Aizaaya 54 - EBƆRƐ BE KAWƆL

Kasha nɛ Enyɛnpe Ebɔrɛ na kɔ n sa Israɛl be asheŋ

¹ Jerusalɛm, fo daa du fanɛ egbentepo nna, ama naniere feeŋ tiŋ m boŋ nshɛ kagbenefuliso Naniere bre feeŋ nya mbia damta a chɔ eche kurgepo nɛ e kɔ ekul gba.

² Kpalga wajɛbu nɛ fo wɔtɔ to na, nseŋ teŋi amo be efɔlana so nseŋ naŋ lɔŋɛ kumo be ayir ŋ gbir nɛnɛ!

³ Fo nɛ fo kaman to ebi beeŋ sɔ efuli pɔtɛana be nsawule ŋ ki menyeya; nseŋ pɔr n chena bumo be nde nɛ e bure a dese naniere na to.

⁴ Men sa maa ŋana kufu ŋko anishinyɔr. Menyi alɛ e sa maŋ pɔ aba kikɛ. Men teŋ menyi be kebifɔlbi to be asheŋ lubi na so. Men sa maŋ shin nɛ menyi be kebaawɔtɔ nɛ k du fanɛ ekulpoche be kebaawɔtɔ na e baa keta menyi nyɔmɔ.

⁵ Ŋkpal manɛ so menyi be etopo na beeŋ baa la fanɛ ekul n sa menyi. Mo e la Enyɛnpetale, Israɛl be Ebɔrɛ cheembi na. E beeŋ mɔlga menyi. Mo e naa ji kuwura durnya kikɛ so na.

⁶ Menyi, Israɛlebi, du fanɛ eche fɔlbi nɛ mo kul kini mo nɛ e bee shu kagbenejijaso nna. Ama Enyɛnpe Ebɔrɛ na naŋ tre menyi m ba, nsaa kaŋɛ menyi le:

⁷ “N daŋ kplaŋ menyi so jemanɛ gbrɛbi ko nna, ama ŋkpal ma kashagboŋ nɛ kushuso so, meeŋ naŋ bɛta n sɔ menyi.

⁸ N daŋ nya agbo nna m pal kaman n sa menyi jemanɛ gbrɛbi ko, ama meeŋ naaŋ wu menyi kuwɔr nseŋ sha menyi mbaanaayɔ. Kusɔ nɛ ma, Enyɛnpe Ebɔrɛ, nɛ n la menyi be emɔlgapo na bee kaŋɛ menyi nna na.”

⁹ “Nowa be jemanɛ na, ma Enyɛnpe Ebɔrɛ na daŋ nase kɔnɔ fanɛ m maaŋ naŋ ta nchu m mur durnya. Mee nase kɔnɔ naniere nna fanɛ m maaŋ naŋ nya agbo ŋ gberge menyi kusoe.

¹⁰ Abeegboŋ nɛ abeebi beeŋ tiŋ m bure n tɔr, ama kasha nɛ ŋ kɔ n sa menyi maaŋ loge kikɛ. Meeŋ bɛ kɔnɔ nɛ n naseso ŋ kaŋɛ fanɛ meeŋ sa menyi kayurwushi na so mbaanaayɔ. Kusɔ nɛ Enyɛnpe Ebɔrɛ, nɛ mee sha menyi na kaŋɛ nna na.”

Jerusalɛm popɔr na be asheŋ

¹¹ Enyɛnpe Ebɔrɛ na yɛ: “O Jerusalɛm be kadegboŋ nɛ fee ji awurfoŋ nsaa maa kɔ echɛtopo, nɛ esa nɛ e bee lolo fo; meeŋ ta yawu kpakpaso be ajembu lela n tɔl fo gbaltɔlase.

¹² Yawu kpakpaso be ajembu peper nɛ baa tre rubi na nɛ meeŋ ta m pɔr fo kakpa lempoana na, nseŋ ta ajembu nɛ a bee kpa edɛ na n lɔŋɛ fo mbunagboŋ, nseŋ naŋ ta yawu kpakpaso be ajembu nɛ baa ta a lɔŋɛ abitasɔ na m pɔr egbal ŋ kulti fo.

¹³ Ma, Enyɛnpe Ebɔrɛ na gbagba e naŋ ŋini fo basa asheŋ, nseŋ sa bumo kedama nɛ kayurwushi damta.

¹⁴ Fo basa be kewora kusɔ nɛ k daga nɛ bumo be kewora asheŋ nɛ amo be ekpa so beeŋ shin nɛ fo baa kɔ eleŋ. Ma alɛ beeŋ lara bumo be kafɔŋ kikɛ ashi fo to, nɛ a maa naŋ taga fo to gba kuraa.

¹⁵ M maaŋ naŋ shin nɛ esa kikɛ e kɔ kena ashi fo kadegboŋ na to. Bekama nɛ baaŋ kɔ menyi kena maaŋ tiŋ m pɔɔ menyi so kikɛ.

¹⁶ Ma e to bɔyɛpo nɛ e bee puga edɛ a ŋalga abɛlso a lɔŋɛ akɔsɔ. Ma alɛ e to enapo nɛ e bee ta akɔsɔ na a kɔ kena a mɔ basa.

¹⁷ Ama kekɔsɔ kama maaŋ tiŋ n wora fo shɛŋ. Fo alɛ beeŋ nya kusɔ ko ŋ kaŋɛ bekama nɛ baaŋ ku fo kɔnɔ. Meeŋ kɔ n sa ma anya nseŋ shin nɛ b kɔ m pɔɔ so.” Enyɛnpe Ebɔrɛ e kaŋɛ na.