Aizaaya 36 - EBƆRƐ BE KAWƆL

Asiriyaebi ka bee funti Jerusalɛmebi be asheŋ

¹ Ewura Hɛzekaya ka bee ji Juda be efuli so be kuwura be kafɛ kuduanasopo to nɛ Sennakerɛb nɛ e la Asiriya be efuli so be ewurgboŋ na ba kɔ Juda be ndegboŋ nɛ b pɔr ŋ kulti na n suge amo be galeŋga.

² Ndoŋ nna nɛ Asiriya be ewura na kaŋɛ mbe benapo be ejuŋkparpo fanɛ e lar kadegboŋ nɛ baa tre Lackish na nseŋ keta benapo damta n yɔ Jerusalɛm to. Benapo be ejuŋkparpo na daŋ ya yili ekpa nɛ k mata ewajɛluepoana be eshuŋkpa nɛ k dese ŋ kra nchu be kubɔr nɛ b kur nɛ nchu bee shi Esoso be Kepa na to a bɔla kumo to na nna.

³ Ndoŋ nna nɛ Juda be benimu asa ko lar n ya shɛr mo to. Bumo e daa la Eliakim nɛ e la Hilkiya pibinyɛn nseŋ daa la esa nɛ e bɛ ewura so na, nɛ Shɛbna nɛ e la ewura be esibɛpo na, nɛ Jowa nɛ e la Asaf pibinyɛn nseŋ daa la esa nɛ e bee keni ewurkpa be asheŋ nɛ b sibɛ n nase so na.

⁴ Ndoŋ nna nɛ Asiriya be benapo be ejuŋkparpo na kaŋɛ bumo fanɛ Asiriya be ewurgboŋ bee sha nna nɛ e pin kusɔ nɛ k shin nɛ ewura Hɛzekaya kɔ kenyɛn nseŋ yirda mbe kumu loŋ.

⁵ E bee fɛ fanɛ e beeŋ tiŋ n yili kɔnɔ to be mmalga nawule so ŋ kre kena nseŋ tiŋ ŋ kɔ m pɔɔ so a? Naniere e ka lar Asiriya be ewura kaman ere, wanɛ e naaŋ chɛ mo to?

⁶ E bee ta mbe kumu a to Ijipt be efuli nɛ kumo be ewura so nna, ŋko? Nɛ loŋ bre nna, k du fanɛ e ka bee yirgi kedibi buso nɛ k beeŋ tiŋ n da mbe enɔ be epun to m bɔl so nna. Kananɛ Ijipt be ewura, Fɛɛro, du n sa esa kama nɛ e ta mbe kumu n lɛ mo so nna na.

⁷ Kumo be kaman nɛ Asiriya be benapo be ejuŋkparpo na naŋ kaŋɛ: “Menyee sha kekaŋɛ ma fanɛ Enyɛnpe menyi be Ebɔrɛ na nawule nɛ men ta menyi be amu a to so a? Mannɛ Enyɛnpe Ebɔrɛ na be ebɔrɛsure nɛ mboŋ nɛ baa shuŋ mo na nɛ Hɛzekaya kaŋɛ fanɛ b mur nseŋ ka kakpa koŋwule n sa basa nɛ b wɔ Juda be efuli so nɛ Jerusalɛm to nɛ b baa shuŋ Ebɔrɛ ndoŋ nawule na a?

⁸ To, meeŋ yili Asiriya be ewura be aya to nna nɛ ma nɛ menyi e ji n yili. Nɛ menyeeŋ tiŋ n nya egbaŋɛ be bediipo, ma alɛ beeŋ sa menyi egbaŋɛ ŋgboŋ anyɔ.

⁹ Menyi maaŋ tiŋ n tu Asiriya be efuli so be enapo nɛ e maŋ kɔ eyilikpagboŋ gba ŋ kɔ, ama menyee tama fanɛ Ijiptebi beeŋ sa menyi egbaŋɛturko nɛ egbaŋɛ diipoana nɛ b ba chɛ menyi to ŋ kɔ a?

¹⁰ Men baa nyi fanɛ Enyɛnpe Ebɔrɛ na e kaŋɛ ma fanɛ m ba kɔ m mur menyi be efuli na. Mo alɛ e chɛ ma to.”

