa tre Moriya be ndibi cheembi nɛ a wɔ kade nɛ baa tre Gilgaal na be kaba ndoŋ nna.

³¹ Menyee dii Jɔɔdan be lɔr na nna nɛ men ya sɔ kasawule nɛ Enyɛnpe menyi be Ebɔrɛ na bee ta a sa menyi nɛ men chena so na nna na. Nɛ men kaŋ ya sɔ kumo n chena ndoŋ,

³² men baa da so nsaa wora mbraana nɛ n ta a sa menyi kabre ere kasonu.