Aizaaya 3 - EBƆRƐ BE KAWƆL

Demuji nɛ k ba Jerusalɛm nɛ Juda be efuli so be asheŋ

¹ To, Enyɛnpetale Ebɔrɛ na bee shin nɛ e lara kusɔ kama nɛ esa kama nɛ basa ta bumo be anishi n yuu so ashi Jerusalɛm to nɛ Juda be efuli so nna. E bee shin nɛ e lara bumo be ajibi jiso nɛ nchu nuuso,

² nɛ bumo be basa nɛ b wora asheŋgboŋ nɛ baa puchi bumo so nɛ esoji nɛ demujipoana nɛ anebiana nɛ bekpalpo nɛ ekrachigboŋ,

³ nɛ bumo be esoji be benimuana nɛ ekrachi be bejuŋkparpoana nɛ gomena be benimu nɛ bekama nɛ baa bɔla ŋkilgi so a wora asheŋ ashi kade na to nɛ efuli na kikɛ so nna.

⁴ Enyɛnpe Ebɔrɛ na beeŋ shin nɛ mbinyɛnsobi nɛ b maŋ naŋ daŋ n yili na e ji basa na so kuwura.

⁵ Basa beeŋ baa kɔrfɛ abar. Mbifɔlbi maaŋ baa sa bumo be benimuana bunyaŋ. Basa jiga maaŋ naa bunyaŋ basa nɛ b daga bunyaŋ.

⁶ Jemanɛ ko bee ba nɛ kanaŋ to be kabuna ko be basa e lara bumo gbagba to be esa nseŋ kaŋɛ mo le: “Fo e kɔ asɔbuuso, amoso ki anyi be ejuŋkparpo ashi tɔrɔ be jemanɛ ere to.”

⁷ Ama amodoŋwura beeŋ kaŋɛ bumo le: “Mannɛ ma ere! M maŋ tiŋ n chɛ menyi to. Ma alɛ gba maŋ kɔ ajibi ŋko asɔbuuso. Men sa maŋ ta ma ŋ ki menyi be ejuŋkparpo!”

⁸ Kashenteŋto, asheŋ maaŋ nyalɛ n sa Jerusalɛmebi! Juda be efuli so malɛ baa mur nna na! Kusɔ kama nɛ baa kaŋɛ ŋko a wora bee gbiti Enyɛnpe Ebɔrɛ na nna. Baa tege Ebɔrɛ ekama be anishito nna.

⁹ Kananɛ bumo be anishiakpaana du na e naa ji shɛda a gbiti bumo. Baa wora alubi nna a maŋ naa ta amo a ŋana fanɛ kananɛ kade nɛ baa tre Sodɔm na be basa daa wora na nna. Asheŋ maaŋ nyalɛ n sa bumo. Bumo alɛ gbagba e bar kumu lubi gboŋgboŋi bumo be amu so.

¹⁰ Kaŋɛ basa nɛ b niŋi na fanɛ asheŋ beeŋ nite nɛnɛ n sa bumo ere. Baaŋ nya bumo be kegben be tɔnɔ.

¹¹ Ama asheŋ maaŋ nyalɛ n sa basa lubi na bre. Kusɔ nɛ b ta n wora basa ko na e naaŋ wora bumo alɛ gba naniere.

¹² Mbifɔlbi nɛ beche e naa ji kuwura ma basa so nsaa kɔrfɛ bumo ga. Ma basa, menyi be bejuŋkparpoana maa juŋkpar menyi nɛnɛ, amoso menyi maŋ nyi ekpa nɛ menyeeŋ bɔla so n wora asheŋ.

Enyɛnpe Ebɔrɛ na ka ji mbe basa demu be asheŋ

¹³ Enyɛnpe Ebɔrɛ na bela ase nɛ e kaŋɛ kusɔ nɛ k wɔtɔ nseŋ wora shiriya nɛ e ji mbe basa demu.

¹⁴ E bee shin nɛ e ji mbe basa be benimuana nɛ bejuŋkparpoana demu nseŋ kaŋɛ le a laŋɛ bumo be kaplɛa so: “Men chɔɔ ma adɔjibi m mur nseŋ nyaŋ betirpo n suge asɔ m bɔlɔ menyi be elaŋana.

¹⁵ Menyi alɛ maŋ kɔ ekpa nɛ men nyaŋ ma basa n wɔtɔ nsaa ta betirpo fanɛ b maŋ la shɛŋ ŋkpal bumo be ketir so. Ma, Enyɛnpetale Ebɔrɛ na e kaŋɛ na.”

Jerusalɛm to be beche be asheŋ

¹⁶ Kede be kaman, nɛ Enyɛnpe Ebɔrɛ na naŋ kaŋɛ le: “Keni kananɛ Jerusalɛm to be beche bee wu bumo be amu loŋ! Baa nite boeŋ boeŋ nna a keni a fin fanɛ benyɛn e baa wu bumo nsaa yɛlga bumo jemanɛ kikɛ. Baa nite nna nɛ bumo be anampase bee gbri.

¹⁷ Amoso ma, Enyɛnpe Ebɔrɛ na beeŋ gberge bumo kusoe nseŋ she bumo be amu kɔlikɔli.”

^18-23 Kachako bee ba nɛ Enyɛnpe Ebɔrɛ na e suge Jerusalɛm to be beche be abitasɔ nɛ baa wɔtɔ bumo be aya so nɛ amu so nɛ abɔ to nɛ asoe to nɛ mbre so nɛ mmuna to nɛ ashilbi to na, nɛ bumo be asɔbuuso so kikɛ. E beeŋ suge bumo be eshata nɛ ekreso nɛ etulale nɛ a bee shin nɛ bumo be kebita bee gberge benyɛn a sa bumo na. Mo alɛ beeŋ naaŋ suge bumo be nle nɛ baa buu fanɛ bewurche na nɛ bumo be asɔbuuso lela nɛ nwuro nɛ enɔ to be ebagiwurbiana kikɛ.

²⁴ Beche na beeŋ baa ka dufɛ nyaŋnyaŋ ŋkpal b ka maaŋ naa gbiti etulale eyurana so so. B maaŋ naa nya a mɛa to a kre so. Baaŋ baa yige bumo be epiŋi nna nɛ a baa sha bumo so kanaŋkama loŋ. Bumo alɛ beeŋ she kɔlikɔli nseŋ buu asɔ farbi, nɛ bumo be kebita e terge nɛ anishinyɔr e pɛ bumo.

²⁵ Ade kikɛ be kaman, Jerusalɛm to be benyɛn lempo nɛ baa tiŋ a kɔ kena na kikɛ beeŋ wu kena to;

²⁶ nɛ kadegboŋ na e ka a dese fanɛ eche ka chena kasawule n teŋi aya a shu keeli na. Ŋkpal manɛ so kumo to be basa kikɛ maaŋ naa wɔtɔ.