Aizaaya 30 - EBƆRƐ BE KAWƆL

Asheŋ ka maaŋ nyalɛ n sa efuli kpeŋso na be asheŋ

¹ Enyɛnpe Ebɔrɛ na yɛ: “Asheŋ maaŋ nyalɛ n sa basa nɛ baa ji kuwura Juda be efuli so na ŋkpal b ka lar ma kaman a maa nu a sa ma so. Baa bɛ ŋkre nɛ m maŋ wora so nna nseŋ shin nɛ bumo nɛ efuli ko so ebi bee wora kɔnɔkoŋwule be ŋkre nɛ m maa sha kumo be loŋ. B wɔtɔ nna a wora alubi a deŋi abar so.

² Ade be kaman, baa yɔ Ijipt be efuli so nna n ya kaa fin kechɛto a maa bishi ma shɛŋ. Baa sha fanɛ Ijipt e baa kuŋ bumo nna, amoso b ta bumo be yirda nna n wɔtɔ Ijipt be ewura to.

³ Ama Ijipt be ewura na maaŋ baa kɔ eleŋ nɛ e tiŋ n chɛ bumo to. Ijipt be kekuŋ na beeŋ bar bumo ŋaba nna.

⁴ Juda be basa be mbɔ teŋ yɔ Ijipt be efuli so be ndegboŋ nɛ baa tre Zowan nɛ Hanes na,

⁵ ama Ijiptebi na maaŋ tiŋ ŋ kuŋ bumo. Keyirda loŋ be efuli na la jiga nna nsaa la kawulisheŋ n ti so.”

⁶ Ebɔrɛ be kubɔya nɛ e sa asɔbɔya nɛ a wɔ kiyi nɛ k wɔ Juda be efuli so be kelargato be kaseto be kaba so na nde: “Menyi basa ere bee ta ekurma nɛ enyɔma a sulɔ asɔ lela nɛ amo be yawu du kpakpa a bɔla efuli lubiana nɛ ebuluŋ nɛ awɔ lubi wɔ amoso to a yɔ efuli nɛ k maaŋ tiŋ n chɛ menyi to so.

⁷ Ijipt be kechɛto maŋ la shɛŋ. Amoso nɛ mee tre kumo ‘Kusɔ gbeyeso nɛ k du fanɛ laŋchaŋ a maaŋ tiŋ n wora shɛŋ na.’ ”

Basa nɛ b maŋ kɔ kasonu be asheŋ

⁸ Ade be kaman nɛ Ebɔrɛ kaŋɛ fanɛ n sibɛ kusɔ nɛ basa bee sha kebaanu be asheŋ n wɔtɔ kawɔl ko to, saŋɛ na so kusɔ ko beeŋ baa dese a laŋɛ bumo be kananɛ b lubi be kaplɛa so mbaanaayɔ.

⁹ B wɔtɔ nna a lar Ebɔrɛ kaman nsaa ku efɛ nsaa kini kebaanu a sa Enyɛnpe Ebɔrɛ na be keŋini.

¹⁰ Bumo alɛ bee kaŋɛ anebiana na nna fanɛ b baa lo bumo be nnɔ to. Kusɔ nɛ baa kaŋɛ bumo e la: “Men sa maa kaŋɛ anyi kusɔ nɛ k daga be asheŋ. Men baa kaŋɛ anyi asheŋ nɛ anyee sha kebaanu na, hale nɛ a maŋ la kashenteŋ gba.

¹¹ Men yige kebaakaŋɛ anyi kusɔ nɛ Ebɔrɛ kaŋɛ be asheŋ! Anyi maŋ naa sha kenu shɛŋ a laŋɛ Israɛl be Ebɔrɛ cheembi na be kaplɛa so.”

¹² Ama kusɔ nɛ Israɛl be Ebɔrɛ cheembi na kaŋɛ nde: “Men kplaŋ kusɔ nɛ ŋ kaŋɛ menyi so nseŋ ta menyi be yirda n deŋi kanyaŋ nɛ efɛsheŋ so.

¹³ Men wora n jija. Men ki fanɛ egbal jeŋgreŋ nɛ k yili esoso m baŋɛ m ba fo kaseto nna. Menyi alɛ beeŋ tiŋ n tɔr epul to.

¹⁴ Men ki fanɛ kapuya nɛ k bure to kpachɛrkpachɛrbi nna nɛ kumo be kapɛlanfu kama maaŋ tiŋ n chɔ edɛ ŋko m jɔ nchu.”

¹⁵ Kumo be kaman nɛ Enyɛnpetale, Israɛl be Ebɔrɛ cheembi na kaŋɛ basa na le: “Men bɛta m ba kaa yirda ma nsaa du boeŋ. Aloŋ nɛ menyeeŋ nya eleŋ nɛ kekuŋgboŋ.” Ama men kini kewora loŋ!

¹⁶ Kusɔ nɛ menyee fɛ e la fanɛ menyeeŋ dii egbaŋɛ shileso n shile m mɔlga menyi be amu ŋkpal men doŋana so. Menyee fɛ fanɛ menyi be egbaŋɛ beeŋ tiŋ n shile ga ama bumo nɛ baa ju a buu menyi so na peya beeŋ shile a chɔ bumo nɛ b pɛ menyi.

¹⁷ Menyi to be basa kagboŋ beeŋ wu bedoŋ be enapo koŋwule nseŋ shile nɛ bumo be benapo anu e shin nɛ menyi kikɛ e shile. Kumo be lalaloge menyi to be basa gbrɛbi e naaŋ ka nsaa du fanɛ kedibi nɛ b ta tuta n chɛ m mata n yuu kebee be awɔlto na.

