Aizaaya 42 - EBƆRƐ BE KAWƆL

Enyɛnpe Ebɔrɛ be kayɛrbi be asheŋ

¹ Enyɛnpe Ebɔrɛ na yɛ: “Ma kenya nde, ma e naa sa mo eleŋ. Mo e la esa nɛ n lara, nɛ ma kagbene bee fuli mo so. N ta ma Kiyoyu nna n sa mo, nɛ e bar keji asheŋ nɛ amo be ekpa so ashi efuliana so.

² E maaŋ ponte awɔrso ŋko m malga awɔrso ashi agbembi so.

³ E maaŋ bu kejolobi nɛ k dɛlɛ to a yil ŋko n duŋ fitila nɛ k maa wu nɛnɛ. Ama e beeŋ shin nɛ keji asheŋ nɛ amo be ekpa so e baa la ekama peya.

⁴ E maaŋ gben n yige to ŋko m pɔ aba; e beeŋ shin nɛ keji asheŋ nɛ amo be ekpa so e ba durnya to. Efuli pɔtɛ so be basa pere kenishi nna a jo mbe keŋini.”

⁵ Ebɔrɛ e to esoso nseŋ parga kumo to n sɔ kaplɛkama; mo e to kasawule nɛ asɔ kama nɛ e wɔ kumo so na kikɛ; mo e sa durnya to be basa kikɛ ŋkpa nɛ efute. Naniere kusɔ nɛ Enyɛnpe Ebɔrɛ na bee kaŋɛ mbe kayɛrbi nde:

⁶ “Ma, Enyɛnpe Ebɔrɛ na e tre fo nseŋ sa fo eleŋ, nɛ fo shin nɛ keji asheŋ nɛ amo be ekpa so e ba durnya to. Fo so nɛ ma nɛ basa kikɛ beeŋ bɔla so n wora kɔnɔkoŋwule be ŋkre. Fo so nɛ Ebɔrɛ be kebaanyi be kefulto beeŋ bɔla so m ba efuliana na to.

⁷ Fo e naaŋ shin nɛ etanpo be anishi e bugi; Feeŋ sɔ basa nɛ b wɔ tentembiri be kabuti to n yige.

⁸ N nawule kpeŋ e la Enyɛnpe Ebɔrɛ na. M maaŋ shuli nɛ agbir ŋko edimɛdi e sɔ kemaŋkura nɛ bunyaŋ nɛ e daga ma na.

⁹ Asheŋ kama nɛ ŋ kaŋɛ fanɛ a beeŋ wora na wora kashenteŋto. Naniere meeŋ naaŋ kaŋɛ fo asheŋ popɔr pɔɛŋ nɛ a fara a wora.”

Keboŋ kashɛ ŋ kpaŋ Enyɛnpe Ebɔrɛ na be asheŋ

¹⁰ Men boŋ kashɛ popɔr n sa Enyɛnpe Ebɔrɛ na; nɛ durnya to be basa kikɛ e boŋ kashɛ ŋ kpaŋ mo! Menyi nɛ menyee nite teku so, e kpaŋ Enyɛnpe Ebɔrɛ na; nɛ asɔ keniso kikɛ nɛ a wɔ teku to e, kpaŋ mo! Menyi nɛ men wɔ mplasawule nɛ a wɔ kufɔ kufɔ na so, e kpaŋ Enyɛnpe Ebɔrɛ na.

¹¹ Menyi basa nɛ men wɔ keshishɛrsawule so nɛ nde nɛ a wɔ kumo so na kikɛ e kpaŋ Ebɔrɛ; nɛ basa nɛ b wɔ kakpa nɛ baa tre Kɛda na gba e kpaŋ mo! Men shin nɛ basa nɛ b wɔ kadegboŋ nɛ baa tre Sela na e yili abee be awɔlto n wora awɔr kagbene fuli so!

¹² Menyi basa nɛ men wɔ mboŋ wɔfɔ e kpaŋ Enyɛnpe Ebɔrɛ n ta kemaŋkura n sa mo!

