Aizaaya 51 - EBƆRƐ BE KAWƆL

Jerusalɛm ka beeŋ nya kumɔlga be asheŋ

¹ Enyɛnpe Ebɔrɛ na yɛ: “Nɛ menyee sha kebaawora kusɔ nɛ k niŋi nsaa wora Enyɛnpe Ebɔrɛ na kasonu, kumo ere men baa keni menyi nananyɛn Eebraham so a wora asheŋ. Mo e du fanɛ kefalta nɛ men shi kumo to n lar na.

² Ma, Ebɔrɛ e lara Eebraham nɛ mbe eche Sɛɛra, nɛ men baa la bumo be kaman to ebi. Jemanɛ nɛ n daŋ tre Eebraham na, nɛ e daa maŋ kɔ ebi, kumo be kaman nɛ n nɛfa mo nseŋ sa mo kaman to ebi damta.

³ Ma, Enyɛnpe Ebɔrɛ na beeŋ lolo basa nɛ b wɔ Jerusalɛm be alambure to na n wushi bumo kagbene. Jerusalɛm ka ki fanɛ keshishɛrsawule a dese ere gba, meeŋ shin nɛ k ki fanɛ kambɔl nɛ n daŋ nase kumo ketre Iden na. Saŋɛ na so kagbenefuli nɛ kagbenewushi beeŋ baa wɔ ndoŋ, nɛ basa e baa boŋ nshɛ a kpaŋ ma nsaa di ma epaŋ.”

⁴ Kumo be kaman nɛ Enyɛnpe Ebɔrɛ na naŋ kaŋɛ le: “Ma basa, men nu nfe! Men nu kusɔ nɛ mee kaŋɛ ere! Ma e naa ta ma keŋini a sa efuli pɔtɛana na; nɛ ma mbraana malɛ bee shin nɛ baa pin ma.

⁵ Meeŋ nya manaŋ m ba mɔlga bumo; ŋkpal manɛ so, ma kekɔmpɔɔso be jemanɛ taga to. Efuliana nɛ a wɔ keplasawule so kufɔ kufɔ na bee keni ma ekpa nna; ŋkpal manɛ so, baa tama fanɛ meeŋ baa mɔlga bumo nseŋ ji kuwura bumo so nna.

⁶ Men to anishi ŋ keni awɔlpa nɛ kasawule kikɛ so! Awɔlpa beeŋ choŋ fanɛ edishi, nɛ kasawule e baŋɛ to fanɛ kusɔbuuso dra ka kpɛa to na. Basa kikɛ beeŋ wu n dese kasawule fanɛ ashushombi firgiso na. Ama ma kumɔlga beeŋ baa wɔtɔ mbaanaayɔ. Ma kekɔmpɔɔso maaŋ fo ekar kikɛ.

⁷ Menyi nɛ men nyi kusɔ nɛ k daga kewora na e nu nfe! Menyi nɛ men kɔ ma keŋini menyi be ŋgbene to na gba e nu nfe! Men sa maa ŋana basa nɛ baa tege menyi nsaa kaŋɛ menyi asheŋbesaso na.

⁸ Ŋkpal manɛ so, baaŋ foe menyi be anishi so fanɛ kaŋkaŋ ka ji wajɛ m mur nɛ esa maaŋ naŋ wu kumo na. Ama ma kumɔlga beeŋ baa wɔtɔ mbaanaayɔ. Nɛ ma kekɔmpɔɔso be eleŋ na malɛ e baa wɔtɔ saŋkama.”

⁹ Enyɛnpe Ebɔrɛ, koso n chɛ anyi to! Bɔla fo eleŋgboŋ na so m mɔlga anyi, fanɛ kananɛ fo daŋ mɔlga anyi be basa dra dra na. Fo e daŋ ku teku to be kusɔbɔya lubi gboŋgboŋi nɛ baa tre Rehab, nɛ e yili n sa kebagato nɛ kulubi be eleŋana na to. Rehab yili n sa Ijipt be efuli jemanɛ nɛ Israɛlebi lar ndoŋ a yɔ na nna.

