Aizaaya 9 - EBƆRƐ BE KAWƆL

B ka kurge ebi ko n sa anyi be asheŋ

¹ Ama basa nɛ b daŋ ji awurfoŋ na maaŋ naa wɔ ebesa to. Zɛbyulɔn nɛ Naftali be eyiriana be nsawule daŋ ji nyɔmɔ nna, ama echefoso kemaŋkura beeŋ ba kebonfu nɛ k yili Teku nɛ baa tre Mɛditerenia na be epeŋilarkpa be kaba so n dese n ya fo lɔr nɛ baa tre Jɔɔdan na, hale n ta n ya fo Galili be kasawule nɛ nnyamase tase so na so ebi so.

² Basa nɛ baa nite tentembiri to na wu kefultogboŋ ko. Kumo e la kebaanyi Ebɔrɛ na. Kefultogboŋ na lar nna n fulto n yuu ekama nɛ e wɔ kasawule nɛ k la luwu be tentembiri mina na so so.

³ Enyɛnpe Ebɔrɛ, fo shin nɛ fo basa wora keshi n ti so; fo alɛ nseŋ shin nɛ bumo be ŋgbene fuli bumo. Baa ji eyur kagbenefuliso ashi kusɔ nɛ fo wora to nna, fanɛ kananɛ basa nɛ b teŋi ayu be ŋgbene bee fuli bumo na, ŋko fanɛ basa nɛ b kɔ n suge asɔ kena to nsaa barga amo to na.

⁴ Ŋkpal manɛ so, fo e pɔɔ basa nɛ b ta fo basa ŋ ki anya a kɔrfɛ bumo ŋkpal eleŋ nɛ b kɔ so na so. Fo e kɔ n sɔ bumo fanɛ kananɛ dra na fo mɔlga fo basa ashi Midian be efuli so be benapo be enɔ to na.

⁵ Benapo nɛ b bɛ abar so a nite be asɛbtagboŋ nɛ bumo be asɔbuuso nɛ ŋklaŋ gbiti na kikɛ beeŋ chɔɔ edɛ to m mur.

⁶ Ebɔrɛ sa anyi ebi ko! E sa anyi ebinyɛn! Mo e naŋ baa la anyi be ewura. Baaŋ tre mo Mamachi be asoetojipo, nɛ Ebɔrɛ Lempo nɛ Etuto nɛ e wɔtɔ Mbaanaayɔ nɛ Kayurwushi be Ewurbi.

⁷ Mbe kuwurji be eleŋgboŋ beeŋ baa wora keshi a ti so; mbe kuwurji beeŋ baa kɔ kayurwushi jemanɛ kikɛ. E beeŋ ji kuwura fanɛ ewura Deevid be kanaŋ to be esa, nseŋ shin nɛ mbe eleŋgboŋ e baa yil kashenteŋ nɛ kusɔ nɛ k daga so. K beeŋ fara naniere hale mbaanaayɔ. Enyɛnpetale Ebɔrɛ na gbagba e naŋ shin nɛ ade kikɛ e wora.

Enyɛnpe Ebɔrɛ na ka beeŋ gberge Israɛl kusoe be asheŋ

⁸ Enyɛnpe Ebɔrɛ na tiŋ n fiɛ Israɛl be basa nɛ b la Jeekɔb be kaman to ebi na so.

⁹ Bumo kikɛ, nɛ ekama nɛ e wɔ bumo be kadegboŋ nɛ baa tre Samɛria na nyi kumo be asheŋ. Ama b daŋ kpeŋ nna nsaa wu bumo be amu nseŋ daŋ kaŋɛ le:

¹⁰ “Nwu nɛ an ta ebirkesi m pɔr na tɔr, ama anyeeŋ ta ajembu m pɔr n tal amo to. Elarbeŋ nɛ an ku ndibi nɛ baa tre sikamɔɔ n wora na buri to, ama anyeeŋ ku ndibi nɛ baa tre sida na be alela n wora elarbeŋ n tal amo to.”

¹¹ Ndoŋ nna nɛ Enyɛnpe Ebɔrɛ na shin nɛ bumo doŋana kre m ba nɛ b ba kɔ bumo kena.

¹² Enyɛnpe Ebɔrɛ na daŋ shin nna nɛ Siriya be benapo shi epeŋilarkpa nɛ Filisti be benapo malɛ shi epeŋitɔrkpa m bela ase m ba kɔ Israɛl be basa kena m mur bumo. Ama amo nɛ amo kikɛ Enyɛnpe Ebɔrɛ na be agbo kra maŋ wushi. E kraa shin nɛ e gberge bumo kusoe nna n ti so.

¹³ Enyɛnpetale Ebɔrɛ be kasogberge nɛ e sa Israɛl be basa na be kaman, b kra maŋ tuba m bɛta m ba mo kutɔ.

¹⁴ Amoso kachɛ koŋwule nɛ Enyɛnpe Ebɔrɛ na beeŋ ta ŋ gberge Israɛlebi na nɛ bumo be bejuŋkparpoana kusoe nseŋ mur bumo kikɛ kuraa.

¹⁵ E beeŋ mur bumo be bewurjipoana nɛ bejuŋkparpoana nɛ anebiana nɛ b maa ji kashenteŋ na kikɛ.

¹⁶ Basa nɛ baa juŋkpar basa ere shin nɛ b foe ekpa nna nseŋ mel to kikɛ.

¹⁷ Amoso Enyɛnpe Ebɔrɛ na maaŋ shin nɛ mbrantiɛfɔlbi na be ekama e nya n shile. Mo alɛ maaŋ wu bekulpoche nɛ amunibiana na be ekama kuwɔr. Ŋkpal manɛ so basa na kikɛ la amu kpakpaso wuraana nɛ b kini Ebɔrɛ nna. Bumo be malga kikɛ gba daa la asheŋ lubi be mmalga nna. Ama amo nɛ amo kikɛ, Enyɛnpe Ebɔrɛ na be agbo kra maaŋ wushi. E kraa shin nɛ e gberge bumo kusoe n ti so nna.

¹⁸ Basa na be kumu kpakpaso bee salga to fanɛ edɛ nɛ k bee chɔɔ kiyi a ji afitiri wɔlso a mur na nna. K du fanɛ edɛ ka ji kupo n loge nɛ edishi bee kaa na nna.

¹⁹ Enyɛnpetale Ebɔrɛ na ka nya agbo so, mbe kasogberge bee chɔɔ nna fanɛ edɛ a mur basa na ashi kasawule na kikɛ so, nɛ k ki fanɛ ekama nɛ mbe kumu so be asheŋ nna na.

²⁰ Basa bee fuu ajibi kama nɛ b wu kenishiso nna a ji ashi efuli na be kaplɛkama, ama akoŋ kraa mɔ bumo. B daa daŋɛ bumo be mbia gba nna a we!

²¹ Manase be yiri to be basa nɛ Efrayim be yiri to be basa daa kɔ abar nna nseŋ naa chɛ abar to a kɔ Juda be yiri to be basa kena. Ama amo nɛ amo kikɛ, Enyɛnpe Ebɔrɛ na be agbo kra maaŋ wushi. E kraa shin nɛ e gberge bumo kusoe nna n ti so.