Aizaaya 7 - EBƆRƐ BE KAWƆL

Kubɔya nɛ k yɔ ewura Ahaz kutɔ be asheŋ

¹ Ewura Ahaz, mo tuto e daa la Jotam nɛ mo nananyɛn malɛ daa la Uzaya. Jemanɛ nɛ ewura Ahaz daa ji kuwura Juda be efuli so na nɛ Siriya be efuli so be ewura, Rezin nɛ Israɛl be efuli so be ewura nɛ baa tre Pɛka, nɛ e la Remaliya pibinyɛn na, daŋ cha abar m ba kɔ Jerusalɛmebi kena nna, ama b daŋ maŋ tiŋ ŋ kɔ n sɔ kadegboŋ na.

² Juda be ewura ka daŋ nu fanɛ Siriya be efuli so be benapo ba ti Israɛl be benapo so, nɛ kufu pɛ ewura Ahaz nɛ mbe basa kikɛ ga nɛ baa chicha fanɛ afu ka bee ber ndibi so na.

³ Ndoŋ nna nɛ Enyɛnpe Ebɔrɛ na kaŋɛ anebi Aizaaya le: “Keta fo pibinyɛn nɛ baa tre Shiya Jashub nɛ kumo be kifito la Basa gbrɛbi e naaŋ bɛta m ba na, nɛ men yɔ ewura Ahaz kutɔ. Menyeeŋ ya wu mo ashi ekpa nɛ k dese m mata kɔrɛwuraana na be eshuŋkpa nɛ k wɔ nchu be kubɔr nɛ k shi esoso a ba kadegboŋ na be lalaloge to na ase.

⁴ Men kaŋ wu mo nɛ fo kaŋɛ mo fanɛ e shin nɛ mbe kagbene e dese mo. E saa maa ŋana ewura Rezin nɛ ewura Pɛka. B nya agbo ga bre, ama bumo alɛ baa du fanɛ ndibi anyɔ ka kɔ edɛ nsaa dese a duŋ gbrɛgbrɛbi nna.

⁵ Siriya be efuli so be basa nɛ Israɛl nɛ ewura Pɛka e kre kebaamur menyi a kaŋɛ le:

⁶ ‘Men shin nɛ an ya kɔ Juda be efuli so ebi kena m pɔɔ bumo so nseŋ barga kasawule na to n sa abar, nseŋ ta kanyɛn nɛ baa tre Tabil na pibinyɛn ŋ ki ewura n chena ndoŋ.’

⁷ Ama ma, Enyɛnpetale Ebɔrɛ na e kaŋɛ fanɛ loŋ maaŋ wora kikɛ.

⁸ Ŋkpal manɛ so, Siriya be efuli na maŋ kɔ eleŋ a chɔ kumo be kadegboŋ nɛ baa tre Damaskɔs na, nɛ Damaskɔs malɛ maŋ kɔ eleŋ a chɔ ewura Rezin. Ta a ba nfɛ adeshe nɛ anu be jemanɛ so Israɛl be efuli na bre beeŋ mur a maaŋ naa wɔtɔ gba.

⁹ Israɛl be efuli na maŋ kɔ eleŋ a chɔ kumo be kadegboŋ nɛ baa tre Samɛria na, nɛ Samɛria malɛ maŋ kɔ eleŋ a chɔ ewura Pɛka. Nɛ Juda be ewura, Ahaz, nɛ mbe benimuana maŋ yirda ma bre, baaŋ kɔ n tɔr.”

Immanuɛl be tɔɔnɛ be asheŋ

¹⁰ Kede be kaman nɛ Enyɛnpe Ebɔrɛ na naŋ ta kubɔya ere n ya sa ewura Ahaz.

¹¹ E yɛ: “Kule Enyɛnpe fo Ebɔrɛ na nɛ e sa fo tɔɔnɛ ko a ŋini fanɛ kusɔ nɛ e kaŋɛ na beeŋ wora m bɔlɔ so. K beeŋ tiŋ n shi kasawule be kechimbi to ŋko ebɔrɛso.”

¹² Ndoŋ nna nɛ Ewura Ahaz kaŋɛ: “M maaŋ kule n fin tɔɔnɛ kikɛ. Ŋkpal manɛ so, m maa sha kewora Enyɛnpe Ebɔrɛ na ŋ keni.”

