Ditɛronɔmi 1 - EBƆRƐ BE KAWƆL

Mosis be lalaloge be kamalga be asheŋ

¹ Mosis be mmalga nɛ e daŋ malga n sa Israɛl be basa jemanɛ nɛ b daa wɔ keshishɛrsawule so ashi lɔr nɛ baa tre Jɔɔdan na be epeŋilarkpa be kaba so na e wɔ kawɔl ere to na. B daa wɔ Jɔɔdan be ketaŋɛ nɛ k mata kade nɛ baa tre Suuf nɛ k dese kade nɛ baa tre Paran na nɛ nde nɛ baa tre Tofɛl nɛ Laban nɛ Hazerɔf nɛ Dizahab na be kefɛato nna.

² Nchɛ kudukako nɛ esa beeŋ ta n shi kebee nɛ baa tre Sainai na ase m bɔla Edɔm be kebeesawule so be ekpa na n ya fo kakpa nɛ baa tre Kadɛsh Bania na.

³ Israɛl be basa na ka lar Ijipt be efuli so be kafɛ adenasopo na be kufɔl kudukakosopo na be kachɛ juŋkparso na nɛ Mosis kaŋɛ basa na kusɔ nɛ Enyɛnpe Ebɔrɛ na kaŋɛ mo fanɛ e kaŋɛ bumo na kikɛ.

⁴ Pɔɛŋ nɛ Mosis malga bumo kutɔ na nɛ e tiŋ ŋ kɔ m pɔɔ Amɔriebi be ewura Sihɔn nɛ e chena kade nɛ baa tre Hɛshbɔn a ji kuwura na nɛ Bashan be ewura Ɔg nɛ mo alɛ bee ji kuwura nde nɛ baa tre Ashterɔf nɛ Edrei na so.

⁵ Jemanɛ nɛ basa na daa wɔ Mowabebi be kasawule nɛ k dese lɔr nɛ baa tre Jɔɔdan na be epeŋilarkpa be kaba so na nɛ Mosis fara a malga a bugi Ebɔrɛ be mbraana nɛ keŋiniana to. E yɛ:

⁶ “Jemanɛ nɛ an daa wɔ Sainai be kebee na ase na, nɛ Enyɛnpe anyi be Ebɔrɛ na kaŋɛ anyi le: ‘Men chena kebee ere ase n chɛr ga.

⁷ Men kaa keeyi nseŋ fara a yɔ Amɔriebi be kepreŋsawule nɛ mboŋ nɛ a kulti ndoŋ na so, an ta fanɛ Jɔɔdan be ketaŋɛ na nɛ keplasawule nɛ abonfu nɛ a dese a laŋɛ kelargato be kaseto na nɛ Teku nɛ baa tre Mɛditerenia na be ekarso. Men yɔ Keenan be kasawule so hale m baŋ so n yɔ Lebanɔn be abee ase n ya fo Lɔrgboŋ nɛ baa tre Yufreetes na ase.

⁸ Le be kasawule ere nɛ ma, Enyɛnpe Ebɔrɛ na nase kɔnɔ fanɛ meeŋ ta n sa Eebraham nɛ Aizek nɛ Jeekɔb nɛ b la men nananyɛnana na nɛ bumo be kaman to ebi na. Men yɔ n ya sɔ kumo n chena so.’ ”

Mosis ka lara bejuŋkparpo be asheŋ

⁹ Ndoŋ nna nɛ Mosis kaŋɛ basa na le: “An ka daa wɔ kebee nɛ baa tre Sainai na ase na, n daŋ kaŋɛ menyi fanɛ kebaajuŋkpar menyi be kushuŋ na shi ga n sa ma. N nawule maaŋ tiŋ a shuŋ kumo.

¹⁰ Enyɛnpe, menyi be Ebɔrɛ na malɛ naŋ shin nɛ men wora keshi fanɛ achɛkpabi ashi awɔlpa so.

¹¹ Enyɛnpe, men nananyɛnana be Ebɔrɛ na e shin nɛ men naŋ wora keshi alegaiso gba n ti so nseŋ shin nɛ kusɔ kama bee nite nɛnɛ a sa menyi fanɛ kananɛ e nase kɔnɔ na!

¹² Ama n nawule maaŋ tiŋ n shuŋ demuji be kushuŋ na ashi menyi to.

¹³ Amoso, yiri kikɛ to be basa e lara benyɛn nyiashempo nɛ b kɔ kenyi nɛ kepinto nɛnɛ nɛ n shin nɛ b ki eyiriana na to be bejuŋkparpo,

¹⁴ nɛ men shuli fanɛ loŋ walɛ nseŋ daga kewora.

¹⁵ Ndoŋ nna nɛ n shin nɛ basa nɛ men lara eyiriana na to nɛ b nyi asheŋ nsaa kɔ kenyi nɛ kepinto nɛnɛ na ki menyi be bejuŋkparpo. Beko daa keni basa kagboŋ so, nɛ beko daa keni basa kalfa so, nɛ beko bee keni basa adunu so nɛ beko malɛ bee keni basa kudu so.