¹⁰ Fo e shin nɛ teku peper chiŋgeliŋ na baŋɛ to, nseŋ shin nɛ ekpa dese nchu na to n sa basa nɛ fo mɔlga na nɛ b bɔla to n dii.

¹¹ Naniere bre basa nɛ fo kɔ n suge na beeŋ bɛta n yɔ Jerusalɛm to nɛ kagbenewushi, baaŋ baa boŋ nshɛ kagbenefuliso nna a yɔ ndoŋ. Bumo be ŋgbene beeŋ fuli bumo mbaanaayɔ. Kagbenejija nɛ kebɔltofinfin maaŋ naŋ pɛ bumo.

¹² Ade be kaman, nɛ Enyɛnpe Ebɔrɛ naŋ kaŋɛ le: “Ma e naa leŋ menyi to a wushi menyi kagbene. Nɛ manɛ nna nɛ menyee ŋana edimɛdi bomin? B maa chɛr nsaa wu a mur fanɛ afitiri.

¹³ Men teŋ Enyɛnpe Ebɔrɛ nɛ e to menyi nseŋ to esoso nɛ kasawule kikɛ na so nna a? Nɛ manɛ nna nɛ menyee ŋana kufu ŋkpal basa nɛ baa kɔrfɛ menyi nsaa sha kemur menyi agbo so na? Bumo be kanya agbo maaŋ tiŋ n wora menyi shɛŋ.

¹⁴ K maaŋ chɛr nɛ bekama nɛ b wɔ kabuti to, nɛ kebaawɔtɔ du bumo so kpakpa na e nya bumo be amu a ji. Baaŋ baa wɔtɔ n chɛr kebaawɔtɔ to, bumo alɛ maaŋ fin kusɔ jiso ŋ gben kikɛ.

¹⁵ Ŋkpal manɛ so, ma e la Enyɛnpe menyi be Ebɔrɛ na. Ma e naa shin nɛ teku bee baga to nsaa ku atili a wora awɔr. Ma ketre e la Enyɛnpetale Ebɔrɛ!

¹⁶ Ma e ŋini menyi kamalga nseŋ ta ma enɔana a kuŋ menyi. Ma nɛ n to esoso nɛ kasawule na e kaŋɛ basa nɛ b wɔ Jerusalɛm to fanɛ b la ma basa nna!”

Jerusalɛmebi be awurfoŋ be ekar be asheŋ

¹⁷ Jerusalɛm to ebi, men koso! Kasogberge nɛ Enyɛnpe Ebɔrɛ na nya agbo n shin nɛ k ba menyi so na shi ga. Kasogberge na shin nna nɛ menyee nite a lente fanɛ basa nɛ b boo nsa na.

¹⁸ Esa kikɛ maŋ wɔtɔ nɛ e pɛ menyi enɔ to n juŋkpar menyi ŋko n chɛ menyi to.

¹⁹ Kumu lubi be ntuŋ anyɔ e tu menyi. Menyi be kasawule mur ŋkpal kena so, nɛ akoŋ malɛ naŋ mur menyi be basa. Esa kikɛ malɛ maŋ wɔtɔ nɛ e shu menyi so n lolo menyi.

²⁰ Menyi be basa bee bɛlɛ nna a tɔr ashi kegbembi be kukɔlɔbi kama to. B ki fanɛ echibir nɛ bekpampo sho ajigbelɛ m pɛ nna. Bumo alɛ pin kananɛ Enyɛnpe menyi be Ebɔrɛ be agbo du kashenteŋto.

²¹ Menyi Jerusalɛm to be basa nɛ menyee ji awurfoŋ nsaa nite a lente fanɛ men ka nuu nsa m boo na e nu nfe!

²² Enyɛnpe menyi be Ebɔrɛ nɛ e bee kuŋ menyi na e kaŋɛ le: “Mee lara kasogberge nɛ n nya agbo n shin nɛ k ba menyi so na nna na. M maaŋ naŋ gberge menyi kusoe n shin nɛ men baa nite a lente fanɛ basa nɛ b boo nsa na.

²³ Ama meeŋ shin nɛ kasogberge na e ba basa nɛ b kɔrfɛ menyi nseŋ shin nɛ men dese agbembi so, nɛ baa chichi menyi so fanɛ shishɛr na so.”