Aizaaya 43 - EBƆRƐ BE KAWƆL

Ebɔrɛ ka nase kɔnɔ fanɛ e beeŋ mɔlga mbe basa be asheŋ

¹ Israɛl be basa, Enyɛnpe Ebɔrɛ nɛ e to menyi na yɛ: “Men sa maa lɔ kufu, meeŋ mɔlga menyi. Ma e ti menyi be atre n tre menyi. Men la ma basa nna.

² Nɛ men bɔla lɔr chiŋgeliŋ to gba, ma nɛ menyi e naaŋ baa la. Etɔrɔ nɛ e beeŋ ba menyi so maaŋ pɔɔ menyi so. Nɛ men bɔla edɛ to gba, a maaŋ chɔɔ menyi. Kechɔŋkeni kpakpaso kama nɛ k beeŋ ba menyi so maaŋ pɔɔ menyi so.

³ Ŋkpal manɛ so, ma e la Enyɛnpe menyi be Ebɔrɛ na. Ma, Israɛl be Ebɔrɛ cheembi na, e la menyi be emɔlgapo. Meeŋ kplaŋ Ijipt nɛ Itiopia nɛ kebonfu nɛ baa tre Seba na be asheŋ so nseŋ sɔ menyi n yige.

⁴ Meeŋ kplaŋ efuli pɔtɛana na so nseŋ mɔlga menyi, ŋkpal menyi be asheŋ ka bee par ma ga so. Ma alɛ bee sha menyi nna nsaa maŋkura menyi.

⁵ Men sa maa lɔ kufu! Ŋkpal manɛ so, ma nɛ menyi nna. Meeŋ yili epeŋilarkpa m ba choŋ epeŋitɔrkpa n ya bar menyi abar so.

⁶ Meeŋ kaŋɛ basa nɛ b wɔ kelargato be esoso nɛ bumo nɛ b wɔ kelargato be kaseto na kikɛ fanɛ, b sa menyi, nɛ men la ma basa, ekpa nɛ men baa yɔ! Ma alɛ beeŋ naŋ kaŋɛ bumo fanɛ b shin nɛ men shi efuli pɔtɛana nɛ a wɔ kufɔ kufɔ, nɛ durnya be kaplɛkama m bɛta m ba menyi gbagba be efuli so.

⁷ Men la ŋ gbagba be basa nna, nɛ n to menyi nɛ men baa kemaŋkura ma.”

Israɛlebi ka la Enyɛnpe Ebɔrɛ be eshɛdajipoana be asheŋ

⁸ Nɛ Ebɔrɛ naŋ kaŋɛ le: “Shin nɛ ma basa e gama abar so. B kɔ anishi, ama bumo alɛ maa wu; b kɔ asoe, bumo alɛ maa nu!

⁹ Kaŋɛ efuliana na be basa fanɛ b gama abar so. Bumo be agbirana na be kumo e naaŋ tiŋ ŋ kaŋɛ kusɔ nɛ k beeŋ wora echefoso? Agbirana na be emo e naŋ tiŋ ŋ kaŋɛ kusɔ nɛ k bee wora naniere ere? Men shin nɛ agbirana na e bar bumo be eshɛdajipoana, nɛ b ba ŋini fanɛ kusɔ nɛ b kaŋɛ na la kashenteŋ nna.

¹⁰ Menyi Israɛl be basa e la ma eshɛdajipoana; ma e lara menyi nɛ men baa la ma nyɛrbi, saŋɛ na so menyeeŋ pin ma nseŋ yirda ma nseŋ naŋ pin to fanɛ n nawule e la Ebɔrɛ. Ebɔrɛ kikɛ maŋ naa wɔtɔ n ti ma so. Ekama malɛ maaŋ naa wɔtɔ n ti ma so.

¹¹ N nawule kpeŋ e la Enyɛnpe Ebɔrɛ na. Ma alɛ nawule e naaŋ tiŋ m mɔlga menyi.

¹² Ma e daŋ nase kɔnɔ fanɛ meeŋ mɔlga menyi, ma alɛ wora m bɔlɔ ma kɔnɔ naseso na so. Menyi e la ma eshɛdajipoana nsaa nyi fanɛ mannɛ efuli pɔtɛ ko be kegbir e mɔlga menyi. Ma, Enyɛnpe Ebɔrɛ e kaŋɛ na.

¹³ Ma e la Ebɔrɛ nɛ e wɔtɔ mbaanaayɔ na. Esa kikɛ maaŋ tiŋ ŋ gberge menyi n suge ma enɔ to; ŋko ŋ kuŋ ma ekpa nɛ m maaŋ tiŋ n wora kusɔ nɛ mee sha.”

