Aŋasa 11 - EBƆRƐ BE KAWƆL1 Enyɛnpe Ebɔrɛ kishi kapuni be kasɔkarga ga. Kasɔkarga nɛ k bɔla ekpa e naa fuli mbe kagbene. 2 Kamoowuwuraana maa chɛr nsaa ji anishinyɔr. Kamubrase bre bee sa esa kanyiasheŋ nna. 3 Basa lela be kashenteŋji e naa kuŋ bumo. Basa nɛ esa maaŋ tiŋ n yirda bre gbagba be kebirkɔnshi e naa mur bumo. 4 Kedamaya maaŋ ba kɔ tɔnɔ n sa fo gbagba fo kaluwuachɛ, ama kashenteŋji bre beeŋ tiŋ m mɔlga fo ŋkpa. 5 Kashenteŋji bee shin nɛ kebaawɔtɔ bee ki pɔpɔtɔ nna a sa esa lela, ama belubiworapo bre gbagba e naa da bumo amu a lɛ. 6 Kecheembiya e naa mɔlga beshenteŋjipo, ama basa nɛ esa maaŋ tiŋ n yirda bre gbagba be kejimuni e naa ki kejigbelɛ a pɛ bumo. 7 Belubiworapo nɛ tama e naa wu, nɛ bumo be yirda nɛ k deŋ bumo be kedamaya so e ki fuloŋ. 8 Basa cheembi bee nya kekuŋ ashi tɔrɔ nɛ k bee ba belubiworapo so na to nna. 9 Basa nɛ b maa ŋana Ebɔrɛ be mmalga beeŋ tiŋ n yɛr esa kemur to, ama basa cheembi be kanyiasheŋ be mmalga bee sa esa kumɔlga nna. 10 Beshenteŋjipo baŋ dii dama, bumo be kade to ebi kikɛ be ŋgbene bee fuli bumo nna. Alubiworapo malɛ baŋ wu mbe kade to ebi be ŋgbene bee fuli bumo nna. 11 Basa cheembi be nɛfa bee maŋ bumo be kade so nna, ama basa lubi bre be mmalga bee mur bumo be kade nna. 12 Ewulpo e naa ji beko be asheŋ, enyiashempo bre bee loto nna. 13 Esheŋjipo kikɛ maŋ kɔ ashiri, ama feeŋ tiŋ n yirda esa nɛ basa bee sa yirda bre. 14 Efuli nɛ k maŋ kɔ bejuŋkparpo nyiashempo bee mur nna; ama besoetojipo damta bee kuŋ efuli nna. 15 Nɛ fo yili kajinamu n sa esa nɛ fo maŋ nyi, feeŋ wora n daa nyi nna. Amoso sa maŋ ta fo kumu m baga nfɔl. 16 Eche nɛ e bee bugi enɔ a kɛ bee nya kemaŋkura nna, ama eche nɛ e maŋ kɔ da bre bee bar anishinyɔr nna. Etɔlpo maaŋ dii dama kikɛ, ama basa nɛ baa pere kenishi a shuŋ bre beeŋ dii dama. 17 Nɛ fee wora kelela fo kumu nɛ fee wora a sa. Nɛ basa be awurfoŋ bee wora fo ebel, fo alɛ gba beeŋ luri tɔrɔ to. 18 Belubiworapo maa nya tɔnɔ kikɛ, ama esa nɛ e bee wora kelela bre maaŋ paŋ kumo be tɔnɔ kikɛ. 19 Esa kama nɛ e yili mbe kagbene to fanɛ e beeŋ wora kelela beeŋ ji efute tenteŋ, ama esa kama nɛ e yili mbe kagbene to fanɛ e beeŋ wora alubi bre maaŋ ji efute n chɛr kikɛ. 20 Enyɛnpe Ebɔrɛ kishi nfɛra lubiwura ga, ama e bee sha bekama nɛ baa wora asheŋ lela bre ga. 21 K baa dese nna geeŋ fanɛ baaŋ gberge belubiworapo kusoe, ama bekama nɛ baa wora asheŋ niŋiso bre beeŋ gelge kasogberge. 22 Eche nɛ e walɛ kebita nsaa maŋ kɔ da du fanɛ shuwa be kepinibi nna ashi preku be kamuna to. 23 Asɔ kama nɛ basa lela bee fin bee ki asɔ lela nna. Ama belubiworapo bre baŋ nya asɔ k bee pɛ basa agbo nna. 24 Kakɛ maa loge asɔ. Beko bee kɛ ga, bumo alɛ nsaa dii dama saŋkikɛ, nɛ beko malɛ kɔ miri ga nsaa la betirpo saŋkikɛ. 25 Fo baa bugi enɔ a kɛ feeŋ dii dama. Chɛ beko to nɛ beko malɛ e chɛ fo to. 26 Basa bee sho bumo nɛ baa ti ajibi so a yili fanɛ amo be yawu e di pɔɛŋ nɛ b fa na kɔnɔ nna, nsaa chɔrɔ bekama nɛ baa fa amo saŋkikɛ na. 27 Esa kama nɛ e bee fin asheŋ lela bee nya asheŋ lela nna, nɛ asheŋ lubi malɛ bee tu ekama nɛ e bee fin asheŋ lubi. 28 Bekama nɛ b ta bumo be tama n deŋi bumo be kanya so beeŋ gbaŋgbaŋ n tɔr fanɛ ketarso be afantaŋ, ama basa cheembi bre beeŋ baa purge afantaŋ popɔr fanɛ kechaliso be ndibi nna saŋkama. 29 Bekama nɛ baa fin asheŋ lubi a ba bumo be laŋ to ebi so maaŋ nya kapetɛ n ji kikɛ. Bewulpo malɛ beeŋ baa la benyiashempo be anya nna saŋkama. 30 Kecheembiya bee sa ŋkpa nna, ama kumu kpakpaso be kebaawɔtɔ bre bee mɔ nna. 31 Nɛ basa lela bee nya kelela be kakɔka durnya ere to, kumo ere kashenteŋto, basa lubi gba beeŋ nya kasogberge. |
© 2015 GILLBT Ghana Institute of Linguistics, Literacy and Bible Translation