Aizaaya 5 - EBƆRƐ BE KAWƆL

Waindibi be kudɔ be kashɛ be asheŋ

¹ Men kaŋ asoe n nu kashɛ nɛ mee shin nɛ m boŋ n sa menyi ere. K la n teri ko nɛ mbe ndibi sɔrso be kudɔ be asheŋ be kashɛ nna. N teri na daa kɔ ndibi sɔrso be kudɔ nɛ k daa wɔ kepreŋsawule nɛ k bee wora asɔ nɛnɛ so nna.

² N teri na daŋ pulgi kasawule na to nna, n tise kumo so be ajembu kikɛ pɔɛŋ; nseŋ duu afeelebi lela kumo so. Kumo be kaman nɛ e pɔr egbal a kuŋ amo, nseŋ pɔr ebu jeŋgreŋ ko nɛ baaŋ baa yili so a keni kudɔ na nseŋ kur kemaŋ nɛ baaŋ baa nyaŋ asɔrso na a wɔtɔ. E daa tama fanɛ asɔrso na beeŋ wora nɛnɛ nseŋ pere a wɔ ebel nna, ama amo kikɛ daa du nyaŋnyaŋ nna.

³ Ŋkpal loŋ so nɛ n teri na kaŋɛ le: “Menyi basa nɛ men wɔ Jerusalɛm be kade to nɛ Judiya be efuli so, men ji ma nɛ ma ndibi sɔrso be kudɔ be asheŋ ere n sa ma.

⁴ Kusɔ ko daga fanɛ n wora kudɔ na to nɛ m maŋ wora kumo a? Nɛ manɛ e ba nɛ ndibi na bee sɔr asɔrso nyaŋnyaŋso? Mannɛ asɔrso lela nɛ mee sha a?

⁵ Kusɔ nɛ meeŋ wora ma ndibi sɔrso be kudɔ na e la fanɛ, meeŋ lara kunji nɛ k kulti kumo na nseŋ bure egbal nɛ k bee kuŋ kumo na nna, nɛ kupuŋ to be asɔbɔya e ba ji ndibi sɔrso na nseŋ chichi amo so m mata kasawule.

⁶ Ma alɛ beeŋ yige amo nɛ amo to e wora afitiri ŋ ki kupuŋ. M maŋ naŋ lɔŋɛ ndibi na be ayabi so ŋko n ta kɔtɔkrɔ m buse amo to kikɛ. Meeŋ shin nɛ egɔnnyaŋɛ nɛ ewi e sɔ amo to. Ma alɛ beeŋ naŋ pɛ bɔrɛ nɛ k sa maŋ naŋ ba kudɔ na to kikɛ.”

⁷ Israɛl e la Enyɛnpetale Ebɔrɛ na be ndibi sɔrso be kudɔ na; Juda be efuli so be basa malɛ e la afeelebi nɛ e daŋ duu na. E daa sha fanɛ b wora kusɔ nɛ k walɛ nna, ama b daŋ mɔ basa nna. Mo alɛ daa sha fanɛ b baa wora kusɔ nɛ k daga nna, ama bumo be basa daa shu a fin esa nɛ e beeŋ wu bumo kuwɔr nna.

Asheŋ lubi nɛ basa bee wora na be asheŋ

⁸ Asheŋ maaŋ nyalɛ n sa menyi! Menyi bee tɔ nwu nɛ nsawule damta a ti amo nɛ men chɛr a kɔ so nna. K maaŋ chɛr nɛ kakpa maaŋ naa wɔtɔ nɛ esa kikɛ e naaŋ ba chena so. Menyi nawule e naaŋ ka kasawule na so.

⁹ N daŋ nu Enyɛnpetale Ebɔrɛ na ka kaŋɛ le: “Nwu gboŋgboŋi lela ere kikɛ beeŋ ki alambure nɛ esa kikɛ maaŋ naa wɔ amo to.

¹⁰ Yabra belbelso fanɛ egalɔn ashe nawule nɛ esa beeŋ nya ashi ndibi sɔrso be kudɔ nɛ k fo fanɛ nto adunyɔ be kasawule so, nseŋ nya ayu beeŋ wora ekurwa kuduaburwa nawule ashi ayuduu ekurwa kalfa nɛ aduburwa nɛ e ta n duu to.”

¹¹ Asheŋ kraa maaŋ nyalɛ n sa menyi nɛ menyeeŋ koso n fara kasanuu kachipurdidi hale nɛ kaaseso e ya fo nɛ menyi kraa boo ere.

¹² Ejaŋjilaŋ nɛ echakachaka nɛ nlopi nɛ yabra nɛ menyee ta a ji menyi be amu ashi menyi be kasanuu be kejigboŋana to, ama menyi maa kaa fɛ asɔ nɛ Enyɛnpe Ebɔrɛ na wora be asheŋ.

¹³ Ŋkpal loŋ so menyi maŋ nyi shɛŋ a laŋɛ mbe kaplɛa so. Amoso men doŋana beeŋ ba pɛ menyi be galeŋga ŋ ki anya katiŋ so n yɔ efuli pɔtɛ so. Akoŋ beeŋ mɔ menyi be bejuŋkparpoana nɛ achukoŋ e mɔ basa damta malɛ.