¹⁶ Loŋ be jemanɛ na n daŋ kaŋɛ demujipoana na nna fanɛ b baa keni to nsaa ji asheŋ kama nɛ a beeŋ ba menyi to na nɛ amo be ekpa so. Hale demu na la menyi be basa nawule nna ŋko men be eko nɛ befɔ nɛ b wɔ menyi to na be eko be demu gba nna, a daga fanɛ b ji kumo nɛ kumo be ekpa so.

¹⁷ Men sa maa kpɛa to ashi menyi be demuji to. Ekpa koŋwule so a daga fanɛ men baa ji bepɔshipo nɛ belempo kikɛ demu. Men sa maa ŋana esa kikɛ, ŋkpal manɛ so, Ebɔrɛ beeŋ chɛ menyi to nɛ men ji asheŋ nɛnɛ. Nɛ fanɛ demu ko du kpakpa n sa menyi, men ta kumo m bar ma nɛ n ji kumo.

¹⁸ Ŋ ka ŋini bejuŋkparpo na asɔ nɛ baaŋ baa wora n loge nɛ n sa menyi Enyɛnpe Ebɔrɛ na be mbraana a laŋɛ kusɔ kama nɛ menyeeŋ baa wora be kaplɛa so.”

B ka shuŋi basa fanɛ b ya dara kasawule ko ŋ keni be asheŋ

¹⁹ “Ade be kaman nɛ an wora kusɔ nɛ Enyɛnpe, anyi be Ebɔrɛ na kaŋɛ fanɛ an wora na nseŋ lar Sainai be kebee na ase m bɔla keshishɛrsawule palɛlɛ nɛ k kɔ kufu na so a yɔ Amɔriebi be kepreŋsawule so. An ka ya fo kakpa nɛ baa tre Kadɛsh Baania na,

^20-21 nɛ ŋ kaŋɛ menyi le: ‘Men fo Amɔriebi be kepreŋsawule so nna na. Kumo nɛ Enyɛnpe Ebɔrɛ, nɛ an nananyɛnana shuŋ na bee ta a sa anyi na. Men yɔ n ya chena kumo so fanɛ kananɛ e kaŋɛ na. Men sa maa pɔ aba ŋko a lɔ kufu.’

²² Ndoŋ nna nɛ menyi kikɛ ba ŋ kutɔ m ba kaŋɛ le: ‘Shin nɛ an shuŋi benyɛn ko nɛ b ya ŋana ŋ keni kasawule na, saŋɛ na so, baaŋ ba kaŋɛ anyi nde nɛ a wɔ ndoŋ nɛ ekpa nɛ anyeeŋ bɔla so n luri amo to be asheŋ.’

²³ Kusɔ nɛ men daŋ kaŋɛ na daa la nfɛra lela nna, amoso nɛ n lara esa ashi eyiri kudu anyɔ na be kekama to nɛ b wora benyɛn kudu anyɔ,

²⁴ nɛ b yɔ kepreŋsawule na so hale n ya lar ketaŋɛ nɛ baa tre Ɛshkɔl na so n ya dara kumo.”

²⁵ Kumo be kaman nɛ b bar anyi asɔrso nɛ b wu ndoŋ, nseŋ kaŋɛ anyi fanɛ kasawule lela ga nɛ Enyɛnpe anyi be Ebɔrɛ na bee ta a sa anyi na.

²⁶ Ama men kini kewora Enyɛnpe menyi be Ebɔrɛ na kasonu nseŋ kini keyɔ kasawule na so.

²⁷ Men daa wɔ menyi be ewajɛbu to nna a munto a bile asheŋ a sa abar a kaŋɛ le: ‘Enyɛnpe Ebɔrɛ na kishi anyi nna nseŋ lara anyi Ijipt be efuli so m ba nɛ e ba sa Amɔriebi nɛ b mɔ anyi.

²⁸ Manɛ so nɛ anyi beeŋ yɔ ndoŋ? Anyi bee lɔ kufu nna, ŋkpal manɛ so, basa nɛ an shuŋi na kaŋɛ anyi fanɛ basa nɛ b wɔ ndoŋ na kɔ eleŋ a chɔ anyi nsaa du jeŋgreŋ a chɔ anyi. Kumo be kaman, bumo alɛ naa wɔ ndegboŋ nɛ b pɔr egbal jeŋgreŋ, nɛ a du fanɛ a ka fo awɔlpa to, ŋ kulti na to. B yɛ, b wu basa nɛ b pɔlto nsaa du jeŋgreŋ gba ndoŋ.’

²⁹ Ndoŋ nna nɛ ŋ kaŋɛ: ‘Men sa maa ŋana basa na.

