Aizaaya 44 - EBƆRƐ BE KAWƆL

Enyɛnpe Ebɔrɛ na nawule ka la Ebɔrɛ be asheŋ

¹ Ade be kaman nɛ Enyɛnpe Ebɔrɛ na kaŋɛ le: “Israɛl be basa, ma e lara menyi fanɛ ma nyɛrbi.

² Ma e la Enyɛnpe Ebɔrɛ nɛ e to menyi. Jemanɛ nɛ b kurge menyi kikɛ nɛ n chɛ menyi to. Men sa maa lɔ kufu, ŋkpal manɛ so, men la ma nyɛrbi nɛ ma basa laraso nɛ mee sha nna.

³ Meeŋ shin nɛ kasawule nɛ k wɔl a baŋɛ ŋ ki mbombi e shile kumo so. Meeŋ shin nɛ ma kiyoyu e gbelge menyi be mbia so nɛ ma nɛfa e ba menyi be kaman to ebi so.

⁴ Baaŋ purge fanɛ afitiri nɛ a bee nya nchu nɛnɛ, ŋko ndibi nɛ a kɔ afantaŋ ga nsaa yil mbombi nɛ a bee shile ase.

⁵ Basa pɔtɛ beeŋ kaŋɛ le kukoko to: ‘N la Enyɛnpe Ebɔrɛ peya nna.’ Baaŋ ta bumo be amu n ti Israɛl be basa so. Bumo be ekama beeŋ sibɛ Enyɛnpe Ebɔrɛ na be ketre n deŋi mbe be kabre so nsaa tre mo kumu Ebɔrɛ be esa.”

⁶ Enyɛnpe Ebɔrɛ nɛ e bee ji kuwura Israɛl so nsaa kuŋ kumo na e kaŋɛ le: “Ma e la sososo nɛ lalaloge; n nawule e la Ebɔrɛ. Ma kaman, Ebɔrɛ kikɛ maŋ wɔtɔ.

⁷ Esa kikɛ maaŋ tiŋ n wora asɔ nɛ n wora ere. Esa kikɛ malɛ maaŋ tiŋ ŋ kaŋɛ kusɔ nɛ k beeŋ wora yili saŋɛ be sososo n ya fo kumo be lalaloge.

⁸ Men sa maa lɔ kufu, ma basa! Men nyi yili dra dra na kikɛ m ba fo mbre, ma e naa kaŋɛ asɔ nɛ e beeŋ baa wora kikɛ; menyi alɛ e la ma eshɛdajipoana. N nawule e la Ebɔrɛ, shɛŋ maŋ naa kɔ eleŋgboŋ fanɛ ma.”

Agbirana ka maaŋ tiŋ n wora shɛŋ be asheŋ

⁹ Bekama nɛ b lɔŋɛ agbirana maŋ la shɛŋ. Agbirana nɛ baa lɔŋɛ a fa yawu kpakpaso na maŋ kɔ tɔnɔ kikɛ. Basa nɛ baa shuŋ agbirana ere du fanɛ etanpo nɛ basa nɛ b maŋ kɔ kanyiasheŋ nna. Bumo alɛ beeŋ ji anishinyɔr ŋkpal loŋ so.

¹⁰ Keta kebɛlso n lɔŋɛ kegbir a shuŋ kumo fanɛ Ebɔrɛ maŋ kɔ tɔnɔ kikɛ!

¹¹ Esa kama nɛ e bee shuŋ kegbir nɛ basa nɛ baa lɔŋɛ agbirana na kikɛ la edimɛdi nna. Bumo alɛ kikɛ be lalaloge la ŋaba nna. Shin nɛ b ba yili ma anishi to nɛ n ji bumo demu nɛ fo keni. Baaŋ baa chicha nseŋ ji anishinyɔr.

¹² Bɔyɛpo e naa ta kebɛlso a wɔtɔ edɛ to nsaa bɛa kumo a lɔŋɛ asɔ. Enɔ to nɛ e bee keta hama na a bɛa kebɛlso a lɔŋɛ kapɔrduli nɛ e bee sha na. Jemanɛ nɛ e bee shuŋ na, akoŋ nɛ achukoŋ kikɛ bee pɛ mo nna nɛ mo alɛ naa gben a ti so, a ŋini fanɛ dimɛdi e la mo.

¹³ Ndibi be eshɛlpo e naaŋ ku kedibi nseŋ chaŋ kusɔ nɛ e bee sha na be kapɔrduli n deŋi kumo so. Kumo be kaman nɛ e shɛl kedibi na nɛ k ki fanɛ dimɛdi be kapɔrduli gbagba n yili mbe laŋ to.

¹⁴ Eshɛlpo na beeŋ tiŋ n yɔ kupuŋ to n ya ku kakale ŋko kelera ŋko jaŋkelia be kedibi n shɛl. Mo alɛ beeŋ naŋ tiŋ n duu kedibi nseŋ jo nɛ bɔrɛ e ba n wurge kumo so nɛ k daŋ nɛ e ku kumo n shɛl.