¹³ Nɛ Aizaaya malɛ kaŋɛ le: “Ewura Deevid be kamanebi, men kaŋ asoe n nu nfe. Menyee kaa wora edimɛdi a keni. Menyee sha kewora Ebɔrɛ gba nna ŋ keni a?

¹⁴ To, kumo ere Enyɛnpe Ebɔrɛ na gbagba e naaŋ sa anyi tɔɔnɛ. Kasuŋgurbia nɛ e maŋ nyi enyɛn ŋ ku so beeŋ di kedampo ŋ kurge ebinyɛn nseŋ nase mo ketre Immanuɛl. Kumo be kifito e la fanɛ Ebɔrɛ wɔ anyi kutɔ.

¹⁵ Kebia na baŋ daŋ m pin asheŋ, nsaa nyi kelela nɛ kulubi, e beeŋ baa nuu kenyipochu nsaa ji mushoŋ.

¹⁶ Ama pɔɛŋ nɛ loŋ be jemanɛ malɛ e fo, bewura anyɔ nɛ fee ŋana na be nsawule beeŋ mur a dese fuloŋ.

¹⁷ Ama Enyɛnpe Ebɔrɛ na beeŋ shin nɛ etɔrɔ damta nɛ a chɔ etɔrɔ kama nɛ a daŋ ba menyi so, yili jemanɛ nɛ Israɛl nɛ Juda be kuwurji barga to m ba fo kabre na, e ba fo nɛ fo basa nɛ fo tuto be laŋ to ebi kikɛ so. E beeŋ shin nɛ efuli nɛ baa tre Asiriya na be ewura gba e ba kɔ menyi kena.

¹⁸ Loŋ be jemanɛ na kaŋ fo, Enyɛnpe Ebɔrɛ na beeŋ foŋ kafoli nɛ k baa la tɔɔnɛ n sa Ijipt be efuli so be basa, nɛ b shi lɔrgboŋ nɛ baa tre Nail na ase m ba menyi so fanɛ ashushombi na. Kumo be kaman nɛ Asiriya be basa malɛ e shi bumo be kasawule so m ba menyi so fanɛ emushoŋ na.

¹⁹ Baaŋ mel abar so n sɔ ataŋɛ chiŋgeliŋ to nɛ abeelaŋ to nɛ kupuŋ to kikɛ nɛ asɔbɔya be ejikpa kikɛ so n chena.

²⁰ Jemanɛ na kaŋ fo, Enyɛnpe Ebɔrɛ na beeŋ ber wonjomu paa ashi lɔrgboŋ nɛ baa tre Yufreetes na be kaba ndoŋ m ba she menyi be ntɔl nɛ menyi be amu nɛ eyur so be afuibi. Mo e naaŋ baa la Asiriya be efuli so be ewurgboŋ na.

²¹ Ade be kaman, nɛ edɔpo ko kaŋ tiŋ n wora ania n nya mbe kena fɔlbi koŋwule ŋko mboe anyɔ ko n yige,

²² kumo ere asɔbɔya na beeŋ baa sa mo kenyipochu damta ga nɛ e bɔla amo so n nya kusɔ kama nɛ e bee sha. Kashenteŋto, basa gbrɛbi nɛ baaŋ ji efute nseŋ ka a wɔ kasawule na so na beeŋ nya kenyipochu nɛ mushoŋ a ji.

²³ Jemanɛ na kaŋ fo, ewi nɛ egɔnnyaŋɛ beeŋ sɔ ndibi sɔrso be adɔ lelaana nɛ amo to be kekama kɔ ewaindibi nɛ a fo kagboŋ nɛ amo be amansherbi beeŋ fo fanɛ gbiti be ndarbi kagboŋ na kikɛ to.

²⁴ Saŋɛ na so basa beeŋ baa ta ata nɛ atanyembi a luri amo to a mɔ asɔbɔya. Kashenteŋto, ewi nɛ egɔnnyaŋɛ beeŋ sɔ efuli na kikɛ so.

²⁵ Ewidibi be yiri yiri beeŋ kɔr n sɔ apreŋsawule kama nɛ men daa dɔ so nɛ esa kikɛ maaŋ naŋ yɔ amo so. A beeŋ ki mboŋ nɛ ana nɛ mbolpɔ beeŋ baa ji.”