Aizaaya 25 - EBƆRƐ BE KAWƆL

Kekpaŋ Enyɛnpe Ebɔrɛ na be asheŋ

¹ Enyɛnpe Ebɔrɛ, fo e la ma Ebɔrɛ; Meeŋ maŋkura fo nseŋ kpaŋ fo ketre. Fo e wora emamachisheŋ nɛ a bee mɔ kɔnɔ; fo alɛ e ta kashenteŋji n shin nɛ fo ŋkre nɛ fo wora dra na kikɛ bɔlɔ so.

² Fo e shin nɛ ndegboŋana bure ŋ ki alambure nɛ amo be ekuŋkpa lempoana mur. Ewurkpaana nɛ an doŋana pɔr na mur hale mbaanaayɔ.

³ Basa nɛ b wɔ efuli lempoana so beeŋ kpaŋ fo; nɛ bumo nɛ b wɔ ndegboŋana nɛ a wɔ efuliana nɛ b maa wu kuwɔr na to e ŋana fo.

⁴ Betirpo nɛ basa nɛ b maaŋ tiŋ n chɛ bumo be amu to shile m ba buu fo etɔrɔ be jemanɛ nseŋ nya bumo be amu. Fo e kuŋ bumo ashi bɔrɛfugboŋ to nseŋ sa bumo kayul epeŋi nyaŋnyaŋso so. Bedoŋ nɛ b maa wu kuwɔr kre m ba fanɛ gbaŋgbaŋ to be afugboŋ,

⁵ ŋko ewule ashi kasawule wɔlso so nna. Ama fo Enyɛnpe Ebɔrɛ na shin nɛ an doŋana lo bumo be nnɔ; nseŋ shin nɛ basa nɛ b maa wu kuwɔr be awɔr kuu, fanɛ kananɛ awɔlpa to be epeŋi be ebeldɛ bee dugaso na.

Ebɔrɛ ka bela kejigboŋ ase be asheŋ

⁶ Enyɛnpetale Ebɔrɛ na beeŋ bela ajibi lela nɛ asɔ nuuso belbelso be kejigboŋ ase n sa durnya to be efuliana kikɛ so ebi ashi kebee nɛ baa tre Zayɔn na so ashi Jerusalɛm.

⁷ Kebee ere so nɛ Enyɛnpe Ebɔrɛ na beeŋ lara kagbenejija nɛ k du fanɛ awɔlpa a buu efuliana na kikɛ so na.

⁸ Enyɛnpetale Ebɔrɛ na beeŋ mur luwu mbaanaayɔ! E beeŋ kpra anishichubi ashi ekama be anishito nseŋ lara ŋaba nɛ mbe basa ji ashi durnya kikɛ to na ashi bumo so. Enyɛnpe Ebɔrɛ na gbagba e kaŋɛ.

⁹ Jemanɛ na kaŋ fo, ekama beeŋ kaŋɛ le: “Mo e la anyi be Ebɔrɛ! An ta anyi be yirda n deŋi mo so, nɛ e mɔlga anyi. Mo e la Enyɛnpe Ebɔrɛ na! An ta anyi be yirda n deŋi mo so, nɛ anyi be ŋgbene fuli nɛ an nya kagbenewushi ŋkpal e ka mɔlga anyi so.”

Ebɔrɛ ka beeŋ gberge Mowab kusoe be asheŋ

¹⁰ Enyɛnpe Ebɔrɛ na e naŋ kuŋ Zayɔn be kebee ere, ama e beeŋ chichi efuli nɛ baa tre Mowab na be basa so fanɛ ana ka chichi atuweklaŋ so n wɔtɔ depɔ to na.

¹¹ Baaŋ wora ania fanɛ baaŋ lar depɔ na to, ama Ebɔrɛ beeŋ wora bumo eyurto n shin nɛ b lar ŋ gben.

¹² E beeŋ shin nɛ Mowabebi na be kumɔlga be kakpa lempoana be egbal jeŋgreŋana e bure n tɔr ŋ ki fanɛ eshishɛr.