³⁰ Enyɛnpe men be Ebɔrɛ na e naaŋ juŋkpar ŋ kɔ n sa menyi, fanɛ kananɛ men wu e ka wora ashi Ijipt be efuli so

³¹ nɛ keshishɛrsawule so na. Men wu kananɛ e keta menyi, fanɛ kananɛ etuto bee keta mbe kebia a nite na, m ba nfe kayurwushiso.’

³² Ama asheŋ nɛ ŋ kaŋɛ menyi na kikɛ be kaman, men kraa maŋ bɛ Enyɛnpe Ebɔrɛ

³³ nɛ jemanɛ kikɛ e daa juŋkpar menyi a ŋini menyi kakpa nɛ menyi beeŋ yuu keeyi n chena ashi menyi be enite to na be kɔnɔ so. Edɛ be kabulpi so nɛ e daa bɔla a juŋkpar menyi kanyɛso, nsaa bɔla kuwɔlpa so a juŋkpar menyi kapaso a ŋini menyi ekpa nɛ kakpa nɛ menyi beeŋ yuu keeyi n chena.

Enyɛnpe Ebɔrɛ na ka gberge Israɛl be basa kusoe be asheŋ

³⁴ “Enyɛnpe Ebɔrɛ na ka nu menyi be kemunto n fubel na nɛ e nya agbo nseŋ bɔ ntaŋ ŋ kaŋɛ le,

³⁵ ‘Menyi ere be kekurgeto be basa lubi ere be esa koŋwule gba maaŋ yɔ kasawule lela nɛ n nase kɔnɔ fanɛ meeŋ ta n sa men nananyɛnana na so kikɛ.

³⁶ Jefune pibinyɛn nɛ baa tre Kalɛb na nawule e naaŋ yɔ kumo so, ŋkpal manɛ so, mo e ta mbe kagbene kikɛ m bɛ ma so. Amoso, meeŋ ta kasawule nɛ e ya dara ŋ keni na n sa mo nɛ mbe kaman to ebi.’ ”

³⁷ Ŋkpal menyi so, Enyɛnpe Ebɔrɛ na daŋ nya agbo nna n wɔtɔ ma alɛ gba nseŋ kaŋɛ le: ‘Mosis, fo alɛ gba maaŋ yɔ kasawule na so.

³⁸ Ama leŋ Nun pibinyɛn, Joshuwa nɛ e la fo echɛtopo na to nɛ e juŋkpar Israɛl be basa na nɛ b ya kɔ n sɔ kasawule na n chena so.’

³⁹ Ade kikɛ be kaman, nɛ Enyɛnpe Ebɔrɛ na naŋ kaŋɛ anyi kikɛ le: ‘Menyi be mbia nɛ b kraa la mbiwurbi nsaa maŋ nyi kulubi nɛ kelela na, e naaŋ yɔ kasawule na so. Mbia nɛ men kaŋɛ fanɛ men doŋana beeŋ ya sɔ na, nɛ meeŋ ta kasawule na n sa nɛ b chena so.

⁴⁰ Ama menyi ere e bɛta m bɔla ekpa nɛ k bee yɔ Teku Peper na ase na n yɔ keshishɛrsawule na so.’

⁴¹ Ndoŋ nna nɛ men kaŋɛ le: ‘Mosis, an wora alubi n da Enyɛnpe Ebɔrɛ na so. Ama, naniere anyeeŋ yɔ kebeesawule na so n ya kɔ fanɛ kananɛ Enyɛnpe, anyi be Ebɔrɛ na kaŋɛ anyi na.’ Kumo be kaman nɛ men be ekama bela ase nɛ e ya kɔ, a fɛ fanɛ kekɔ m pɔɔ kebeesawule na so na maŋ du kpakpa.

⁴² Ama le nɛ Enyɛnpe Ebɔrɛ na daŋ naŋ kaŋɛ ma: ‘Kpele bumo kusoe fanɛ b sa maŋ kaŋ yɔ n ya kɔ, ŋkpal manɛ so, m maaŋ tu bumo n yɔ. Bumo doŋana beeŋ pɔɔ bumo so.’

⁴³ Ndoŋ nna nɛ ŋ kaŋɛ menyi kusɔ nɛ Enyɛnpe Ebɔrɛ na kaŋɛ, ama men daŋ maŋ nu. Men daŋ lar mo kaman nna nseŋ yɔ abeesawule na so kamoowuso.

⁴⁴ Ndoŋ nna nɛ Amɔriebi nɛ b daa wɔ abee na so na gbelge m ba menyi so fanɛ emushoŋ n ju menyi hale n ya fo kakpa nɛ baa tre Hɔɔma nɛ k wɔ Edɔm be kebeesawule so n ya kɔ m pɔɔ menyi so ndoŋ.

⁴⁵ Kumo be kaman nɛ men shu n tre Enyɛnpe Ebɔrɛ na fanɛ e chɛ menyi to, ama e daŋ maŋ nu n sa menyi.

Israɛl be basa ka ji nfɛ damta keshishɛrsawule so be asheŋ

⁴⁶ Amoso, nɛ an chena kakpa nɛ baa tre Kadɛsh na n chɛr na.