Aizaaya 60 - EBƆRƐ BE KAWƆL

Jerusalɛm be echefoso be kemaŋkura be asheŋ

¹ Jerusalɛmebi, men koso n nyɛkpɛ n fulto fanɛ epeŋi. Karechɛ popɔr bee chɛ menyi so nna na. Ŋkpal manɛ so, Enyɛnpe Ebɔrɛ be kemaŋkura nyaŋɛ n yuu menyi so nna!

² Tentembiri beeŋ buu durnya nɛ kumo be basa kikɛ so. Ama Enyɛnpe Ebɔrɛ na be kemaŋkura be kefulto beeŋ nyaŋɛ n yuu menyi ere so a ŋini fanɛ e wɔ menyi kutɔ.

³ Efuli pɔtɛana be basa nɛ bewura kikɛ beeŋ ba menyi be karechɛ popɔr na be kefulto to.

⁴ Men keni ŋ kulti kusɔ nɛ k bee wora ere. Menyi be basa bee gama abar so nna nɛ b bɛta m ba epe! Menyi be mbinyɛnsobi beeŋ shi kufɔ, kufɔ m ba, nɛ b keta menyi be mbichesobi enɔ to fanɛ mbibi m ba sa menyi.

⁵ Menyi alɛ beeŋ wu loŋ nɛ men be ŋgbene e fuli menyi ga. Kagbenefuli be ga beeŋ shin nɛ men baa chicha. Baaŋ sulɔ efuli pɔtɛana nɛ awɔ teku be kaba ndoŋ na be asɔ lela nɛ kanya m ba sa menyi.

⁶ Enyɔma be ntuŋ damta beeŋ shi efuliana nɛ baa tre Midian nɛ Efa na so n sulɔ asɔ lela m ba sɔ menyi be efuli na kikɛ so. Beko beeŋ shi Shiba be kasawule so n sulɔ shuwa nɛ eduwu m ba kaa lara esarga a sa Enyɛnpe Ebɔrɛ na nsaa malga kusɔ nɛ e wora be asheŋ!

⁷ Baaŋ gama abonfu nɛ baa tre Kɛda nɛ Neboyot na be mbolpɔ kikɛ abar so m ba sa menyi fanɛ esarga. Ma, Enyɛnpe Ebɔrɛ na malɛ beeŋ sɔ amo fanɛ ma bɔrɛsure so be esarga, nseŋ shin nɛ ma bɔrɛlambu e nya kemaŋkura n ti so.

⁸ Manɛ e naa choŋ zii fanɛ awɔlpa, ŋko fanɛ elepɔ ka mel abar so a firgi a yɔ asha to loŋ?

⁹ Teku so be ekuloŋgboŋ nɛ e shi aplasawule wɔfɔ wɔfɔ so nna. Ebɔrɛ be basa nɛ e sulɔ a ba epe. Bumo alɛ keta bumo be shuwa nɛ gbiti nna a ba. Enyɛnpe Israɛl be Ebɔrɛ cheembi na e shin nɛ loŋ wora nɛ mbe basa e nya kemaŋkura. Saŋɛ na so baaŋ baa shuŋ mo nsaa bunyaŋ mo.

¹⁰ Kumo be kaman nɛ Enyɛnpe Ebɔrɛ kaŋɛ Jerusalɛmebi le: “Befɔ e naaŋ lɔŋɛ menyi be kadegboŋ be egbalana m pɔr, nɛ bumo be bewura e shuŋ menyi be basa. N daŋ nya agbo nna ŋ gberge menyi be basa kusoe, ama naniere meeŋ shu menyi so nseŋ wu menyi kuwɔr.

¹¹ Kapa nɛ kanyɛ menyi be kadegboŋ na be mbunagboŋ beeŋ baa bugi a yili. Saŋɛ na so efuli pɔtɛana be bewura beeŋ juŋkpar bumo be basa n sulɔ bumo be asɔ lela kikɛ m ba sa menyi be basa.

¹² Ama efuli ŋko kuwurji kama be basa nɛ b maaŋ shuŋ menyi be basa kikɛ beeŋ mur cheche kuraa.