¹¹ Ndoŋ nna nɛ Eliakim nɛ Shɛbna nɛ Jowa kaŋɛ benapo be ejuŋkparpo na le: “Jande, ta Aramaik be ŋgbar to a malga anyi kutɔ. Amo nɛ anyee nu. Sa maa gbar Hibruw be ŋgbar to, ŋkpal manɛ so, basa nɛ b wɔ egbalana ere so kikɛ bee nu kusɔ nɛ anyee malga nna na.”

¹² Nɛ Asiriya be benapo be ejuŋkparpo na malɛ kaŋɛ le: “Menyee tama fanɛ menyi nɛ ewura na nawule nɛ anyi be ewurgboŋ shuŋi ma fanɛ m ba malga n sa a? Mannɛ loŋ nna, basa nɛ b chena egbalana na so na gba nɛ mee malga a sa. K maaŋ chɛr bumo alɛ gba beeŋ ji bumo gbagba be ejɔŋɛ nseŋ nuu bumo be ebɔnfɔl, fanɛ kananɛ menyi benimuana beeŋ wora na.”

¹³ Kumo be kaman nɛ e ponte awɔrso ŋ kaŋɛ le Hibruw be gbar to, saŋɛ na so, ekama nɛ e wɔ ndoŋ beeŋ nu: “Men nu kusɔ nɛ Asiriya be ewurgboŋ bee kaŋɛ menyi.

¹⁴ E yɛ, men sa maŋ shin nɛ ewura Hɛzekaya e fule menyi. E maaŋ tiŋ m mɔlga menyi ashi anyi be enɔ to.

¹⁵ E kaŋ kaŋɛ menyi fanɛ Enyɛnpe Ebɔrɛ na beeŋ kɔ m mɔlga menyi ashi Asiriya be ewurgboŋ be enɔ to, men sa maŋ yirda kusɔ nɛ e kaŋɛ na.

¹⁶ Men sa maŋ nu n sa ewura Hɛzekaya! Men nu n sa ma ewurgboŋ na. Menyi alɛ e ta menyi be amu n sa mo. E beeŋ shin nɛ men baa kraa kɔ menyi be waindibi be adɔana nɛ efigi be ndibi be asɔrso a ji nsaa nu menyi be atirbu to be nchu

¹⁷ n ya fo fanɛ ewurgboŋ na ka beeŋ lɔŋɛ menyi n chena efuli nɛ k du fanɛ men gbagba be efuli ere so. Ndoŋ la kakpa nɛ ewaindibi wɔtɔ nna nɛ men baa ta a wora eyabra a nuu, nɛ ayu malɛ gba wɔtɔ nɛ men baa ta a wora ebodobodo a we.

¹⁸ Men sa maŋ shin nɛ ewura Hɛzekaya e fule menyi nɛ men baa fɛ fanɛ Enyɛnpe Ebɔrɛ na beeŋ kɔ n suge menyi. Efuli ko be agbirana daŋ tiŋ m mɔlga amo be basa ashi Asiriya be ewurgboŋ na be enɔ to a?

¹⁹ Nnɛ nɛ basa nɛ b daa wɔ ndegboŋ nɛ baa tre Hamaf nɛ Appad nɛ Sefavaim na be agbirana naa wɔ naniere? Samɛria be efuli so be agbirana daa maŋ tiŋ ŋ kuŋ kasawule na ashi Asiriya be benapo be enɔ to.

²⁰ Agbirana na be kekama daŋ maŋ tiŋ ŋ kuŋ kumo be basa ashi Asiriya be ewura be enɔ to. Nɛ manɛ so nɛ menyi ere bee fɛ fanɛ Enyɛnpe Ebɔrɛ na beeŋ tiŋ m mɔlga Jerusalɛm bre ashi mbe enɔ to?”

²¹ Ŋkpal Ewura Hɛzekaya ka daŋ kaŋɛ bumo fanɛ b sa maŋ kaŋ kaŋɛ shɛŋ na so, basa na daŋ maŋ tuge shɛŋ.

²² Kumo be kaman nɛ Eliakim nɛ Shɛbna nɛ Jowa ta kagbenejija ŋ kpɛa bumo be asɔbuuso to nseŋ ya bɔ kusɔ nɛ Asiriya be benapo be ejuŋkparpo kaŋɛ na be kubɔya n sa ewura Hɛzekaya.