Aizaaya 26 - EBƆRƐ BE KAWƆL

Ebɔrɛ ka beeŋ shin nɛ mbe basa e kɔ m pɔɔ so be asheŋ

¹ Kachako bee ba nɛ basa e boŋ kashɛ ere ashi Juda be kasawule so: Anyi be kadegboŋ na kɔ eleŋ! Ebɔrɛ gbagba e naa kɔ a kuŋ kumo be egbalana!

² Men bugi kadegboŋ na be mbunagboŋana na n shin nɛ efuli nɛ k bee ji kashenteŋ nɛ kumo be basa bee wora kusɔ nɛ k niŋi na e luri to.

³ Enyɛnpe Ebɔrɛ na e naa sa basa nɛ bumo be yirda yil to kpakpa na kayurwushi gbagba.

⁴ Amoso an baa yirda Enyɛnpe Ebɔrɛ na saŋkama, nɛ e baa la fanɛ kefalta a kuŋ anyi saŋkikɛ.

⁵ Ebɔrɛ bar an doŋana nɛ baa maŋ bumo be amu so na kaseto; nseŋ mur kadegboŋ lempo nɛ b daa wɔtɔ na, nseŋ shin nɛ kumo be egbalana bure n tɔr kasawule.

⁶ Naniere betirpo nɛ basa nɛ bedoŋ na daa kɔrfɛ na e naa chichi a chichi kakpa nɛ kadegboŋ na daa wɔ na so.

⁷ Kusɔ nɛ k daga nɛ fo Enyɛnpe Ebɔrɛ bee wora jemanɛ kikɛ, nsaa shin nɛ ekpabi bee ki fanɛ kegbembi a sa basa nɛ baa wora fo kasonu.

⁸ Anyee bɛ fo aparsheŋ so nna nsaa ta anyi be tama a to fo so. Fo nawule be ketre nɛ anyee sha fanɛ k baa nya kemaŋkura ashi anyi be ŋgbene to.

⁹ Kanyɛso kikɛ ma kagbene bee kɔ a fin fo nna. Fo baŋ ji durnya nɛ kumo be basa demu, bumo kikɛ beeŋ koya kebaawɔtɔ ŋini so.

¹⁰ Kuwɔr nɛ fo wu kumu kpakpasowuraana ere kikɛ be kaman, b kraa maŋ naŋ koya kewora kusɔ nɛ k daga. Basa nɛ b niŋi gba be kasawule so nfe b kraa wora asheŋ lubi nna nseŋ kini kewu fo, Enyɛnpe Ebɔrɛ na be kemaŋkura.

¹¹ Enyɛnpe Ebɔrɛ, fo doŋana maŋ nyi fanɛ feeŋ gberge bumo kusoe. Shin nɛ b wu fanɛ fee sha kebaachɛ fo basa to saŋkama nna, nɛ anishinyɔr e pɛ bumo. Shin nɛ edɛ nɛ fo bela ase a jo fo doŋana na e chɔɔ bumo m mur.

¹² Enyɛnpe Ebɔrɛ, fo e naaŋ sa anyi kedamaya nɛ kayurwushi, ŋkpal manɛ so, kusɔ kama nɛ anyee wora, fo eleŋ to nɛ anyee tiŋ a wora kumo.

¹³ Beko gba daŋ ji kuwura anyi so n ti fo, Enyɛnpe anyi be Ebɔrɛ na so, ama fo nawule nɛ anyee wora kasonu.

¹⁴ Bumo kikɛ wu naniere nsaa maaŋ naa wɔ ŋkpa to. Bumo be abuniyoyu maaŋ naŋ koso kikɛ, ŋkpal fo ka gberge bumo kusoe nseŋ mur bumo so. Esa maaŋ naŋ nyiŋi bumo kikɛ.

¹⁵ Enyɛnpe Ebɔrɛ, fo e shin nɛ anyi be basa wora keshi, fo e kpalga anyi be efuli be egbaŋ kaba kama so; nɛ kumo be loŋ bar fo kemaŋkura.

¹⁶ Enyɛnpe Ebɔrɛ, fo gberge fo basa kusoe, nɛ b ta kagbenejija nɛ kushu ŋ kule fo.

¹⁷ Ŋkpal kusɔ nɛ fo wora anyi na so, an daŋ ji awurfoŋ fanɛ eche nɛ kakurge ta mo nna.

¹⁸ An daa wɔ ebesa damta to nna fanɛ eche nɛ kakurge ta na, ama anyi alɛ daa maŋ kurge. An daa maŋ tiŋ ŋ kɔ m pɔɔ so kikɛ ashi anyi be kasawule so; anyi alɛ maŋ tiŋ n wora ŋko n nya shɛŋ n sa basa durnya to.

¹⁹ Anyi be basa nɛ b wu na beeŋ naŋ ba ŋkpa to! Bumo be eyurana beeŋ naŋ bɛta m ba ŋkpa to. Bekama nɛ baa di bumo be nchaŋana to na beeŋ naŋ koso m boŋ nshɛ kagbenefuliso Kananɛ kachipurso be bunyaŋ bee shin nɛ nsawule bee wushi na, loŋ nɛ Enyɛnpe Ebɔrɛ na beeŋ naŋ tiŋi basa nɛ b wu dra dra na.

²⁰ Ma basa, men luri menyi be ebuana to nseŋ ti menyi be amu so n wɔtɔ. Men ŋana ndoŋ gbrɛbi, n ya fo fanɛ Enyɛnpe Ebɔrɛ na be agbo ka beeŋ wushi.

²¹ Keni, Enyɛnpe Ebɔrɛ na beeŋ shi ebɔrɛso m ba gberge durnya to be basa kusoe ŋkpal bumo alubi so. Basa kama nɛ b mɔ ashiri to na be asheŋ beeŋ lar efuli nɛ b nya kumo be kasogberge.