Aizaaya 41 - EBƆRƐ BE KAWƆL

Israɛl be echɛtopo be asheŋ

¹ Ebɔrɛ yɛ: “Menyi basa nɛ men wɔ mplasawule so kikɛ e wora shruum n nu nfe! Men wora shiriya m ba kute menyi be asheŋ nɛ men wora be asheŋ ashi demujikpa. Meeŋ sa menyi ekpa nɛ men malga. Men shin nɛ ma nɛ menyi e ba abar so, n fin emo nɛ e kɔ kashenteŋ.

² Wanɛ e daŋ shi epeŋilarkpa m bar esa nɛ e kɔ m pɔɔ so na, nseŋ shin nɛ e daŋ kɔ m pɔɔ so kaplɛkama nɛ e yɔ na? Wanɛ e shin nɛ e tiŋ ŋ kɔ m pɔɔ bewura nɛ efuliana na so na? Mbe tokobi daa ŋele bumo nna a lɛ nɛ baa wu a ki shishɛrpumpuŋ. Nɛ mbe atanyembi malɛ daa pesaŋ bumo to fanɛ kananɛ afu bee kaa ber amimi a lɛ na.

³ E daa ju a buu bumo so manaŋ manaŋ nna hale mbe aya daa maa beta kasawule gba! Mo alɛ daa maŋ nya doro kikɛ.

⁴ Wanɛ e daŋ shin nɛ le wora? Wanɛ e yili edimɛdi be adrasheŋ n sa bumo? Ma Enyɛnpe Ebɔrɛ nɛ n wɔtɔ sososo na kikɛ na e wora loŋ! Ma, alɛ e naaŋ baa wɔtɔ hale mbaanaayɔ.

⁵ Basa nɛ b wɔ nsawule nɛ a wɔ kufɔ kufɔ so na wu kusɔ nɛ n wora; nɛ kufu pɛ bumo nɛ baa chicha. Amoso b gama abar so nna m ba ma kutɔ.

⁶ Basa nɛ baa shuŋ agbirana bee lɔlɔ abar nna a kaŋɛ le: ‘Men sa maa fɔŋ so’

⁷ Eshɛlpo na bee kaŋɛ bɔyɛpo le nna: ‘Fo wora asɔ!’ Nɛ esa nɛ mo alɛ bee fifɛa kegbir na so nɛ k bee ki bɔlbɔlbi na malɛ bee leŋ emo nɛ e bee ber kegbir na a mata abar so na to. B yɛ: ‘Kumo be keŋalga m mata abar so walɛ paa!’ Anyembi nɛ b ta ŋ gbir kegbir na n yili kumo be eyilikpa.

⁸ Israɛlebi, men la ma nyɛrbi nna. Ma e lara menyi. Menyi nɛ men la nteri Eebraham be kaman to ebi na nɛ n lara.

⁹ Durnya be mboŋ wɔfɔ kikɛ nɛ n shi ŋ keta menyi m ba, nseŋ kaŋɛ menyi le: ‘Men la ma nyɛrbi nna.’ M maŋ kini menyi n lɛ.

¹⁰ Amoso men sa maa lɔ kufu. Ma nɛ menyi e wɔtɔ! Ma e la menyi be Ebɔrɛ. Men sa maŋ shin nɛ kufu e pɛ menyi nɛ men baa chicha! Meeŋ sa menyi eleŋ nseŋ chɛ menyi to. Ma alɛ beeŋ kuŋ menyi nseŋ mɔlga menyi.

¹¹ Bekama nɛ b kishi menyi beeŋ ji anishinyɔr lubi. Bumo nɛ baaŋ kɔ menyi kena beeŋ wu

¹² nsaa maaŋ naa wɔ durnya to kikɛ.

¹³ Ma e la Enyɛnpe menyi be Ebɔrɛ na. Ma e wɔtɔ menyi eleŋ nsaa kaŋɛ, ‘Men sa maa lɔ kufu; meeŋ chɛ menyi to.’ ”

¹⁴ Ade be kaman, nɛ Enyɛnpe Ebɔrɛ na kaŋɛ: “Israɛl be basa, men ka maŋ shi nsaa maa kɔ eleŋ ga ere gba, men sa maa lɔ kufu; meeŋ chɛ menyi to. Ma, nɛ n la Israɛl be Ebɔrɛ cheembi na e naa mɔlga menyi.

¹⁵ Meeŋ shin nɛ men ki fanɛ kedishiŋ nɛ k kɔ ewi nsaa du pɛlpɛlbi. Menyeeŋ bure abee to nɛ e ki shishɛrpumpuŋ.

