Aizaaya 52 - EBƆRƐ BE KAWƆL

Ebɔrɛ ka beeŋ kɔ m mɔlga Jerusalɛm be basa be asheŋ

¹ Jerusalɛm to ebi, men tiŋi edi to! Men koso n yili ŋ kpeŋ menyi be eyur to! Ebɔrɛ be kade cheembi to ebi, men ta menyi be asɔbuuso lela m buu! Nnyamase nɛ b shi efuli pɔtɛana so na maaŋ naŋ luri menyi be kadegboŋ to n tɔrɔ menyi kikɛ.

² Jerusalɛm to ebi, men lar menyi be asheŋ lubi to! Men lar men be asheŋ lubi nɛ a du fanɛ efɔl ŋkre menyi be ebɔ to na to.

³ Kede be kaman nɛ Enyɛnpetale Ebɔrɛ kaŋɛ mbe basa le: “Men ka daa la anya na, esa kikɛ daa maaŋ ka shɛŋ n tɔ menyi. Amoso, esa maaŋ ka shɛŋ nɛ men nya menyi be amu a ji.

⁴ Dra dra na menyi gbagba be keparso nɛ men daŋ yɔ Ijipt be efuli so n ya ka wɔ ndoŋ fanɛ befɔ. Kumo be kaman nɛ Asiriya be efuli so ebi ba kɔ nseŋ pɛ menyi eleŋso n yɔ bumo be efuli so nɛ b maŋ ka shɛŋ.

⁵ Naniere aloŋ e naaŋ wora ashi Babilɔn be efuli so gba. Men la anya nna, ama b maŋ ka shɛŋ n tɔ menyi. Bekama nɛ baa ji kuwura menyi so na bee puchi nna nsaa wu bumo be amu a wɔtɔ ma a keni ma jiga.

⁶ Jemanɛ ko bee ba nɛ men pin fanɛ ma e la Ebɔrɛ nɛ ŋ kaŋɛ menyi asheŋ ere kikɛ pɔɛŋ nɛ a wora.”

⁷ K la mamachi be kesheŋ nna fanɛ esa ka beeŋ wu kabɔ ka ta kagbenewushi be baru n shi abee so a gbelge to a ba nɛ e ba sa basa. Kekɔmpɔɔso be kebomboŋ nɛ e bee ber a sa Jerusalɛm to ebi a kaŋɛ le: “Menyi be Ebɔrɛ e la Ewura!”

⁸ Bekama nɛ baa keni kadegboŋ na so a kuŋ kumo na, ber abar so nna a wora awɔr kagbenefuliso B wu fanɛ Enyɛnpe Ebɔrɛ na bɛta a ba Jerusalɛm to nna.

⁹ Menyi Jerusalɛmebi nɛ menyi be kade daŋ bure a dese na, e baa wora awɔr kagbenefuliso! Enyɛnpe Ebɔrɛ na beeŋ kɔ m mɔlga mbe kadegboŋ nseŋ lolo mbe basa.

¹⁰ Enyɛnpe Ebɔrɛ na beeŋ ta mbe eleŋgboŋ m mɔlga mbe basa ashi bumo doŋana be enɔ to, saŋɛ na so durnya to ebi kikɛ beeŋ wu kumo.

¹¹ Menyi kikɛ nɛ menyee sulɔ bɔrɛlambu na to be asɔ na, e lar kadegboŋ nɛ baa tre Babilɔn na to. Men sa maŋ kaŋ beta keyurpisɔ kikɛ n wora eyurpi daŋkare be ekpa so. Menyi alɛ e bɛr nchu a du farfarbi pɔɛŋ nseŋ lar ndoŋ.

¹² Ama men sa maŋ kuse n lar ndoŋ. Ŋkpal manɛ so, esa kama maa ju a buu menyi so. Enyɛnpe menyi be Ebɔrɛ na e naaŋ baa juŋkpar menyi, nsaa kuŋ menyi kaba kama so ashi men doŋana be enɔ to.

Kayɛrbi nɛ e bee ji awurfoŋ na be asheŋ

¹³ Ade kikɛ be kaman, nɛ Enyɛnpe Ebɔrɛ kaŋɛ le: “Asheŋ beeŋ nite nɛnɛ n sa ma kenya ashi kusɔ kama nɛ e bee wora to. Mo alɛ beeŋ nya kemaŋkuragboŋ nɛ basa e kpaŋ mo ga.

¹⁴ Basa damta nɛ b wu mo be nnɔ daŋ mɔ bumo nna. Mbe kayurwule daŋ chɛrga nna ŋkpal awurfoŋ nɛ e ji so; e daŋ maŋ naŋ duli dimɛdi gba kuraa.

¹⁵ Ma kenya na beeŋ sa efuliana na be basa ekpa nɛ b ki basa nɛ baaŋ tiŋ n shuŋ ma Enyɛnpe Ebɔrɛ na. Bewura beeŋ wu mo nɛ k wora bumo mamachi nseŋ mɔ bumo be nnɔ. Efuli pɔtɛana be basa beeŋ wu asɔ nɛ b maŋ naŋ wu ŋ ku so, nseŋ fɛ asɔ nɛ b maŋ naŋ fɛ amo be asheŋ ŋ ku so be nfɛra.”