Aizaaya 34 - EBƆRƐ BE KAWƆL

Ebɔrɛ ka beeŋ gberge mo doŋana kusoe be asheŋ

¹ Menyi efuli kama so be basa e ba abar so nseŋ nu nfe! Durnya kikɛ nɛ kusɔ kama nɛ k wɔ kumo to e ba nfe m ba nu.

² Eyɛnpe Ebɔrɛ na nya agbo n wɔtɔ efuli pɔtɛana na nɛ amo be benapo kikɛ. Mo alɛ yili kumo fanɛ bumo kikɛ beeŋ mur.

³ Baaŋ wu n dese m bɛa a dufɛ nɛ bumo be ŋklaŋ malɛ e shile abee so ŋ gbelge to fanɛ nchu na.

⁴ Epeŋi nɛ kufɔl nɛ achɛkpabi kikɛ beeŋ foe basa be anishi so nɛ b bɔɔ awɔlpa fanɛ kelaŋ na. Kusɔ kama nɛ k wɔ awɔlpa so beeŋ tɔr to fanɛ afantaŋ ŋko asɔrso ka bolo kedibi so n chuge n tɔr to na.

⁵ Enyɛnpe Ebɔrɛ na kaŋ ta mbe tokobi n wora awɔlpa so be asɔ kusɔ nɛ e bee sha n loge, k beeŋ gbelge efuli nɛ baa tre Edɔm na be basa nɛ Enyɛnpe Ebɔrɛ na yili kumo fanɛ baaŋ mur na so.

⁶ Bumo be ŋklaŋ beeŋ gbiti Enyɛnpe Ebɔrɛ na be tokobi na fanɛ kananɛ mbolpɔ fɔlbi nɛ mboe nɛ b ta n lara esarga be ŋklaŋ bee gbiti nsaŋɛbi na. Ŋkpal manɛ so, Enyɛnpe Ebɔrɛ na beeŋ mɔ basa damta n ta bumo n lara sarga ashi kadegboŋ nɛ baa tre Bozra na nɛ Edɔm be efuli so be kaplɛkama.

⁷ Basa na beeŋ wu n tɔr fanɛ egbolufɛlso nɛ egbolufɔlbi, nɛ bumo be ŋklaŋ e pere kasawule so nɛ nfɔ e sɔ kaplɛkama.

⁸ Le be jemanɛ ere nɛ Enyɛnpe Ebɔrɛ na beeŋ kɔ n suge Zayɔn nseŋ sɔ kumo be basa be kɔnɔ ŋ kɔ bumo doŋana.

⁹ Mbombi nɛ a wɔ Edɔm be efuli so beeŋ kilgi ŋ ki fanɛ kootal nɛ eshishɛr na malɛ e ki fanɛ jɛrbi. Efuli na kikɛ beeŋ suse so fanɛ kootal ka bee chɔɔ edɛ to na.

¹⁰ K beeŋ baa chɔɔ kapa nɛ kanyɛ nna, nɛ edishi malɛ e baa lar kumo to hale mbaanaayɔ. Edɔm beeŋ ki keshishɛrsawule a dese nfɛ damta nɛ esa maaŋ naŋ bɔla kumo to n choŋ kikɛ.

¹¹ Egbuŋgbula nɛ kupuŋ to be asɔbɔya be yiri yiri e naaŋ sɔ kasawule na kikɛ so a wɔtɔ. Enyɛnpe Ebɔrɛ na beeŋ shin nɛ k naaŋ ki kasawule fuloŋ n dese fanɛ kananɛ k daa du kasɔto be jemanɛ so na.

¹² Ewura maaŋ naa wɔtɔ a keni Edɔm be efuli na so. Bejuŋkparpoana gba maaŋ naa wɔtɔ a juŋkpar kumo be basa.

¹³ Ewi nɛ egɔnnyaŋɛ e naaŋ kɔr bumo be ewurkpaana nɛ nde nɛ b pɔr egbal ŋ kulti amo na kikɛ to. Saŋɛ na so ejiŋkaamu nɛ egbuŋgbula be yiri yiri beeŋ ba kaa wɔ amo to.

¹⁴ Kupuŋ to be asɔbɔya lubi fanɛ ekarmɛ nɛ ekuntuŋ beeŋ ba kaa nite a kulti kumo nɛ ayoyu lubiana e baa shu a tre abar ndoŋ. Kanyɛso be asɔ lubi beeŋ ta ndoŋ ŋ ki bumo be ewushikpa.

¹⁵ Egbuŋgbula beeŋ tɔ asha nseŋ to afule m bure, hale m bela bumo be bibi nɛ a daŋ ashi ndoŋ. Loŋ be jemanɛ na nɛ ejita e gama abar so a firgi a kulti ndoŋ.

¹⁶ To, keni Enyɛnpe Ebɔrɛ na be asɔ keniso be kawɔl na to ŋ kraŋ kusɔ nɛ k bee kaŋɛ. K yɛ: “Enyɛnpe Ebɔrɛ na e bɔla mbe Kiyoyu be eleŋgboŋ so m bar mbe asɔ toso abar so. Amo be kukoŋwule kama maŋ foe.”

¹⁷ Enyɛnpe Ebɔrɛ na beeŋ barga kasawule na to n sa bumo nseŋ sa ekama mbe kachige nɛ b baa wɔ ndoŋ nfɛ damta. Saŋɛ na so kasawule na beeŋ baa la bumo peya mbaanaayɔ.