¹³ Enyɛnpe Ebɔrɛ na bee lar nna n ya kaa kɔ fanɛ enapo na; e bela ase nna nseŋ wora shiriya a jo kena. E beeŋ boŋ to awɔrso ŋ kaŋɛ kena be asheŋ, e beeŋ kɔ m pɔɔ mo doŋana so.

Enyɛnpe Ebɔrɛ na ka beeŋ chɛ mbe basa to be asheŋ

¹⁴ Ebɔrɛ yɛ: “Ŋ lo ma kɔnɔ n chɛr ga. M maŋ tuge ma basa shɛŋ. Ama naniere jemanɛ fo nɛ n wora kusɔ ko, nɛ mee shu to fanɛ eche nɛ kakurge ta mo na.

¹⁵ Meeŋ mur abeebi nɛ abeegboŋ nseŋ shin nɛ ndibi nɛ afitiri e wɔl. Meeŋ shin nɛ elɔr nɛ mbombi e wɔl to nɛ apa e feeto.

¹⁶ Meeŋ juŋkpar etanpo m bɔla ekpaana nɛ b maŋ naŋ bɔla so ŋ ku so so. Meeŋ shin nɛ bumo be tentembiri e ki kefulto nseŋ shin nɛ ekpa lubi nɛ baa nite so e nyalɛ n sa bumo. Ma nnɔ naseso nna na, ma alɛ beeŋ wora m bɔlɔ amo kikɛ so nyam.

¹⁷ Bekama nɛ b yirda agbirana, nɛ bumo nɛ baa ta apɔrso fanɛ bumo be ebɔrɛana na, beeŋ ji anishinyɔr nseŋ ŋaba.”

Ebɔrɛ be basa ka maa wora kasonu be asheŋ

¹⁸ Nɛ Enyɛnpe Ebɔrɛ na naŋ kaŋɛ le: “Ekpawu, men nu nfe! Menyi, etanpo malɛ e keni n wu nɛnɛ!

¹⁹ Esa maŋ tan a chɔ ma kayɛrbi ŋko a la kpawu a chɔ ma kabɔ nɛ n shuŋi na.

²⁰ Fo, Israɛl, wu asɔ damta ga, ama fo alɛ be lakal maŋ wɔ amo to. Fo kɔ asoe nɛ a beeŋ tiŋ n nu asheŋ, ama fo alɛ maŋ kaŋ asoe n nu shɛŋ.”

²¹ Enyɛnpe Ebɔrɛ na kaa bee sha kumɔlga basa so, e bee keni mbe mbraana nɛ keŋini a bɔlɔ kenishi nna, mo alɛ nsaa sha mbe basa e baa bunyaŋ amo.

²² Ama naniere mbe basa ki basa nɛ beko suge bumo be asɔ eleŋso nna, nseŋ ta bumo kikɛ n wɔtɔ emaŋ chiŋgeliŋ to ŋko n ti ebu nɛ esa kikɛ maaŋ tiŋ n lara bumo. Beko daŋ suge asɔ kama b daa kɔ nna nɛ esa kama malɛ daa maŋ wɔtɔ nɛ e kɔ n sɔ amo n sa bumo.

²³ Menyi to be emo e naaŋ kaŋ kusoe n nu kusɔ nɛ ŋ kaŋɛ? Yili kabre a yɔ, menyeeŋ kaŋ asoe n nu nɛnɛ a?

²⁴ Wanɛ e sa ekpa nɛ beko ba suge Israɛl be asɔ? Enyɛnpe Ebɔrɛ nɛ an wora n da so na gbagba e sa bumo ekpa nɛ b wora loŋ! Ŋkpal manɛ so, an daa maa wɔ kebaawɔtɔ nɛ e daa sha na to ŋko n daa wora mbe keŋini nɛ e sa anyi na kasonu.

²⁵ Amoso nɛ e shin nɛ mbe agbogboŋ ba anyi so nseŋ shin nɛ kena lubi koso anyi so na. Mbe agbo daŋ suse fanɛ edɛ nna ashi Israɛl kikɛ to, ama an daa maŋ nyi kusɔ nɛ k daa wora na. Anyi alɛ daa maŋ koya shɛŋ kumo to.