Aizaaya 22 - EBƆRƐ BE KAWƆL

Jerusalɛm be kaplɛa so be kubɔya be asheŋ

¹ Kubɔya nɛ k wɔtɔ a laŋɛ ketaŋɛ nɛ baa tre Ebɔrɛdare be Ketaŋɛ na be kaplɛa so nde. Manɛ e naa wora? Manɛ nna nɛ basa nɛ b wɔ kadegboŋ na to bee ji eyur ashi bumo be achoŋi so?

² Awɔr e sɔ kadegboŋ na kikɛ to nɛ basa bee ji a nuu nsaa boŋ nshɛ a cha kaplɛkama. Menyi be basa nɛ b wu kena ere to ere be ekama maa kɔ kena nna nseŋ wu.

³ Menyi be bejuŋkparpoana kikɛ daŋ cha abar nna a shile nɛ b ya pɛ bumo kaplɛkama nɛ b shile n yɔ na, nɛ bumo alɛ maŋ tiŋ ŋ kɔ gbrɛbi kama gba nɛ b suge bumo be amu.

⁴ Men yige ma nɛ n shu ga ŋkpal ma basa nɛ b wu na so. Men sa maŋ wora ania fanɛ menyeeŋ lɔlɔ ma.

⁵ Le be jemanɛ ere la keyeŋiyeŋi nɛ kekɔ n tɔr nɛ kebagato be saŋɛ nna ashi Ebɔrɛdare be Ketaŋɛ na to. Enyɛnpetale Ebɔrɛ na malɛ e bar kumo anyi so. Anyi be kadegboŋ na be egbalana nɛ b da n lɛ nɛ ekama bee shu a fin kechɛto ashi abee so.

⁶ Benapo shi Elam be kasawule so ŋ keta bumo be ata nɛ atanyembi nseŋ dii egbaŋɛ nɛ beko malɛ shi Kir be kasawule so ŋ keta bumo be abɛlso be asɔ kuŋamuso m ba.

⁷ Ndoŋ nna nɛ egbaŋɛturko ba sɔ Juda be ataŋɛ to be adɔsawule lela kikɛ so nɛ esoji nɛ b tase egbaŋɛ so ba yili Jerusalɛm be mbunagboŋ be anishito kikɛ.

⁸ Ndoŋ nna nɛ Juda be mboŋ lempo nɛ a bee kuŋ kumo na bure n tɔr. Loŋ ka wora na, nɛ men ta menyi be yirda n deŋi akɔsɔ nɛ men ta n yili ewurkpa nɛ men pɔr n yili kupo to na so nseŋ ya bar amo.

^9-10 Menyi alɛ daŋ wu fanɛ Jerusalɛm be egbalana na be mboŋ ko daŋ daga kelɔnɛ m pɔr nna. Men daŋ keni ŋ keni nwu nɛ a wɔ Jerusalɛm to na to na kikɛ nseŋ bure amo be ako saŋɛ na so menyeeŋ nya ajembu n lɔŋɛ kadegboŋ na be egbalana na m pɔr. Men ka daa sha nchu so,

¹¹ men daŋ pɔr nchu be eyilikpa nna ashi kadegboŋ na to n sɔ nchu nɛ a shi kepa dra na to a ba na n yili. Ama men daŋ maŋ laŋɛ menyi be lakal Ebɔrɛ nɛ e kre ade kikɛ dra dra na kikɛ pɔɛŋ nɛ a bee wora ere bre so.

¹² Enyɛnpetale Ebɔrɛ na daŋ kaŋɛ menyi loŋ be kachɛ na fanɛ men baa shu anishichubi nsaa boŋ to awɔrso, nseŋ she menyi be amu m buu keeli be asɔbuuso.

