Aizaaya 32 - EBƆRƐ BE KAWƆL

Ewura nɛ e kɔ ketre lela be asheŋ

¹ Kachako bee ba nɛ ewura ko e ba ta kashenteŋji a ji kuwura nɛ efuli na be benimu malɛ e baa ji asheŋ nɛ amo be akpa so.

² Ewura na nɛ benimuana na beeŋ baa du fanɛ kusɔ kuŋ afu nɛ kakpa nɛ esa beeŋ shile n ya ŋana bɔrɛfu so nna. Bumo alɛ beeŋ baa du fanɛ mbombi ashi kiyi to nɛ kefaltagboŋ nɛ k bee kuŋ epeŋi a sa kayul.

³ Baaŋ bugi anishi a wu nseŋ bugi asoe a nu basa be asheŋ tirso.

⁴ Bumo alɛ beeŋ baa kɔ kanyiti, nsaa pin asheŋ to nseŋ naa wora asheŋ nɛ b kaŋɛ fanɛ baaŋ baa wora na.

⁵ Ewura nɛ mbe benimuana maaŋ naŋ sa bewulpo bunyaŋ ŋko n sa basa jiga fanɛ beyu kemaŋkura be eyilikpa.

⁶ Bewulpo bee malga kawuli be mmalga nna nsaa kre asheŋ lubi be kewora be nia. Kusɔ kama nɛ baa wora ŋko a kaŋɛ la katege nna n sa Enyɛnpe Ebɔrɛ na. Bumo alɛ maa sa basa nɛ akoŋ kɔ ajibi ŋko basa nɛ achukoŋ kɔ nchu.

⁷ Esa nɛ e maa ji kashenteŋ la esa lubi nna nsaa wora asheŋ lubi nawule. E bee kre kebɔla efɛ so nna m mur betirpo nseŋ kuŋ bumo ekpa nɛ b sa maŋ nya kusɔ nɛ k daga bumo.

⁸ Ama esa nɛ ekama bee sa bunyaŋ bre bee ji kashenteŋ nna nsaa yil kusɔ nɛ k niŋi so a wora asheŋ.

Jerusalɛm to be beche be kasogberge be asheŋ

⁹ Menyi beche nɛ men wɔtɔ a maa wora shɛŋ nsaa ji kananɛ menyee sha fanɛ kusɔ ko ka maŋ tir menyi na, e kaŋ asoe n nu kusɔ nɛ mee kaŋɛ ere.

¹⁰ Ashere shɛŋ maŋ tir menyi naniere, ama ta a ba kafɛ a ba saŋɛ ere so kagbenejija damta beeŋ tɔr menyi so. Ŋkpal manɛ so, ndibi be asɔrso maaŋ sɔr nɛ b nya n wora yabra n sa menyi nɛ men baa nuu.

¹¹ Men daa wɔtɔ nna fanɛ shɛŋ ka maŋ tir menyi, ama naniere men shin kufu e baa kɔ menyi nɛ men baa chicha! Men gbaŋ menyi be asɔbuuso n lɛ nseŋ ta keeli be asɔbuuso m buu.

¹² Men ta kagbenejija a ber ŋgbene so ŋkpal nsawule lela nɛ a bee wora adɔjibi nɛ ndibi sɔrso kikɛ nɛnɛ na ka mur,

¹³ nɛ ewi be yiri yiri kɔr ma basa be nsawule so so. Men baa shu anishichubi ŋkpal kagbenefuli nɛ k maŋ naa wɔ basa be elaŋ to ashi kadegboŋ nɛ kebaawɔtɔ daa nite nɛnɛ kumo to na so.

¹⁴ Basa beeŋ shile n lar ewurkpa ŋ ka kumo fuloŋ nɛ basa be elaŋ nɛ ebu lempoana nɛ a daa kuŋ basa na kikɛ e ki alambure a dese hale mbaanaayɔ. Kumo be kaman nɛ ndoŋ e ki ekurma be epelkpa nɛ mbolpɔ be ejikpa.

¹⁵ Ama Ebɔrɛ kraa beeŋ naŋ sa anyi mbe kiyoyu. Nsawule pɔso na beeŋ naŋ ki nsawule lela nɛ a kɔ eleŋ nɛ adɔsawule e wora adɔjibi nɛnɛ ga.

¹⁶ Saŋɛ na basa beeŋ baa kɔ kashenteŋji nsaa wora asheŋ nɛ a niŋi nsaa ji asheŋ nɛ amo be ekpa so ashi kasawule na be kaplɛkama.

¹⁷ Ŋkpal ekama ka beeŋ baa wora kusɔ nɛ k daga so, kayurwushi beeŋ ba nɛ kufu maaŋ naa kɔ esa kama mbaanaayɔ.

^18-19 Hale nɛ bɔrɛ ba nɛ abɔrɛjembubi tɔr kupo to be ndibi so nɛ basa be kananɛ baa puchi bumo be ndegboŋana so duga so gba, Ebɔrɛ be basa bre maaŋ baa wɔ kafɔŋ to. Kayurwushi beeŋ baa wɔ bumo be elaŋana to nɛ b maaŋ naa ŋana kufu.

²⁰ Ekama be kagbene beeŋ fuli mo ŋkpal bɔrɛchu damta nɛ adɔjibi beeŋ nya n wora nɛnɛ, nɛ ekurma nɛ ana malɛ gba e nya afitiri lela a ji nsaa nite yila yila so na so.