¹⁴ Bubuni wora shiriya nna m bela ase a jo Jerusalɛm to be bejuŋkparpoana na nɛ jimaŋ damta nɛ baa cha awɔr na, fɔŋfɔŋ bumo nɛ baa puchi kadegboŋ na so na.

¹⁵ Nyɔmɔ beeŋ pɛ ekama. Bekama nɛ baa maŋ bumo be amu so na beeŋ ba kaseto.

¹⁶ Enyɛnpetale Ebɔrɛ na bre bee wora kusɔ nɛ k daga nna a ŋini mbe keshi, nsaa ji mbe basa demu a lara mbe kecheembiya efuli.

¹⁷ Ndegboŋana na be alambure to nɛ mbolpɔ fɔlbi nɛ mboe fɔlbi beeŋ ta ŋ ki amo be ejikpa a ji afitiri.

¹⁸ Asheŋ maaŋ nyalɛ n sa menyi! Menyi maaŋ tiŋ n suge menyi be amu ashi menyi be alubi to.

¹⁹ Le nɛ menyee kaŋɛ: “Shin nɛ Enyɛnpe Ebɔrɛ na e nya manaŋ n wora kusɔ nɛ e yɛ e beeŋ wora na ai, saŋɛ na so anyeeŋ wu kumo. Shin nɛ Israɛl be Ebɔrɛ cheembi na e wora asheŋ nɛ e kre na ai; n shin nɛ an wu kusɔ nɛ k wɔ mbe nfɛra to.”

²⁰ Asheŋ maaŋ nyalɛ n sa menyi! Menyee ta kulubi nna a tre kelela nsaa ta kelela a tre kulubi. Menyee ta tentembiri nna a ki kefulto nsaa ta kefulto a ki tentembiri. Menyi alɛ naa ta kusɔ kekra nna a ki kusɔ belbelso, nsaa ta kusɔ belbelso a ki kusɔ kekra.

²¹ Asheŋ maaŋ nyalɛ n sa menyi! Menyee fɛ fanɛ menyi be anishi bugi nna nɛ men nyi asheŋ ga.

²² Asheŋ maaŋ nyalɛ n sa menyi! Nsa be keta n wea abar to n nuu bre be kaplɛa so, men la egoni nna nɛ esa kikɛ maŋ fo menyi so!

²³ Ŋkpal menyi be kebaasɔ brɔbu basa kutɔ so, basa nɛ b daga fanɛ b ji n tɔr na bee nya bumo be amu nna a ji. Menyi alɛ bee ji demu nna a puni basa nɛ b maŋ wora alubi na.

²⁴ Kananɛ atuweklaŋ nɛ afitiri bee wɔl nsaa ji edɛ na nɛ menyi alɛ gba beeŋ ji edɛ nɛ menyi be nliŋi e bɛ nɛ menyi be atoto malɛ e wɔl nɛ afu e gbaŋgbaŋ amo n lɛ! Ŋkpal manɛ so, men kini kesɔ Enyɛnpetale Israɛl be Ebɔrɛ cheembi na be keŋini na.

²⁵ Enyɛnpe Ebɔrɛ na nya agbo ga nna n wɔtɔ mbe basa nsaa shin nɛ e gberge bumo kusoe kenishipereso. Abee beeŋ gbuŋgbuŋ nɛ basa e wu n dese agbembiana so fanɛ epi na. Ama amo nɛ amo kikɛ Enyɛnpe Ebɔrɛ na be agbo kraa maaŋ wushi. E kraa beeŋ baa sha kegberge menyi kusoe n ti so.

²⁶ Kasogberge na be kaman, Enyɛnpe Ebɔrɛ ere beeŋ pal enɔ n tre efuli pɔtɛana nɛ a wɔ kufɔ kufɔ be basa nɛ b ba kɔ menyi kena. E beeŋ foŋ kafoli nna n tre bumo nɛ b nya manaŋ n shi durnya be lalaloge kikɛ m ba fanɛ afu na!

²⁷ Bumo be ekama maa gben kikɛ; ekama malɛ maa fiti gba. Edi maa la bumo gba a bishi nɛ baa di. Bumo alɛ be ekreso maa yɔɔ nɛ bumo be asɛbta be efɔlana maa tuge kikɛ.

²⁸ Kumo be kaman, bumo be akpaana du pɛlpɛlbi nna nɛ bumo alɛ wora shiriya a jo nɛ b to bumo be ata. Bumo be egbaŋɛ be alotobi du kpakpa fanɛ awarabi nna, nɛ bumo be kena to be egbaŋɛturko malɛ be aya bee kilgi to manaŋ manaŋ fanɛ kawuliwuli na.

²⁹ Bumo be benapoana bee munto nna fanɛ ebuluŋ ka pɛ kusɔbɔya nsaa gbeye kumo a yɔ kakpa nɛ shɛŋ maaŋ tiŋ n suge kumo bumo kutɔ na.

³⁰ Kachɛ nɛ baaŋ kre kena m ba na, baaŋ munto fanɛ teku ka bee kaa ketili a gbri na. Tentembiri nɛ kebagato beeŋ sɔ efuli na kikɛ so, ŋkpal manɛ so kuwɔlpa nɛ k biri to beeŋ buu kefulto nɛ k wɔtɔ kabre ere kikɛ so.