Aizaaya 57 - EBƆRƐ BE KAWƆL

Ebɔrɛ be basa nɛ b maa ji kashenteŋ be awurfoŋ be asheŋ

¹ Basa niŋiso bee wu nɛ ekama malɛ be shɛŋ maŋ wɔtɔ bumo to. Ama nɛ b baŋ wu malɛ b maŋ naa luri alubi to.

² Bekama nɛ b wɔ kebaawɔtɔ lela to bee nya kayurwushi nɛ ewushi ashi luwu to nna ŋkpal b ka daa wora Ebɔrɛ kasonu so.

³ Belubiworapoana ere, men ba nfe nɛ b ji menyi demu! Menyi nɛ bekpalpo nɛ kubojuajiwuraana nɛ esakale kikɛ la kukoŋwule nna.

⁴ Wanɛ nɛ menyee wora eyurto? Wanɛ nɛ menyee mɛr kɔnɔ? Men keni, menyi be alubi shin nɛ men ki bewulpo nna.

⁵ Menyi ka bee shuŋ agbirana nɛ menyee fɛ fanɛ e bee sa kakurge so, men wɔtɔ nna a di abar keche nɛ kenyɛn ashi ndibigboŋ nɛ menyee shuŋ agbir na amo be afito. Menyi alɛ naa ta menyi be mbia a lara esarga ashi abeelaŋ nɛ ataŋɛ chiŋgeliŋ nɛ a wɔ abeemase na nna.

⁶ Kumo be kaman menyee ta elɔr be epun to be ajembu mɔlmɔlbi nna a ki agbir, nsaa ta nsa nɛ ajibi a lara esarga a sa amo. Menyee tama fanɛ kumo be loŋ bee par ma nna a?

⁷ Menyee yɔ abee jeŋgreŋ so nna n ya kaa lara esarga nsaa di abar keche nɛ kenyɛn ndoŋ.

⁸ Menyi alɛ naa ta agbirana nɛ amo be asheŋ bee nu ma agbo na nna a yili menyi be mbuna be akɔlɔbi to nɛ egedo be afito. Men kplaŋ ma so nna nseŋ ta menyi be amu n fa n sa basa nɛ menyee sha nɛ baa tu menyi a dese menyi be egedo so a wora menyi be kayɛlga fuloŋ be asheŋ woraso.

⁹ Menyee gbiti ŋku nsaa wora etulale n ya kaa shuŋ kegbir nɛ baa tre Mɔlɛk na nna. Menyi alɛ bee shuŋi mbɔ mboŋ wɔfɔ, hale a yɔ bubuni to nna n ya kaa fin agbirana nɛ menyeeŋ baa shuŋ.

¹⁰ Menyee gben ga a fin agbir popɔr, ama menyi alɛ maa gben a yige to. Menyee fɛ nna fanɛ menyi be agbirana nɛ amo be asheŋ bee nu ma agbo na e naa sa menyi eleŋ, amoso nɛ menyee sha amo na.

¹¹ Ade be kaman nɛ Enyɛnpe Ebɔrɛ na bishi le: “Nuso be agbir e shin nɛ kufu pɛ menyi, nɛ men kpal amo so a ku efɛ nseŋ teŋ ma so kuraa loŋ? Ŋkpal ŋ ka wora shruum n chɛr so nɛ men yige kebaabunyaŋ ma ere a?

¹² Menyee fɛ fanɛ kusɔ nɛ menyee wora na daga nna, ama meeŋ shin nɛ menyi be asheŋ woraso e lar efuli nɛ menyi be agbirana e chɛ menyi to ŋ gben.

¹³ Men kaa shu a fin kechɛto, men shin nɛ menyi be agbirana e mɔlga menyi! Ama afu fimbi e naŋ ber amo n lɛ. Bekama nɛ b yirda ma e naaŋ chena kasawule na so nseŋ shuŋ ma ashi ma bɔrɛlambu to ashi ma kebee cheembi na so.”

Ebɔrɛ ka nase kechɛto nɛ kechɛ be kɔnɔ be asheŋ

¹⁴ Ade be kaman nɛ Enyɛnpe Ebɔrɛ naŋ kaŋɛ le: “Men lɔŋɛ ekpa nseŋ lara ajembu nɛ keyimu kikɛ kumo so n sa ma basa nɛ b bɔla kumo so m bɛta m ba ma kutɔ!

¹⁵ Ma e la Enyɛnpe Ebɔrɛ nɛ e wɔ ebɔrɛso nsaa wɔtɔ mbaanaayɔ na. N wɔ kakpa cheembi nɛ k wɔ esoso nna, ama ma alɛ nɛ basa nɛ b bar bumo be amu kaseto nseŋ ta bumo be amu n deŋi ma so na gba e wɔtɔ nɛ m baa chɛ bumo to.

¹⁶ M maaŋ naaŋ nya agbo n wɔtɔ ma basa a wu bumo kulubi mbaanaayɔ. Ŋkpal manɛ so, ma e to bumo nsaa maa sha fanɛ bumo be aba e pɔ bumo.

¹⁷ N daŋ nya agbo ga nna n wora bumo ŋkpal bumo be alubi nɛ kejimuni be kebaawɔtɔ so, amoso nɛ n daŋ gberge bumo kusoe nseŋ daŋ kplaŋ bumo so na. Ama b kraŋ wora kusoe kpakpaso ŋ kini a wɔ bumo be asheŋ lubi na to.

¹⁸ N wu asheŋ nɛ b wora na kikɛ, ama ŋ kraa beeŋ chɛ bumo be alɔ. Ma alɛ beeŋ juŋkpar bumo nseŋ chɛ bumo to nseŋ naŋ lolo bekama nɛ baa shu nli na,

¹⁹ nɛ b fara a boŋ nshɛ a kpaŋ ma. Meeŋ shin nɛ bekama nɛ b taga to nɛ bumo nɛ b wɔ kufɔ kufɔ kikɛ e nya kayurwushi. Ma e naaŋ chɛ ma basa be alɔ kikɛ!

²⁰ Basa lubi bre du fanɛ teku nɛ k bee baga to a kaa ketili a lara eyurpi a deŋi kedeŋi so jemanɛ kikɛ na nna.

²¹ Ama ma, Enyɛnpe Ebɔrɛ na nase kɔnɔ fanɛ belubiworapoana maaŋ nya kayurwushi kikɛ.”