Aizaaya 24 - EBƆRƐ BE KAWƆL

Enyɛnpe Ebɔrɛ ka beeŋ gberge durnya kusoe be asheŋ

¹ Enyɛnpe Ebɔrɛ na bee sha kejija durnya kikɛ nna nɛ k dese fuloŋ fanɛ kiyitokpaŋ na. E beeŋ melgi durnya na m buu nseŋ pesaŋ kumo be basa to.

² Kesheŋ koŋwule na e naaŋ tu bɔrɛmatapoana nɛ bumo be basa, nɛ anya nɛ bumo nyɛnpeana, nɛ basa nɛ baa tɔ nɛ bumo nɛ baa fa asɔ, nɛ basa nɛ baa paŋ asɔ nɛ bumo nɛ baa ta asɔ a paŋ basa, nɛ damawuraana nɛ betirpo kikɛ.

³ Durnya na beeŋ jija nseŋ mur kuraa. Enyɛnpe Ebɔrɛ na e kaŋɛ; kumo alɛ beeŋ wora loŋ.

⁴ Kasawule wɔl a baŋɛ to, nɛ durnya kikɛ ki kakpa nɛ basa nɛ b kɔ eyilikpa nɛ bumo nɛ b maŋ kɔ eyilikpa kikɛ wu m bɛ.

⁵ Edimɛdi jija durnya nna ŋkpal b ka kini kewora Ebɔrɛ be mbraana kasonu so. Bumo alɛ maŋ naa sa bumo nɛ Ebɔrɛ be kɔnɔkoŋwule be ŋkre nɛ k daga fanɛ k baa wɔtɔ mbaanaayɔ na bunyaŋ.

⁶ Amoso Ebɔrɛ sho durnya na kɔnɔ nna nɛ kumo to be basa bee wu ŋkpal bumo be alubi so.

⁷ Ewaindibi bee wu nna nɛ yabra be asheŋ bee ki kpakpa. Esa kama nɛ mbe kagbene daa fuli mo wɔ kagbenejija to naniere nna.

⁸ Kagbenefuliso be nshɛ nɛ b daa laŋ ejaŋjilaŋ nɛ ŋkure a boŋ na kikɛ kuu.

⁹ Basa maŋ naa nuu yabra nsaa boŋ nshɛ kagbenefuliso. Yabra gba maŋ naa wora basa ebel

¹⁰ Kebagato e sɔ ndeana na kikɛ to nɛ basa ber bumo be amu so n wɔtɔ ebuana to ŋkpal kufu so.

¹¹ Kagbenefuli foe durnya to nɛ basa bee ponte to agbembi so a kaŋɛ le: “Anyi maŋ naa kɔ yabra! Anyi maŋ naa kɔ yabra!”

¹² Ndegboŋana na kikɛ mur nɛ amo be mbunagboŋana buri to n tɔr.

¹³ Kusɔ nɛ k beeŋ wora efuliana nɛ a wɔ durnya kikɛ to nna na. K beeŋ baa du fanɛ kasɔteŋi be jemanɛ nɛ b ŋeri ndibi kikɛ be asɔrso n lɛ nseŋ chuge waindibi be asɔrso koko na malɛ kikɛ na nna.

¹⁴ Basa nɛ baaŋ ji efute bre beeŋ boŋ nshɛ kagbenefuliso nɛ bumo nɛ b wɔ epeŋitɔrkpa na e malga kananɛ Enyɛnpe Ebɔrɛ na be keshi nɛ kemaŋkura du,

¹⁵ nɛ bumo nɛ b wɔ epeŋilarkpa na malɛ e kpaŋ mo. Basa nɛ b wɔ teku be ekarso na malɛ gba beeŋ fur Enyɛnpe, Israɛl be Ebɔrɛ na.

¹⁶ Anyeeŋ nu b kaa bee boŋ nshɛ a kpaŋ Israɛl nɛ k la efuli niŋiso na ashi durnya be mboŋ wɔfɔ wɔfɔ kikɛ. Ama tama maŋ wɔtɔ n sa ma ere! Ma ere be asheŋ jija n loge nna na! Bedebɔrpo kraa wɔtɔ nna a debɔr basa, nɛ bumo be kedebɔre na malɛ bee daŋɛ so.

¹⁷ Ekama e nu nfe! Kufugboŋ nɛ amaŋ chiŋgeliŋ nɛ ajigbelɛ dese a jo menyi.

¹⁸ Ekama nɛ e wora ania n shile kufugboŋ na beeŋ ya tɔr kemaŋ chiŋgeliŋ to, nɛ emo nɛ e gelge kemaŋ chiŋgeliŋ malɛ e ya tɔr kejigbelɛ to. Bɔrɛchu damta beeŋ shi awɔlpa so m ba kasawule so nɛ durnya be gbaltɔlase e gbuŋgbuŋ to.

¹⁹ Kasawule beeŋ pante m baŋɛ to kaplɛkama.

²⁰ Kumo be kaman nɛ durnya na e baa lente fanɛ esa nɛ e boo nsa na, ŋko afugboŋ kaa bee ber kubuu so na. Durnya be alubi pɔɔ kumo so. Amoso k beeŋ mur nsaa maaŋ naaŋ tiŋ ŋ koso kikɛ.

²¹ Enyɛnpe Ebɔrɛ na beeŋ gberge esoso be eleŋana nɛ durnya to be bewuraana kusoe.

²² Ebɔrɛ beeŋ gbargbar bewuraana n wɔtɔ kemaŋ gboŋ koŋwule to fanɛ basa nɛ b wɔ kabuti to na. E beeŋ ti bumo so loŋ hale nɛ bumo be kasogberge be saŋɛ e ya fo ekar.

²³ Kufɔl beeŋ biri to nɛ epeŋi e nyaŋɛ ŋ gben, ŋkpal manɛ so, Enyɛnpetale Ebɔrɛ na e la ewura. Zayɔn be kebee na so nɛ e beeŋ baa wɔ nsaa ji Jerusalɛm so kuwura nɛ basa na be benimuana e wu mbe kemaŋkura.