¹³ Ama men daa maŋ nu n sa Enyɛnpe Ebɔrɛ na nsaa ji eyur. Men daŋ mɔ mbolpɔ nɛ ana nna a ji nsaa nuu yabra. Ade kikɛ be kaman nɛ men kaŋɛ le: “Men shin nɛ an ji nseŋ nuu kabre! Ŋkpal manɛ so echefo nɛ an wu n choŋ.”

¹⁴ Ndoŋ nna nɛ Enyɛnpetale Ebɔrɛ na gbagba bɔ ntaŋ ŋ kaŋɛ ma le: “B maaŋ nya kulubi nɛ b wora ere be ketampaŋ ashi bumo be ŋkpa kikɛ to. Ma, Enyɛnpetale Ewurbɔrɛ na e kaŋɛ na.”

Shebna be kasokpele be asheŋ

¹⁵ Ade kikɛ be kaman nɛ Enyɛnpetale Ebɔrɛ na kaŋɛ ma fanɛ n yɔ kanyɛn nɛ baa tre Shebna nɛ e la ewurkpa be nyɛrbi na kikɛ be enimu na kutɔ n ya kaŋɛ mo le:

¹⁶ “Wanɛ nɛ fee fɛ fanɛ fo la? Manɛ e ba nɛ fo kur fo nchaŋ n nase kakpa nɛ baa puli bewura?

¹⁷ Feeŋ tiŋ a la esagboŋ a kɔ eleŋ ga, ama Enyɛnpe Ebɔrɛ na beeŋ fuu fo ŋ kpa n lɛ.

¹⁸ E beeŋ bɔɔlɔ fo fanɛ bɔɔl ŋ kpa fo n lɛ efuli nɛ k shi ga so, kakpa nɛ feeŋ ya wu n dese m mata fo egbaŋɛturko nɛ fee puchi so na. Fo la ŋaba nna n sa fo nyɛnpe be laŋ to ebi.

¹⁹ Enyɛnpe Ebɔrɛ beeŋ lara fo ashi fo eshuŋkpa be eyilikpa nɛ fo wɔtɔ to ere to m bar fo kaseto.”

²⁰ Ade be kaman nɛ Enyɛnpe Ebɔrɛ na kaŋɛ Shebna le: “Nɛ loŋ kaŋ wora malɛ, meeŋ shin nɛ ma kayɛrbi Eliakim nɛ e la Hilkiya pibinyɛn e ba,

²¹ nɛ n ta fo eshuŋkpa be piŋi nɛ kumo be kreso m mɛa mo to a ŋini basa fanɛ mo e sɔ fo so. Kumo be kaman nɛ e ki fanɛ etuto n sa Jerusalɛmebi kikɛ nɛ bekama nɛ b wɔ ewurkpa na.

²² Ma, Enyɛnpe Ebɔrɛ na beeŋ sa Eliakim eleŋ nɛ k bɛ ewura nɛ e shi Deevid be kanaŋ to peya so, saŋɛ na so kusɔ kama nɛ e yili, esa maaŋ tiŋ ŋ kini kumo; kusɔ kama malɛ nɛ e maŋ sa akpa, esa kikɛ maaŋ tiŋ n wora kumo.

²³ Meeŋ shin nɛ e baa yil to kpakpa fanɛ b ka gbir keyir kasawule to na. E beeŋ baa la esa nɛ mbe kanaŋ to ebi kikɛ beeŋ bɔla so n nya kemaŋkura.

²⁴ Ama mo kurgepoana nɛ mbe eyali kikɛ be kebaawɔtɔ beeŋ ba deŋ mo so nna fanɛ kananɛ baa ta mpuliya nɛ echeenshi a buu kelantaŋɛ to na!

²⁵ Naniere bre keyir na gbir kasawule to kpakpa nna na, ama kachako bee ba nɛ k gbuŋgbuŋ n tia n tɔr. Saŋɛ na so asɔ kama nɛ amo be egbɛ daa deŋ kumo so na gba beeŋ mur.” Kusɔ nɛ Enyɛnpe Ebɔrɛ na kaŋɛ nna na.