¹⁸ Ama amo nɛ amo kikɛ Enyɛnpe Ebɔrɛ na kraa jo nɛ e wu menyi kuwɔr nna. E wora shiriya nɛ e shu menyi so ŋkpal e kaa bee wora asheŋ nɛ a daga jemanɛ kikɛ na so. Kagbenefuli la bekama nɛ bumo be yirda wɔ Enyɛnpe Ebɔrɛ na to na peya nna.

Ebɔrɛ ka beeŋ nɛfa mbe basa be asheŋ

¹⁹ Men basa nɛ men wɔ Jerusalɛm to maaŋ naŋ shu kikɛ. Enyɛnpe Ebɔrɛ na la ewɔrwupo nna nɛ men shu n tre mo fanɛ e chɛ menyi to, e beeŋ nu n sa menyi.

²⁰ Enyɛnpe Ebɔrɛ na beeŋ shin nɛ men luri jemanɛ kpakpaso to, ama mo gbagba e naaŋ ŋini menyi ekpa nɛ men bɔla so n lar kpakpa na to; nɛ men maaŋ naa kulti a fin mo gba.

²¹ Nɛ fanɛ men foe ekpa a yɔ jisoso ŋko bena so gba, menyeeŋ nu mbe ebɔl menyi be kamanto ka bee kaŋɛ le: “Ekpa na nde. Men bɔla kumo so.”

²² Saŋɛ na so nɛ men ta menyi be agbirana nɛ men ŋalga shuwa nɛ gbiti n wurge amo so na n ya lɛ fanɛ epi na nseŋ kaŋɛ le: “Men baa yɔ, anyi maŋ naa sha menyi.”

²³ Ade be kaman, jemanɛ kikɛ nɛ men duu asɔ, Enyɛnpe Ebɔrɛ na beeŋ shin nɛ bɔrɛchu e ba nɛ a kɔr n daŋ nseŋ wora nɛnɛ nɛ men teŋi. Men be asɔbɔya malɛ gba beeŋ nya ejikpa damta a ji.

²⁴ Egbolu nɛ ekurma nɛ men kɔ a dɔ menyi be adɔ na gba beeŋ baa nya afitiri bumbuŋ nɛ awɔlso lela ga a ji.

²⁵ Kachɛ nɛ menyeeŋ kɔ n suge men doŋana be ebu lempoana nseŋ mɔ bumo be basa na, nɛ mbombi beeŋ shile abee nɛ apreŋ kikɛ so ŋ gbelge to.

²⁶ Kufɔl beeŋ fuli to parr fanɛ epeŋi nɛ epeŋi malɛ e fuli to ale ashunu so n ti so, a du fanɛ nchɛnshunu be kefulto na. Kachɛ nɛ Enyɛnpe Ebɔrɛ na beeŋ fɔr nseŋ kre mbe basa be achuu nseŋ chɛ bumo be alɔana na nɛ le beeŋ wora.

Ebɔrɛ ka beeŋ gberge Asiriya kusoe be asheŋ

²⁷ Enyɛnpe Ebɔrɛ na be eleŋgboŋ nɛ kemaŋkura shi kufɔ kufɔ a ba. Edɛ nɛ edishi e naa ŋini mbe agbo. E malga nɛ mbe kɔnɔ to be mmalga bee chɔ fanɛ edɛ na.

²⁸ E shin nɛ afu juŋkpar mo fanɛ nchugboŋ ka bu n sulɔ kusɔ kama a yɔ nna. Nchugboŋ na sulɔ efuliana na n yɔ kemur to nseŋ shin nɛ bumo be ŋkre lubiana kikɛ ba ekar.

²⁹ Ama menyi, Ebɔrɛ be basa bre be ŋgbene beeŋ fuli menyi nɛ men baa boŋ nshɛ fanɛ kananɛ menyee wora nchɛgboŋ cheembiana be kanyɛso na. Menyi be ŋgbene beeŋ fuli menyi fanɛ basa nɛ b ta nlopi a boŋ nshɛ a yɔ Enyɛnpe Ebɔrɛ nɛ e bee kuŋ Israɛl na be bɔrɛlambu to na.

³⁰ Enyɛnpe Ebɔrɛ na beeŋ shin nɛ ekama e nu mbe ebɔlgboŋ nɛ k kɔ kufu na nɛ mbe agbogboŋ nɛ k du fanɛ edɛ wuloŋ wuloŋ nɛ bɔrɛfugboŋ nɛ abɔrɛjembubi nɛ bɔrɛchu damta na be asheŋ.

³¹ Jemanɛ nɛ Asiriya be basa beeŋ nu Enyɛnpe Ebɔrɛ na be ebɔl nseŋ wu mbe kasogberge be eleŋ na, kufu gboŋgboŋi beeŋ tɔr bumo so.

³² Enyɛnpe Ebɔrɛ na be basa beeŋ baa laŋ ŋkure nɛ ejaŋjilaŋ a wɔtɔ mo jemanɛ nɛ e bee kɔ nsaa laŋɛ a kɔ Asiriya be basa na.

³³ Dra dra na kikɛ nɛ Enyɛnpe Ebɔrɛ na bela kakpa nɛ edɛgboŋ beeŋ chɔ Asiriya be ewurgboŋ m mɔ na ase n yili. Ndoŋ la kakpa chiŋgeliŋ nsaa wɔ mpar nna nɛ ndibi biti abar so kumo to. Enyɛnpe Ebɔrɛ na e naaŋ fute edɛ be adondulombi n wɔtɔ ndibi na to nɛ a suseso.