Israɛl be kelar Babilɔn be efuli so be asheŋ

¹⁴ Kusɔ nɛ Enyɛnpe, Israɛl be Ebɔrɛ cheembi nɛ e mɔlga bumo na kaŋɛ nde: “Meeŋ shuŋi benapo ko nɛ b ba kɔ Babilɔn be efuli so be basa kena nseŋ mɔlga menyi. Ma alɛ beeŋ buri kadegboŋ na be mbunagboŋ to, nseŋ shin nɛ benapo na e ta Babilɔn be basa n wɔtɔ bumo gbagba be ekuloŋgboŋ to n sulɔ bumo a yɔ nɛ b baa boŋ to a shu.

¹⁵ Ma e la Enyɛnpe, menyi be Ebɔrɛ cheembi na. Israɛl, mee to fo nsaa la fo ewura.”

¹⁶ Dra dra na kikɛ nɛ Enyɛnpe Ebɔrɛ na nase ekpa teku peper na to n sa menyi ashi Ijipt be efuli so.

¹⁷ Mo e daŋ juŋkpar benapo lempoana n yɔ kemur to; b daa la benapo nɛ b kɔ egbaŋɛ nɛ egbaŋɛturko nna. B daŋ kɔ n tɔr nsaa maŋ naŋ tiŋ nɛ b koso kikɛ. B daŋ ki fanɛ fitila nɛ b foŋ kumo be edɛ n duŋ nna!

¹⁸ Kumo be kaman nɛ Enyɛnpe Ebɔrɛ naaŋ kaŋɛ le: “Men teŋ asheŋ nɛ a wora dra na so! Menyi alɛ e sa maŋ ta menyi be nfɛra n wɔtɔ asheŋ nɛ e wora n choŋ na to.

¹⁹ Men baa keni kusɔ popɔr nɛ meeŋ wora na ekpa. K tea wora gba! Menyeeŋ tiŋ n wu kumo naniere! Meeŋ wora ekpa keshishɛrsawule so nseŋ shin nɛ men nya mbombi ashi kasawule wɔlso so.

²⁰ Jemanɛ ko bee ba nɛ n shin nɛ elɔr e baa shile keshishɛrsawule so, nɛ ma basa laraso e nya nchu a nuu. Saŋɛ na so asɔbɔya lubi beeŋ baa maŋkura ma, nɛ ejiŋkaamu nɛ egbuŋgbula kikɛ e baa di ma epaŋ.

²¹ B la basa nɛ n to bumo n sa ma kumu nna, nɛ b baa boŋ nshɛ a kpaŋ ma!”

Israɛl be kulubi be asheŋ

²² Ade be kaman, nɛ Enyɛnpe Ebɔrɛ na naŋ kaŋɛ le: “Ama ma asheŋ gba menyi, Israɛl be basa, nna nɛ menyi maŋ naa shuŋ ma.

²³ Menyi maŋ ta mbolpɔ n lara esarga chɔɔso n sa ma, ŋko n ta menyi be esarga m bunyaŋ ma. Ma alɛ maŋ yili menyi so a fin ayu be esarga ŋko efɛa belbelso be eduwu be esarga n shin nɛ ebɔl e lar menyi.

²⁴ Menyi maŋ tɔ efɛa belbelso be eduwu n sa ma ŋko n sa ma menyi be asɔbɔya be nfɔ gba. Ama menyi be alubi nɛ men bela n deŋi ma so; nseŋ shin nɛ menyi be aworandeso lar ma ebɔl.

²⁵ Ma, e naa ta menyi be alubi a paŋ menyi, ŋkpal esa nɛ e la ma so. Ma alɛ maŋ naa nyiŋi alubi nɛ men wora ŋ gbiti ma na.

²⁶ To, men shin nɛ ma nɛ menyi e yɔ demujikpa! Nɛ men ta menyi be asheŋ n nase ma anishi to a ŋini fanɛ men wora n nyalɛ nna!

²⁷ Men nananyɛn sososo daŋ wora kulubi nna, nɛ menyi be bejuŋkparpoana malɛ lar ma kaman.

²⁸ Amoso nɛ n daa maŋ shin nɛ menyi be bɔrɛmatapoana shuŋ ma ashi ma bɔrɛlambu to na. Ma alɛ e daŋ shin nɛ Israɛl be efuli mur nɛ menyi be basa ji anishinyɔr na.”