Aizaaya 53 - EBƆRƐ BE KAWƆL

Kusɔ nɛ Ebɔrɛ be kenya wora n sa anyi be asheŋ

¹ Ndoŋ nna nɛ basa na malɛ bishi le: “Wanɛ e naaŋ yirda kubɔya nɛ anyee nu ere? Wanɛ e daŋ wu Enyɛnpe Ebɔrɛ be eleŋgboŋ ka shuŋ le?

² Enyɛnpe Ebɔrɛ na gbagba be keparso nɛ mbe kenya daŋ ki fanɛ kusɔduuso nɛ k mur achin kasawule wɔlso so. E daa maŋ walɛ keyɛrbi ŋko a la esagboŋ ko nɛ basa nyi mbe asheŋ ŋko a keni mo a bɔlɔ kenishi. Mbe kapɔr be shɛŋ daa maa par basa, nɛ k shin nɛ basa e baa firgi a taga mo to.

³ Ekama daŋ keni mo jiga nna nseŋ kini mo n lɛ. Kagbenejija nɛ ebesa damta e daŋ bɔlɔ mo to, nɛ mo alɛ ji kanyiti nseŋ sɔ amo kikɛ n deŋi mbe kumu so. Ekama daa maa sha kewu mo kenishiso gba. B daŋ wu mo nna fanɛ esa jiga.

⁴ Ama e sɔ anyi be awurfoŋ nɛ ebesa kikɛ n deŋi mbe kumu so. Ade kikɛ to, an daa fɛ nna fanɛ Ebɔrɛ e naa gberge mo kusoe.

⁵ Anyi ere be asheŋ lubi so nɛ b beri mo nɛ e doro. Kasogberge nɛ e nya na so nɛ an nya kayurwushi nɛ mbe edoro na malɛ shin nɛ an nya kechɛ.

⁶ Anyi kikɛ daa du fanɛ mbolpɔ nɛ b yeŋ n foe n luri to nna. Ekama daŋ sɔ mbe ekpa nna a yɔ. Ama Enyɛnpe Ebɔrɛ na daŋ shin nna nɛ anyi be kasogberge ba mbe kenya so.

⁷ Awurfoŋ nɛ ebesa damta daŋ ba mo so, ama e daŋ lo to boeŋ nna, a maŋ fubel. E daŋ lo to fanɛ kpakpafɔlbi nɛ b gberge a yɔ nɛ b ya mɔ nna. Mo alɛ nseŋ daa du fanɛ kubolpɔ nɛ baa kuya kumo be afuibi nɛ k dese boeŋ nna, e maŋ wora shɛŋ.

⁸ B daŋ pɛ mo nseŋ ji mo demu nɛ k maŋ niŋi. Kumo be kaman nɛ b kaŋɛ fanɛ e daga b mɔ mo; mbe asheŋ malɛ daa maŋ tir esa kikɛ. B daŋ mɔ mo nna ŋkpal anyi be basa be asheŋ lubi so.

⁹ E daŋ maŋ wora kulubi kikɛ ŋko ŋ ku efɛ ŋ ku so, ama b daŋ mɔ mo nna m puli mo kakpa nɛ baa puli alubiworapoana nɛ damawuraana.”

¹⁰ Kumo be kaman nɛ Enyɛnpe Ebɔrɛ na kaŋɛ le: “Ma keparso nɛ ma kenya bee ji awurfoŋ. Mbe luwu na la sarga nɛ k beeŋ bar alubi be ketampaŋ m ba sa basa pɔtɛ nna. Amoso e beeŋ naŋ wu mbe kaman to ebi kenishiso nsaa wɔ ŋkpa to n chɛr. Mo so nɛ kusɔ nɛ ŋ kre kikɛ beeŋ wora m bɔlɔ so nɛnɛ.

¹¹ Awurfoŋ nɛ e beeŋ ji na be kaman, e beeŋ naŋ nya kagbenewushi nseŋ pin fanɛ e maŋ gben jiga. Ma kenya nɛ e bee shuŋ ma kagbene koŋwuleso nɛ ma kagbene bee fuli mo so na e naaŋ sɔ basa galeŋga be kasogberge n deŋi mbe kumu so, nɛ ŋ kpal mo so n ta bumo be alubi m paŋ bumo.

¹² Amoso meeŋ sa mo kemaŋkuragboŋ nɛ eleŋgboŋ. E shuli so n ta mbe kumu n lara sarga, nseŋ yili alubiworapoana damta be aya to ŋ kule alubi be ketampaŋ n sa bumo.”