Aizaaya 23 - EBƆRƐ BE KAWƆL

Tayɛ be kaplɛa so be kubɔya be asheŋ

¹ Kubɔya nɛ k wɔtɔ a laŋɛ kadegboŋ nɛ baa tre Tayɛ na be kaplɛa so nde. Menyi nɛ menyee ta ekuloŋgboŋ a shuŋ nchu so e boŋ to awɔrso n shu ga! Ŋkpal manɛ so, kade nɛ menyee kaa ta menyi be ekuloŋ a gbuŋ kumo to nɛ baa tre Tayɛ na mur. Kumo to be nwu nɛ ekulonyilikpa kikɛ mur kuraa. Jemanɛ nɛ menyi be ekuloŋgboŋ shi kepla nɛ baa tre Saipres a ba na nɛ men nu ebaru na be asheŋ.

² Menyi eyawujipo nɛ men shi teku be ekarso be kade nɛ baa tre Sidɔn na e baa shu a wɔtɔ epunto ga. Men shuŋi mbɔ teku be kaba ndoŋ n ji yawu nɛ menyi be basa nɛ b wɔ kadegboŋ to na e dii kedama.

³ Men shuŋi basa Ijipt be efuli so nɛ b ya tɔ ayu n laŋɛ n fa, nseŋ tu efuliana nɛ a ka na n ji yawu be yiri kikɛ.

⁴ Sidɔn be kadegboŋ na du fanɛ kakpa lempo nɛ b pɔr n yili teku be ekarso nna. Ama fo alɛ beeŋ ji anishinyɔr fanɛ eche kilpo nɛ e maŋ kurge ŋ ku so na nna.

⁵ Ijiptebi gba kaŋ nu fanɛ Tayɛ mur, k beeŋ chinchiŋ bumo nɛ kufu e pɛ bumo.

⁶ Menyi nɛ men wɔ efuli nɛ baa tre Fenisha na e boŋ to awɔrso n shu ga nseŋ wora ania n shile n yɔ efuli nɛ baa tre Speen na!

⁷ Kadegboŋ ere beeŋ tiŋ a la Tayɛ be kadegboŋ nɛ kagbenefuli daŋ bɔlɔ kumo to nɛ k jɔŋɛ dra dra na kikɛ a? Kadegboŋ nɛ k daa shuŋi kumo to be basa nɛ baa dii teku a yɔ efuli pɔtɛana so n ya ka ji kuwura bumo so na nde a?

⁸ Wanɛ e kre le n deŋi Tayɛ so? Kumo be basa daŋ ji eleŋ ga nɛ kumo be eyawujipo malɛ daa la bewurbi nɛ basa daa maŋkura bumo ashi durnya to kikɛ.

⁹ Enyɛnpetale Ebɔrɛ na e daŋ kre kumo fanɛ e beeŋ shin nɛ bumo be mpuchi nɛ baa puchi ŋkpal kusɔ nɛ b tiŋ n wora so na e ba ekar nɛ e ŋaba bumo be bunyaŋwuraana.

¹⁰ Tayɛebi, men ya kaa dɔ menyi be kasawule na so fanɛ kananɛ Ijiptebi bee dɔ Nail be lɔrgboŋ na be ekarso na, ŋkpal manɛ so, menyi maŋ naa kɔ kakpa nɛ men baa yili menyi be ekuloŋgboŋana.

¹¹ Enyɛnpe Ebɔrɛ na teŋi mbe enɔ to m baŋ teku so n ya shin nɛ kufugboŋ tɔr efuliana na so. Mo alɛ yili kumo nna fanɛ Fenisha be efuli so be ndegboŋ nɛ b pɔr egbal lempoana ŋ kulti na kikɛ beeŋ mur.

¹² Ade be kaman nɛ Enyɛnpe Ebɔrɛ na kaŋɛ Sidɔn be basa na le: “Menyi be kayurji na fo ekar. Menyi alɛ mur nna na. Hale nɛ men ŋana n shile n yɔ Saipres be kepla so gba, men kraa maaŋ nya kayurwushi ndoŋ.”

¹³ Keni kusɔ nɛ Asiriyaebi wora Babilɔn be efuli so be basa! B kre kena m ba gbare shishɛr n deŋi abar so nseŋ dii amo so n luri kadegboŋ na to ŋ kɔ kumo nseŋ mur kasawule na so be ewurkpa kikɛ. Naniere kupuŋ to be asɔbɔya lubi e wɔ kumo be alambure na to.

¹⁴ Kakpa lempo nɛ k bee kuŋ efuli na kikɛ maŋ naŋ ka a yil, amoso kaŋɛ basa nɛ b wɔ ekuloŋgboŋ nɛ e wɔ teku so na kikɛ fanɛ b baa shu awɔrso kagbenejijaso. Ŋkpal manɛ so, kadegboŋ nɛ baa fute a yige so na kikɛ mur.

¹⁵ Jemanɛ ko bee ba nɛ b teŋ Tayɛ be kadegboŋ so n ya fo nfɛ adushunu. Nfɛ nɛ ewura bee ji durnya to nna. Nfɛ adushunu ere be kaman, Tayɛ beeŋ ki fanɛ sakaleche nɛ kashɛ ere bee ji mbe asheŋ ere:

¹⁶ Ta jaŋjilaŋ n nite ŋ kulti kade na kikɛ to, fo sakaleche nɛ b teŋ fo so ere! Baa laŋ kumo nsaa boŋ fo nshɛ nɛ fee sha ga na nɛ fo basa e naŋ nyiŋi fo asheŋ nseŋ bɛta m ba.

¹⁷ Nfɛ adushunu na be kaman, Enyɛnpe Ebɔrɛ na beeŋ naŋ shin nɛ Tayɛ e bɛta n yɔ mbe kayawuji dra na to. Kadegboŋ na beeŋ baa du fanɛ eche nɛ e bee fa mbe kumu a sa enyɛn kikɛ ashi durnya to be efuli kama so nna,

¹⁸ ama asɔ kama nɛ e beeŋ nya na be kekama maaŋ nya n yili kadegboŋ na to. Amansherbi na beeŋ baa la Enyɛnpe Ebɔrɛ na peya nɛ bekama nɛ baa shuŋ mo na e ta amo n tɔ ajibi damta nɛ asɔbuuso lela nɛ baa sha.