Ditɛronɔmi 10 - EBƆRƐ BE KAWƆL

Mosis ka naŋ sɔ mbraana na be asheŋ

¹ “Ade be kaman nɛ Enyɛnpe Ebɔrɛ na naŋ kaŋɛ ma le: ‘Shɛl ajembu peŋgeleŋ peŋgelembi anyɔ nɛ a baa du fanɛ sososo peya na nseŋ lɔŋɛ ndibi be deka. Kumo be kaman nɛ fo dii m ba ma kutɔ kebee na so

² nɛ n sibɛ asɔ nɛ n daŋ sibɛ n deŋi ajembu nɛ fo bure na so n deŋi amo so. Kumo be kaman nɛ fo ta ajembu sibɛso na n wɔtɔ deka na to.’

³ Ndoŋ nna nɛ ŋ ku kedibi nɛ baa tre akasia na n lɔŋɛ deka n yili nseŋ shɛl ajembu peŋgeleŋ peŋgelembi fanɛ a dra na nseŋ ta amo n dii kebeegboŋ na so n yɔ.

⁴ Nɛ Enyɛnpe Ebɔrɛ na sibɛ Mbra Kudu na n deŋi amo so fanɛ kananɛ e daŋ wora sososo na. Mbra kudu nɛ e daŋ bɔla edɛ to m malga jemanɛ nɛ an daŋ shɛr kebeegboŋ na ase na e daa la. Enyɛnpe Ebɔrɛ na ka bɛta amo n sa ma

⁵ nɛ n ta amo ŋ gbelge kebeegboŋ na so m ba wɔtɔ deka na to fanɛ kananɛ Enyɛnpe Ebɔrɛ na kaŋɛ na. Amo alɛ kraa wɔ deka na to hale nɛ mbre.”

⁶ (Kede be kaman nɛ Israɛlebi na koso kanyɛn nɛ baa tre Jaakan na be basa be atirbu ase n yɔ kakpa nɛ baa tre Mosera na n ya wora bumo be keeyi to ndoŋ. Ndoŋ nɛ Ɛɛrɔn wu nɛ b puli mo nɛ mo pibinyɛn Eliaza sɔ mo so ŋ ki bɔrɛmatapowura.

⁷ B ka koso Mosera nɛ b ta n yɔ kakpa nɛ baa tre Gudgoda na nseŋ naŋ koso ndoŋ malɛ n yɔ kakpa nɛ baa tre Jotbatta nɛ k kɔ mbombi damta na n ya wora bumo be keeyi to ndoŋ.

⁸ Ashi Sainai be kebeegboŋ na ase na nɛ Enyɛnpe Ebɔrɛ na lara Livai be yiri to be basa ko fanɛ b baa keni kɔnɔkoŋwule be ŋkre be deka na so nsaa shuŋ bɔrɛmatapoana be kushuŋ nseŋ naa nɛfa eyiri nɛ a ka na ashi mbe ketre to. Loŋ nɛ b kraa wora hale nɛ mbre.

⁹ Amoso nɛ Livai be yiri to ebi maŋ nya kachige ashi kasawule na be kebarga to n sa eyiriana na to na. Enyɛnpe Ebɔrɛ na e naaŋ baa la bumo be kapetɛ fanɛ kananɛ e nase kɔnɔ n sa bumo na.)

¹⁰ Jemanɛ nɛ n naŋ ta ajembu peŋgeleŋ peŋgelembi popɔr anyɔ na n dii kebee na so na, nchɛ adena nɛ nnyɛ adena nɛ n naŋ ji ndoŋ fanɛ kananɛ n daŋ keji ndoŋ na. Ndoŋ nna nɛ Enyɛnpe Ebɔrɛ na naŋ nu ma kekule nseŋ shuli fanɛ e maaŋ mur bumo.

¹¹ Kumo be kaman nɛ e kaŋɛ ma fanɛ m ba juŋkpar menyi, saŋɛ na so menyeeŋ tiŋ n ya kɔ n sɔ kasawule nɛ e nase kumo be kɔnɔ n sa men nananyɛnana na nɛ k baa la menyeya.

Kusɔ nɛ Enyɛnpe Ebɔrɛ na bee sha be asheŋ

¹² To, Israɛl be basa, men nu kusɔ nɛ Enyɛnpe menyi be Ebɔrɛ na bee fin menyi kutɔ. Kumo e la fanɛ men bunyaŋ mo nseŋ bɛ mbe mbra kikɛ so nseŋ ta menyi be ŋgbene kikɛ n sha mo nseŋ shuŋ mo,

¹³ nseŋ naŋ wora mbe mbraana nɛ mee ta a sa menyi kabre ere kikɛ kasonu. Nɛ men wora loŋ, asheŋ beeŋ nyalɛ n sa menyi.

¹⁴ Kusɔ kama la Enyɛnpe menyi be Ebɔrɛ na peya nna, mannɛ kasawule ere nɛ asɔ nɛ a wɔ kumo to nawule ama awɔlpa nɛ ebɔrɛso kikɛ la mo peya nna.

¹⁵ Enyɛnpe Ebɔrɛ na daŋ sha men nananyɛnana na ga so nna nɛ e lara menyi nseŋ yige basa nɛ b ka na. Hale nɛ mbre men kraa la mbe basa laraso nna.

¹⁶ Amoso yili kabre a yɔ, men baa wora Enyɛnpe Ebɔrɛ na kasonu nseŋ yige menyi be ŋkpensheŋ na.

¹⁷ Enyɛnpe menyi be Ebɔrɛ na e la Ebɔrɛ nɛ e kɔ eleŋ a chɔ agbirana kikɛ nseŋ naa la benyɛnpe to be Enyɛnpe, Ebɔrɛ lempo nɛ mbe asheŋ shi nsaa kɔ kufu. Mo alɛ maa kpɛa to ŋko a tu basa a sɔ asɔ pɔɛŋ nsaa wora asheŋ a sa bumo.

¹⁸ Mo ere Enyɛnpe Ebɔrɛ na e naa kuŋ amunibi nɛ bekulpoche nsaa keni befɔ nɛ b wɔ anyi be basa to so, a sa bumo ajibi nɛ asɔbuuso.

¹⁹ Amoso men baa keni befɔ nɛ b tu menyi n chena na so, ŋkpal manɛ so, menyi alɛ gba daa la befɔ nna ashi Ijipt be efuli so.

²⁰ Kumo be kaman, men baa sa Enyɛnpe menyi be Ebɔrɛ na bunyaŋ nsaa shuŋ mo nawule. Men baa ji kashenteŋ a sa mo nsaa nase nnɔ ashi mo nawule be ketre to.

²¹ Men baa kpaŋ mo, ŋkpal manɛ so, mo e la menyi be Ebɔrɛ nɛ menyi alɛ gbagba wu asheŋgboŋ nɛ a bee mɔ kɔnɔ nɛ e wora kenishiso.

²² Menyi nananyɛnana nɛ b daŋ yɔ Ijipt be efuli so na daa la basa adushunu nna. Ama naniere Enyɛnpe menyi be Ebɔrɛ na shin nɛ men wora keshi a du fanɛ achɛkpabi nɛ a wɔ awɔlpa to na.