¹⁵ Ndibi nɛ edimɛdi kɔ a puga edɛ na be ako nɛ baa ku a lɔŋɛ agbirana. E beeŋ kpele kedibi na be ayabi m puga edɛ n wɔl gbaŋgbaŋ to nseŋ ta ako m puga edɛ n daŋɛ n ji. Kumo be kaman nɛ e ku kedibi na be kaba n lɔŋɛ kegbir a shuŋ kumo.

¹⁶ Ndibi koŋwule na be ako nɛ e beeŋ ta m puga edɛ n tɔ eblaŋ n we m moɛ. Awo to nɛ e ta ako m puga edɛ n wɔl mbe kumu nseŋ kaŋɛ le: “Keni kananɛ kaboŋ bel edɛ a wɔ ebel loŋ! Edɛ walɛ bre!”

¹⁷ Ade be kaman nɛ e ta ndibi nɛ a ka na n lɔŋɛ agbir nseŋ ya gbir m bunyaŋ kumo ŋ kaŋɛ: “Fo e la ma ebɔrɛ, mɔlga ma!”

¹⁸ Basa nɛ baa shuŋ agbirana maŋ nyi asheŋ, bumo alɛ nsaa du fanɛ etanpo. B ti bumo be nfɛra nɛ anishi so nna a laŋɛ kashenteŋ na be kaplɛa so.

¹⁹ Esa nɛ e bee lɔŋɛ agbir maŋ kɔ mbe kumu so be eleŋ ŋko nfɛra nɛ e tiŋ ŋ kaŋɛ le: “Ndibi na be ako nɛ n ta m puga edɛ n daŋɛ ajibi n ji nseŋ tɔ eblaŋ edɛ koŋwule na to n we na. Ndibi nɛ a ka na nɛ n ta n lɔŋɛ kegbir na. Amoso kedishiŋ fuloŋ nɛ mee gbir a bunyaŋ na!”

²⁰ Esa nɛ e bee shuŋ agbir baa du fanɛ esa nɛ e bee muu nsunɔ a ji nna. Mbe kawulisheŋ na fule mo nna nɛ e ta mbe kumu n wɔtɔ kebaawɔtɔ ko to nɛ esa maaŋ naŋ tiŋ n chɛ mo to na. Ŋkpal manɛ so, e maaŋ shuli fanɛ kegbir nɛ e bee shuŋ na maŋ la Ebɔrɛ kikɛ.

Enyɛnpe Ebɔrɛ ka la etopo nɛ emɔlgapo be asheŋ

²¹ Ade kikɛ be kaman nɛ Enyɛnpe Ebɔrɛ na naŋ kaŋɛ le: “Israɛl be basa, men baa nyiŋi fanɛ men la ma nyɛrbi nna. Mee to menyi nɛ men baa la ma nyɛrbi. Ma alɛ maaŋ teŋ menyi so kikɛ.

²² Ma e fuge menyi be alubi fanɛ afu ka ber kuwɔlpa n ya lɛ na nna. Men bɛta m ba ma kutɔ. Ma e la esa nɛ e bee mɔlga menyi.”

²³ Men kaŋɛ esoso nɛ kasawule kikɛ fanɛ a fara a boŋ nshɛ! Men naŋ kaŋɛ abee nɛ kupo to be ndibi kikɛ fanɛ amo alɛ gba e baa shuli nshɛ na so! Enyɛnpe Ebɔrɛ na mɔlga mbe basa Israɛlebi, n shin nɛ mbe kemaŋkura dii efuli ashi Israɛl be efuli so.

²⁴ “Ma e la, Enyɛnpe Ebɔrɛ, menyi be emɔlgapo na; Ma e la esa nɛ n to menyi. Ma e la Enyɛnpe Ebɔrɛ nɛ e to kusɔ kikɛ na. N nawule e parga kuwɔlpa to n sɔ esoso kikɛ. Ekama malɛ maŋ chɛ ma to n to durnya.

²⁵ Ma katiŋ to nɛ anebi fɛpoana bee ku efɛ a ki befɛpo, nɛ bekpalpo malɛ bee ki bewulpo. Emamachisheŋ nɛ mee wora e naa shin nɛ dimɛdi be kanyiasheŋ bee ki kawulisheŋ.

²⁶ Ama ma e naa shin nɛ ma anebiana be abɔya bee wora a bɔlɔ so kashenteŋto. Le nɛ baa kaŋɛ: ‘Basa beeŋ ba bɔlɔ Jerusalɛm to, nɛ Enyɛnpe Ebɔrɛ na malɛ e lɔŋɛ nde bureso nɛ a wɔ Juda be efuli so na m pɔr.’

²⁷ Jemanɛ kikɛ nɛ mee sha fanɛ eteku nɛ mbombi kikɛ e wɔl to, mee malga kenishipereso nna nɛ a bee wɔl to.

²⁸ Ma e kaŋɛ Pɛshiya be efuli so be ewura Sairus le: ‘Feeŋ baa la fanɛ ma mbolpɔkpapo n juŋkpar ma basa n wora m bɔlɔ kusɔ kama nɛ mee sha kewora so. Fo e naŋ shin nɛ b naŋ lɔŋɛ Jerusalɛm be kadegboŋ na nɛ bɔrɛlambu na m pɔr.’ ”