¹³ Baaŋ ku Lebanɔn be efuli so be ndibi lela m ba lɔŋɛ menyi be kadegboŋ, Jerusalɛm be ebuana m pɔr nseŋ shin nɛ ma bɔrɛlambu e nyalɛ kebita. Saŋɛ na so ma kadegboŋ na gba beeŋ nya kemaŋkura.

¹⁴ Kumo be kaman, men doŋana be kaman to ebi beeŋ baa jɔŋɛ menyi ase a sa menyi bunyaŋ. Bekama nɛ b daa keni menyi jiga beeŋ fara a bunyaŋ menyi, nsaa tre menyi be kadegboŋ na Enyɛnpe Ebɔrɛ na be Kadegboŋ; ŋko Zayɔn, Israɛl be Ebɔrɛ cheembi na be Kadegboŋ.

¹⁵ Menyi be kadegboŋ na maaŋ naa la kade nɛ ekama beeŋ kini n lɛ nseŋ kishi kumo be asheŋ a maa sha kumo to be keba gba na. Ama meeŋ shin nɛ k nyalɛ kebita nɛ kumo be ketre e dii. K beeŋ ki kagbenewushi be kakpa n sa bekama nɛ baaŋ chena kumo to nɛ bekama nɛ baaŋ shir kaman m ba na kikɛ.

¹⁶ Efuli pɔtɛana be bewura nɛ bumo be basa beeŋ ta bumo be asɔ lela ŋ keni menyi be kadegboŋ na so, fanɛ kananɛ ebinio bee bela mbe mbia na. Saŋɛ na so nɛ men pin fanɛ ma, Enyɛnpetale Israɛl be Ebɔrɛ na e mɔlga menyi nseŋ sɔ menyi n yige.

¹⁷ Meeŋ sa menyi shuwa, mannɛ danyaŋ peper, ŋko gbiti, mannɛ kebɛlso be yiri kama, ŋko danyaŋ peper, mannɛ ndibi, ŋko abɛlso be yiri yiri, mannɛ ajembu. Menyi be bewura maaŋ naa kɔrfɛ menyi be basa. Ma alɛ beeŋ shin nɛ b baa ji kuwura ashi kashenteŋji nɛ kayurwushi be ekpa so.

¹⁸ Esa maaŋ naŋ nu nlu kikɛ be asheŋ efuli na so. Menyi be efuli na malɛ maaŋ naŋ mur kikɛ. Meeŋ baa kuŋ menyi ekpa kama so fanɛ egbal na. Saŋɛ na so menyi be basa beeŋ baa kpaŋ ma ŋkpal ŋ ka mɔlga bumo so.

¹⁹ Epeŋi nɛ kufɔl be kefulto be asheŋ maaŋ naa tir menyi. Ŋkpal manɛ so, ma Enyɛnpe Ebɔrɛ na be kemaŋkura be kefulto e naaŋ baa nyaŋɛ a yuu menyi so mbaanaayɔ.

²⁰ Epeŋi nɛ kufɔl kikɛ maaŋ naŋ tɔr ashi Jerusalɛm to. Ma, Enyɛnpe Ebɔrɛ na e naaŋ baa la kumo be kefulto mbaanaayɔ; saŋɛ na so menyi be kebɔltofinfin na kikɛ beeŋ fo ekar.

²¹ Kumo be kaman nɛ menyi be basa kikɛ e chena kasawule na so nsaa wora kusɔ nɛ k niŋi mbaanaayɔ. B du fanɛ kedibi nɛ ŋ gbagba du ndoŋ nɛ n lara ma keshi ŋ ŋini ekama nna.

²² Bumo to be kanaŋ fimbi kama beeŋ ki fanɛ efuli nɛ k kɔ eleŋ ga. Ma e la Enyɛnpe Ebɔrɛ, nɛ jemanɛ na kaŋ fo meeŋ shin nɛ kusɔ nɛ ŋ kaŋɛ na kikɛ e wora manaŋ.”