¹⁶ Kumo be kaman nɛ men ta amo n lɛ afu to nɛ afu na e sulɔ amo n ya lɛ. Afugboŋ beeŋ pesaŋ amo to n sɔ kaplɛkama. Saŋɛ na so menyi be ŋgbene beeŋ fuli menyi ŋkpal ŋ ka la men be Ebɔrɛ so. Kede be kaman nɛ men kpaŋ ma nɛ n la Israɛl be Ebɔrɛ cheembi na.

¹⁷ Nɛ ma basa be ebɔl to wɔlto ŋkpal achukoŋ so, nɛ baa fin nchu nɛ b nuu nseŋ kule ma, ma, Enyɛnpe Ebɔrɛ na beeŋ nu bumo be kekule. Ma, Israɛl be Ebɔrɛ na, maaŋ kplaŋ bumo so kikɛ.

¹⁸ Meeŋ shin nɛ elɔr e baa shile abee be awɔlto nɛ abuye e pete a shile ataŋɛ to. Meeŋ shin nɛ keshishɛrsawule e ki fanɛ apa nɛ kasawule wɔlso e ki fanɛ kubuye e shile.

¹⁹ Ma alɛ beeŋ shin nɛ ndibi nɛ baa tre sida nɛ akasia nɛ ɔlif na e kɔr keshishɛrsawule so. Ejaŋkilɛa nɛ ŋkɔbidibi nɛ echɛchɛdibi beeŋ kɔr nsawule jiga so ŋ ki apo.

²⁰ Saŋɛ na so basa beeŋ wu loŋ nseŋ pin fanɛ ma, Enyɛnpe Ebɔrɛ na e shin nɛ k wora. Kumo be kaman nɛ b pin to fanɛ Israɛl be Ebɔrɛ cheembi na e shin nɛ loŋ wora.”

Agbirana ka maŋ la shɛŋ be asheŋ

²¹ Kusɔ nɛ Enyɛnpe Ebɔrɛ, Israɛl be ewura na kaŋɛ nde: “Menyi efuli pɔtɛana be agbirana na e kaŋɛ kusɔ nɛ men kɔ nɛ men kaŋɛ ma! Men ta kamɔrɔji kama nɛ men kɔ m ba!

²² Men ba kaŋɛ ma kusɔ nɛ k beeŋ wora echefoso, saŋɛ na so nɛ k kaŋ wora, anyeeŋ pin kumo. Men bugi asheŋ nɛ a wora dra na to ŋ kaŋɛ ashi demujikpa, nseŋ kaŋɛ anyi amo be afito.

²³ Men naŋ kaŋɛ anyi asheŋ nɛ a beeŋ wora echefoso, aloŋ nɛ anyeeŋ pin fanɛ men la agbirana kashenteŋto! Men wora kesheŋ lela ko ŋko alemaŋkarsheŋ ko, n shin nɛ kufu e pɛ anyi nɛ kɔnɔ e mɔ anyi.

²⁴ Menyi gbagba nɛ asɔ nɛ menyee wora kikɛ maŋ la shɛŋ. Basa nɛ baa shuŋ menyi na la basa nɛ mbushu pɛ bumo nna!

²⁵ Ma, Enyɛnpe Ebɔrɛ na lara esa ko nɛ e wɔ epeŋilarkpa. Men shin nɛ e shi kelargato be esoso m ba kɔ kena. E bee chichi bewura so nna fanɛ b ka la eshii, ŋko fanɛ kananɛ mpuliya be epɔrpo bee chichi ebɔ so na nna.

²⁶ Menyi, agbirana to be emo e daŋ wu kusɔ nɛ k beeŋ wora echefoso ŋ kaŋɛ? Saŋɛ na so, anyeeŋ tiŋ n wu k kaa wora m bɔlɔ so nseŋ kaŋɛ fanɛ k la kashenteŋ? Men to be ekama maŋ naŋ kaŋɛ shɛŋ a laŋɛ echefoso be kaplɛa so. Esa kikɛ malɛ maŋ naŋ nu men ka kaŋɛ kusɔ ko!

²⁷ Ma, Enyɛnpe Ebɔrɛ na e juŋkpar m bɔ baru na n sa Zayɔn. N daŋ shuŋi kabɔ Jerusalɛm to fanɛ e ya kaŋɛ le nna: ‘Menyi be basa bee ba! Baa ba epe nna!’

²⁸ Ŋ ka keni agbirana na kikɛ to, bumo be ekama maŋ kɔ shɛŋ a kaŋɛ; bumo to be ekoŋwule gba maŋ tiŋ n sa ma asheŋ bishiso na be atugebi.

²⁹ Agbirana ere kikɛ du jiga pasaa! B maaŋ tiŋ n wora shɛŋ, Bumo alɛ kikɛ maŋ kɔ eleŋ.”