Aizaaya 61 - EBƆRƐ BE KAWƆL

Kumɔlga be baru lela be asheŋ

¹ Enyɛnpetale Ebɔrɛ na be Kiyoyu wɔ ma so. E lara ma nna n nɛfa ma nɛ m bɔ baru lela na n sa betirpo, nseŋ chɛ bumo nɛ kagbenejija tɔr so na. Mo e shuŋi ma nɛ n ya bɔ kesɔnyige be baru n sa bumo nɛ b ki beko be anya, nseŋ sɔ bumo nɛ b wɔ kabuti to n yige.

² E shuŋi ma nna nɛ m ba kaŋɛ basa fanɛ, Enyɛnpe Ebɔrɛ be kumɔlga mbe basa nseŋ kɔ m pɔɔ bumo doŋana so be jemanɛ fo. Enyɛnpe Ebɔrɛ na shuŋi ma nna nɛ m ba lolo bumo nɛ baa shu nli,

³ fɔŋfɔŋ bumo nɛ baa shu nli Jerusalɛm to na. E yɛ, n sa basa kagbenefuli nɛ kagbenewushi; mannɛ kagbenejija damta. E yɛ, n sa bumo kapandi be nshɛ, mannɛ kebɔltofinfin. Baaŋ baa du fanɛ ndibi nɛ Enyɛnpe Ebɔrɛ gbagba duu nna. Bumo kikɛ beeŋ baa wora kusɔ nɛ k daga, nseŋ kpaŋ Ebɔrɛ ŋkpal kusɔ nɛ e wora so.

⁴ Kumo be kaman nɛ b lɔŋɛ m pɔr ndegboŋ nɛ a bure n dese dra dra na kikɛ na.

⁵ Enyɛnpe Ebɔrɛ na be basa beeŋ ber befɔ paa, nɛ befɔ na e baa keni bumo be mbolpɔ so, nseŋ naa dɔ bumo be adɔjibi nɛ ndibi sɔrso be adɔ to.

⁶ Ama Enyɛnpe Ebɔrɛ na be basa bre beeŋ baa la Ebɔrɛ be bɔrɛmatapoana nɛ mbe nyɛrbi nna. Efuli pɔtɛana na be kanya nɛ kedama beeŋ ki mbe basa peya nɛ bumo be ketre e dii nɛ b baa puchi amo so.

⁷ Bumo be anishinyɔr nɛ ŋaba beeŋ fo ekar. Baaŋ chena bumo gbagba be kasawule so nɛ bumo be kanya nɛ kedama e daŋɛ so ntuŋ anyɔ so. Bumo be kagbenewushi beeŋ baa wɔtɔ mbaanaayɔ.

⁸ Ŋkpal manɛ so, Enyɛnpe Ebɔrɛ na bee sha kebaawora asheŋ nɛ amo be ekpa so nna. Ama kasuge nɛ kapuni bre, e kishi amo. Mo e nase mbe basa kɔnɔ kashenteŋto fanɛ e beeŋ nɛfa bumo mbaanaayɔ na.

⁹ Bumo be ketre beeŋ dii a chɔ efuli pɔtɛana peya. Ekama nɛ e wu bumo beeŋ pin fanɛ b la basa nɛ Enyɛnpe Ebɔrɛ nɛfa nna.

¹⁰ Jerusalɛm bre bee ji eyur kagbenefuliso nna ŋkpal kusɔ nɛ Enyɛnpe Ebɔrɛ na wora so. K du fanɛ kejafɔche ka ta mbe kejafɔ to be asɔbuuso m buu mbe kejafɔachɛ na nna. Ebɔrɛ ta kumɔlga nɛ kekɔmpɔɔso m buu Jerusalɛm nna fanɛ piŋi.

¹¹ Kananɛ esa bee duu kusɔ nɛ k kɔr n daŋ nɛnɛ na, nɛ Enyɛnpetale Ebɔrɛ na gba beeŋ mɔlga mbe basa nseŋ shin nɛ b baa wɔ kebaawɔtɔ niŋiso to; saŋɛ na so efuliana na be basa kikɛ beeŋ baa kpaŋ mo.