Aizaaya 40 - EBƆRƐ BE KAWƆL

Tama be mmalga be asheŋ

¹ Anyi be Ebɔrɛ na yɛ: “Meeŋ lolo ma basa, n shin nɛ bumo be ŋgbene e wushi!

² Meeŋ leŋ Jerusalɛm be basa to. Kaŋɛ bumo fanɛ b ji awurfoŋ n chɛr ga. Naniere b nya bumo be alubi be ketampaŋ. N tiŋ ŋ gberge bumo kusoe ga ŋkpal bumo be alubi so.”

³ Esa ko bee ponte a kaŋɛ le: “Men lɔŋɛ ekpa kiyi to n sa Enyɛnpe Ebɔrɛ nɛ e bɔla so! Men tise n tise asɔ kama nɛ e dese ekpa na to na, nseŋ sulɔ ajaŋ n deŋi kumo so nɛ k baa walɛ nɛnɛ!

⁴ Men ti ataŋɛ nɛ amaŋ kikɛ, nseŋ dɛdɛ abeegboŋ nɛ abeebi kikɛ so. Men lɔŋɛ mboŋ nyaŋgraŋ, n shin nɛ amo kikɛ e dɛdɛ so.

⁵ Saŋɛ na so, Enyɛnpe Ebɔrɛ na be keshi nɛ kemaŋkura beeŋ lar efuli nɛ basa kikɛ e wu kumo. Enyɛnpe Ebɔrɛ na gbagba e nase kumo be kɔnɔ!”

⁶ Esa ko daŋ kaŋɛ ma fanɛ m ponte awɔrso, nɛ m bishi mo le: “N ponte ŋ kaŋɛ manɛ?” Nɛ e yɛ: “Ponte ŋ kaŋɛ awɔrso fanɛ edimɛdi kikɛ du fanɛ afitiri nna; b maa chɛr kebaawɔtɔ to fanɛ kananɛ atoto maa chɛr nsaa chɔɔ a mur ashi kupuŋ to na.

⁷ Enyɛnpe Ebɔrɛ baŋ shin nɛ afu ber m ba, afitiri bee bolo nna nɛ atoto malɛ bee chuge a tɔr. Edimɛdi maa chɛr fanɛ kananɛ afitiri maa chɛr nsaa wu na.

⁸ Kashenteŋto, afitiri bee bolo nna nɛ atoto malɛ bee chuge a tɔr, ama Ebɔrɛ be kamalga na bre wɔtɔ nna mbaanaayɔ.”

⁹ Fo nɛ fo kɔ baru lela a ba Zayɔn na, e dii n yɔ kebee jeŋgreŋ na so. Fo nɛ fo kɔ baru lela a ba Jerusalɛm to na, bugi kɔnɔ m ponte awɔrso; maŋ kumo so nsaa maa lɔ kufu. Kaŋɛ nde nɛ a wɔ Juda be efuli so na le: “Menyi be Ebɔrɛ bee ba!”

¹⁰ Enyɛnpetale Ebɔrɛ na kɔ eleŋgboŋ a ba nɛ e ba ji kuwura basa so eleŋso. E keta basa nɛ e kɔ m mɔlga bumo na nna a ba, nɛ kumo be loŋ fuli mbe kagbene.

¹¹ Enyɛnpe Ebɔrɛ na bee keni mbe efuli so nna, fanɛ kananɛ mbolpɔkpapo bee keni mbe mbolpɔ so na. E bee ta mbolpɔbi na nna a di ŋkɔŋ, nsaa juŋkpar mbolpɔ nioana na malɛ boeŋ boeŋ.

Shɛŋ ka maŋ du fanɛ Israɛl be Ebɔrɛ na be asheŋ

¹² Esa kikɛ maaŋ tiŋ n ta mbe enɔ be epun to ŋ karga teku; ŋko n ta mbe enɔ ŋ karga awɔlpa. Esa maaŋ tiŋ n ta durnya to kikɛ be eshishɛr n wɔtɔ kurwa to; ŋko n ta abeegboŋ nɛ abeebi n deŋi kusɔ so ŋ karga amo be egbɛ.

¹³ Esa maaŋ tiŋ ŋ kaŋɛ Enyɛnpe Ebɔrɛ kusɔ nɛ k daga fanɛ e wora, ŋko ŋ ŋini mo kesheŋwora ŋko n ji mo asoe to.

¹⁴ Enyɛnpe Ebɔrɛ na maa yɔ esa kikɛ kutɔ n ya kaa fin kanyiasheŋ ŋko kepinto ŋko kewora asheŋ nɛ e niŋi amodoŋwura kutɔ.

¹⁵ Efuliana na maŋ la shɛŋ Enyɛnpe Ebɔrɛ bre kutɔ, a du fanɛ nchu ka do bokiti nɛ nchu to nna; ŋko kalabɛr nɛ a deŋ kusɔ nɛ b kɔ a karga asɔ be egbɛ so nna. Aplasawule nɛ e wɔ kufɔ kufɔ na kikɛ du fanɛ enɔ be bɔlɔ be eshishɛr nna.

¹⁶ Nɛ esa ta Lebanɔn be kupo to be asɔbɔya kikɛ n lara sarga n sa anyi be Ebɔrɛ na, a kraŋ maaŋ fo mo; kumo to be ndibi kikɛ gba maaŋ fo m puga sarga be edɛ.

¹⁷ Efuliana na kikɛ maŋ la shɛŋ n sa Ebɔrɛ, mo ere bee ta amo nna fanɛ asɔ fuloŋ.

¹⁸ Esa kikɛ maŋ du fanɛ Ebɔrɛ. Amoso esa maaŋ tiŋ ŋ ŋini kananɛ e du.

¹⁹ E maŋ du fanɛ kegbir nɛ dimɛdi lɔŋɛ na nna, ŋko kegbir nɛ bɔyɛpo ŋalga shuwa ŋ gbiti nseŋ ta gbiti be kubɔtoshembi n ji kumo kebita na nna.

²⁰ Esa nɛ e maaŋ tiŋ n nya shuwa ŋko gbiti n lɔŋɛ kegbir bee ku kedibi nɛ k maa tiŋ a bɛ manaŋ nna a lɔŋɛ kumo. E bee fin esa nɛ e nyi kashɛl nɛnɛ nna nɛ e shɛl kegbir nɛ k maaŋ melgi n tɔr nna.

²¹ Fo maŋ nyi a? B maŋ kaŋɛ fo dra dra na kikɛ a? Fo maŋ nu kananɛ durnya fara a?

²² Esa nɛ e chena mbe kuwurputi so ashi durnya be esoso nɛ k baŋ awɔlpa so na e to durnya. Basa nɛ b wɔ kumo to na du fanɛ atutulombi mo kutɔ nna. Mo e parga kuwɔlpa to fanɛ patisa, ŋko fanɛ wajɛbu nɛ esa e chena to na.

²³ Ebɔrɛ e naa bar bumo nɛ baa ji kuwura kenyɛnso kaseto, nsaa shin nɛ baa ki basa fuloŋ ashi durnya to na.

²⁴ B du fanɛ asɔduuso popɔrbi nna nɛ b baŋ kraŋ duu amo nɛ a maŋ naŋ mur achin na nna. Enyɛnpe Ebɔrɛ na baŋ shin nɛ afu ber m ba, baa wɔl nna nɛ afu na e ber bumo n ya lɛ fanɛ amimi na.

²⁵ Wanɛ bre nɛ esa beeŋ tiŋ n ta m ber Ebɔrɛ cheembi na? Esa mo e wɔtɔ a du fanɛ mo?

²⁶ Maŋ anishi so ŋ keni awɔlpa so! Wanɛ e to achɛkpabi nɛ fee wu ere? Mo ere Ebɔrɛ nɛ e bee juŋkpar amo fanɛ benapo be ejuŋkparpo na, e nyi kananɛ amo kikɛ sa nɛ amo be kekama be ketre! Enyɛnpe Ebɔrɛ na be yuku shi ga, nɛ achɛkpabi na be kekama maa foe mo so.

²⁷ Israɛl be basa, manɛ nna nɛ menyee fubel a kaŋɛ fanɛ Enyɛnpe Ebɔrɛ na maŋ nyi menyi be etɔrɔ be asheŋ, ŋko mbe shɛŋ maŋ wɔ kapuni nɛ men wɔtɔ ere to?

²⁸ Menyi maŋ nyi a? Menyi alɛ maŋ naŋ nu a? Fanɛ Enyɛnpe na e la Ebɔrɛ nɛ e wɔtɔ mbaanaayɔ; mo e to durnya kikɛ. E maa shuŋ a gben ŋko a gben a chul to kikɛ. Esa kikɛ malɛ maaŋ tiŋ m pin mbe nfɛra to.

²⁹ Enyɛnpe Ebɔrɛ na e naa sa bekama nɛ b maŋ kɔ eleŋ nseŋ gben a chul to na eleŋ.

³⁰ Basa fɔlbi gba bee kaa shuŋ a gben, nsaa fiti a tɔr.

³¹ Ama bekama nɛ b yirda Enyɛnpe Ebɔrɛ na beeŋ nya eleŋ popɔr. Baaŋ ber atɛ to ŋ koso n firgi n yɔ awɔlto fanɛ ejɔnɔkoso; bumo alɛ beeŋ shile ga, ama b maaŋ gben a chul to; baaŋ nite ekpa tenteŋ, ama b maaŋ gben m bɛlɛ.